李泓森( Will, 26歲),張家欣( Jacqueline, 27歲),既是情侶,也是港大校友,潛校訓「搏盡無悔」,鼓勵他們實踐理想,無負青春。

年輕有夢 

Little Break 地址:荔枝角長義街 9號 D2 Place地下 G03鋪

搏盡無悔

Ads by Google

港大校訓是「明德格物」,但港大生潛校訓是「搏盡無悔」。
26歲的 Will和 27歲的 Jacqueline,同為港大校友,未畢業,已籌謀人生大計──開 café做生意,盡搏一鋪。
Jacqueline說:「時間飛逝,要做一啲嘢,直到你長辭人世一刻,都會覺得無憾。」
打拼年半,店子生意不但上了軌道,還累積了實力開分店,向建立品牌之路進發。

走入荔枝角 Little Break,咖啡、美食、光潔明亮的環境、年輕清新的店員……很夢幻。但怎樣夢幻,都夢幻不過店主 Will的說話:「每期『年輕有夢』,我都會撕落嚟,我成日諗到底《飲食男女》幾時嚟訪問我呢?我好鍾意做訪問,可以 remind到底呢刻我哋做緊咩,因為人嘅意志好容易被現實磨滅……」這個熱誠澎湃的店主,果然有滔滔理想待傾訴。
Will跟女朋友 Jacqueline,一個讀運動科學,一個讀英語教育。三年前大學畢業,當同輩籌謀找工作時,這對情侶不甘平凡,決意創業。 Jacqueline祖父創辦金馬餐廳,餐廳雖然結業十多年,但早為她播下了做生意的種子; Will性格外向,在學時到澳洲交流,其間在當地當餐廳經理,對飲食業萌生興趣。這對志趣相投的情侶,於是成為生意拍檔。






要不不做,要做就要夠徹底。創業前做足功課,深知中環、尖沙咀等地競爭太激烈,於是劍指荔枝角,計算過人流後,覺得有可為。當時羅氏集團有意把旗下一幢工廈活化成文化地標 D2 Place,「我哋兩個攞住 proposal膽粗粗咁上去。以前做功課 present好 casual,呢次係要走入社會,好緊張。」有橋,有熱誠,最終打敗建議做 food court的大公司,在 D2 Place實現了他們的創業夢。
他們各自考了咖啡師牌, Jacqueline學做甜品, Will專程到連鎖咖啡店工作偷師。後來察覺賣輕食的咖啡店成行成市,腦海中的藍圖原來不夠出眾,覺得應該再搏一點,咖啡好之外,食物也要做得好,於是由 café變陣做 café and kitchen。物色了酒店扒房出身的大廚,研發主食,像一款叫 Ham So Excited的熱香餅漢堡,自家製熱香餅,配上煙肉、太陽蛋、芝士、牛油、楓糖漿,還有炭燒澳洲 M5和牛牛鞍扒等。
同是年輕人,深明新世代想法。 Will說:「而家後生仔唔係講錢咁簡單,係講開心。」所以由菜式設計,以至出餐流程,兩人都邀請員工參與討論,「等佢哋覺得自己係屬於呢度。」二人不稱員工為員工,叫作 partners,視為合作夥伴,沒有階級之分。因為 Jacqueline相信,滿足感、歸屬感才留得住年輕人員工。




二人經常周遊列國,加上愛吃,有時在旅途中萌生飲食點子。





Will十分重視員工,做訪問也希望廚房員工有份出鏡。

Will做事搏盡、投入,很上心,曾經試過爆場時,眼見新人員工呆站在一旁,於是緊張大罵:「企晒喺度做咩!」但發火過後, Will總是軟下心腸:「佢哋嗰刻都有 hard feeling,之後我都唔開心,於是同佢地講對唔住。」 Jacqueline性格平易近人,「我唔鍾意鬧人,鍾意講道理。每個人都有難處,應該先了解件事,再睇下點磨合解決。」 Little Break開業年半,廚師以至咖啡師,幾乎沒有人離開過。 Jacqueline說:「 Little Break可以發展落嚟,最大原因係因為我哋有支咁穩定嘅班底。」
餐廳近月在上環開分店。 Will衝勁十足地說:「我唔希望賺一嚿錢就走,希望將餐廳變成一種態度,建立一個品牌,再開 dessert bar、扒房……咩都有可能。」 Jacqueline則以農夫的歌《重新找到你》,來肯定自己這三年的追求:「歌詞講,每一日好似影印咁嘅生活,搭同一班車,食同一早餐,見同一班人,好似唔知做緊咩嘅時候,其實可以跳出框框。因為人生係自己編制嘅,應該要活出一個咁樣嘅人生──係當你長辭人世嗰刻,都能夠畀一個微笑自己。」




特濃抹茶蛋糕, Jacqueline親手製作,味道清新。$48


海鮮墨魚汁麵,配上虎蝦、帶子、蜆、芝士等,十分足料,$198。


Ham So Excited,自家製熱香餅香軟,配上上煙肉、太陽蛋等,很好吃。$80連飲品。

Little Break
地址:荔枝角長義街 9號 D2 Place地下 G03鋪
營業時間:周一至五 11am-10:30pm;周六日及公眾假期 8:30am-10:30pm
電話: 2742 2782
地址:上環蘇杭街 104號秀平商業大廈地下
營業時間: 8am-10pm(暫定)
電話: 2503 3535

撰文:周燕
攝影:王嘉豪

    tvb4life 發表在 痞客邦 留言(0) 人氣()