So Comment

精彩懷舊菜 九福 地址:尖沙咀金巴利道 53-59號 電話: 2366 0286(甲)

Ads by Google

港福=港島福臨門
九福=九龍福臨門
相信全香港只有去到福臨門,由帶位到經理都會識叫我做「劉小姐」而唔係叫我做「蘇小姐」。福記係由細個屋企到會食到而家,佢又睇住我大,我又睇住佢大。自從港福變成名人飯堂,除了父母的生日,我簡直無乜興趣去。
自從搬咗去九龍,反而有去吓「九福」,我覺得水準仍 keep得非常好,經理「寶哥」和廚師又有心思,仍然感覺到他們對食物嘅熱誠。一次食飯,大家話不如食啲懷舊菜,你叫一碟,我叫一碟,結果有一席非常精彩菜式,今期特別介紹幾味難得一食嘅菜。

食物

燒鴨腳包$75/1隻
呢個係我 mammy的最愛之一,何翩久不久都會自己做燒鴨腳包,記得她一面洗鴨腸一面牢騷!!!鴨腳包喺細時真係一個好普通嘅小食,喺燒味鋪一串咁賣,但近十年我都未聽過有乜嘢地方有得食。
鴨腳包主要係將雞肝同肥豬肉叉燒放喺鴨掌中心,再用鴨腸順一方向繑住隻鴨腳,然後燒,頗多功夫,但又唔值錢,所以邊仲有人做吖,不過「九福」呢個鴨腳包賣相非常好,但麻麻好食,鴨腳和鴨腸都太硬,亦因此致到唔入味,希望可以改進!



白雲豬手$35/1件
超級好食,我一個人食咗 4件!皮係爽脆的,筋係恰到好處,有少少𡁻頭,幾乎無乜肉,淨皮和筋。味道就係簡單嘅鹽水味,沒有平時白雲豬手嘅酸味,正!

原盅豬肚鳳吞海虎翅( 16両翅$11,000)
先見到整個豬肚打開豬肚見到一隻起咗骨嘅雞
剪開隻雞,裏面釀滿海虎翅,所以叫「豬肚鳳吞翅」。
一人一碗豬肚切片,非常好食。












味道炒肚尖$850
很多地方都有炒肚尖,不過啲肚尖細細粒,手指尾指甲咁細。嘩!你看「九福」啲肚尖,手指公咁大,炒得又爽,好正!呢碟相信都要用十幾廿個豬肚,豬肚近大腸嘅位置,這裏比較厚,無分層的,最啱生炒,一個豬肚只得四分一係肚尖。



梅菜田雞腿煲$260/例
瓦煲上,香極,簡單味道突顯田雞嘅鮮甜味,田雞腿煮得剛好,嫩滑。

大地魚粉絲芥膽$400
哈哈!以我揀菜,話明芥膽,真係條條嫩甜,煮法簡潔,清甜芥菜膽加上大地魚味,無得彈。我不大喜歡食芥菜亦要大讚。
當然仲有美點五輝……馬豆糕、馬仔、芝麻卷、合桃酥和福記最出名嘅蘋葉菓(圖⑩)。
總言之,喺香港要食一餐咁有水準嘅古老菜式真不容易,大家再唔去食吓呢啲正菜,第二日有錢都食唔到呀!不過「九福」絕對好食過「港福」!






地址:尖沙咀金巴利道 53-59號
電話: 2366 0286



蘇施黃
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。

攝影:蘇施黃

    tvb4life 發表在 痞客邦 留言(0) 人氣()