So Comment

不過不失泰國菜  MOON THAI 地址:上環蘇杭街 83號香港蘇豪智選假日酒店 2樓 電話: 2851 1288(乙-) (蘇施黃)

 

Ads by Google

食嘢係用口,唔係用耳!!!
唉!又一次朋友話好食,又上當!因為我時常話冇乜好嘅泰國餐廳,於是朋友立即叫我試「 MOON THAI」,不外如是……

裝潢

冇!!!其實當你去一間印度餐廳,你希望有啲印度氣氛,去泰國餐廳都要有啲泰國 feel,「娘」到花呀,大象呀都好過 MOON THAI咁,你入到去,你話佢係豉油西餐廳又得,食日本嘢又得,廣東菜都得,完全冇 theme,冇氣氛!!!







食物

MOON THAI PLATTER,春卷好好食,又脆,餡料有粉絲木耳……簡單好食。雞卷,普通。雞翼,雪藏味。燒豬頸肉,醃得唔好味,又燒得唔香。蝦餅魚餅 OK啦。

柚子沙律,幾好味,蝦就冇味,我寧可唔要嗰三幾隻蝦。
海鮮粉絲沙律,點解同柚子沙律一樣色,差不多味道嘅?!
硬殼蟹沙律,反而相當好食。
豬肉碎生菜包,錯晒!淨係得鹹味,又冇酸味又冇辣味。

乾炒牛河粉,香港好多地方都有 pad thai(橙色嘅炒河)我最怕,香港泰國店多有濕炒河,好少有乾炒河( pad see ew),我最鍾意的 Bangkok文華酒店最好食!不過 MOON THAI都唔錯噃!好味道,尤其嗰兩條芥蘭,於是又叫一碟炒芥蘭,佢落咗豆醬炒,非常鹹。

最後泰國嘢都係普通,餐牌最後一頁竟然係印度餸,於是叫咗個 chicken masala和 plain naan bread,全世界最難食嘅 naan bread,點解又薄又脆嘅?!都係自己唔好,泰國餐廳做乜叫印度嘢呢?

總括 MOON THAI絕對唔可以話好食,但係又唔係難食,但係絕對唔會推介畀人囉!所以記住,食嘢係用個口,唔係用耳,唔好人話好你又話好!
























地址:上環蘇杭街 83號香港蘇豪智選假日酒店 2樓
電話: 2851 1288



蘇施黃
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。

攝影:蘇施黃

tvb4life 發表在 痞客邦 留言(0) 人氣()