電影精

《神奇 4俠》搏黐 X-Men

Ads by Google

今日,只要有 Marvel的光環,乜戲都掂。十年前,買了版權的 Fox,開拍《神奇 4俠》( Fantasic Four),一致劣評,再開拍續集,一樣差。終於收工,疊埋心水搞《變種特攻》( X-Men)。死灰可以復燃,何況,將來有機會黐埋去《變種特攻》系列,又整多個小型《復仇者聯盟》( The Avengers)?
洗牌再嚟過。唔使經典先可以重拍,掉番轉諗,做錯咗嘅更加需要撥亂反正。

奇怪組合

上一代《神奇 4俠》,導演 Tim Story之後只可拍番啲小製作,神奇先生 Ioan Gruffudd最近在《加州大地震》( San Andreas)跌番去做不討好閒角;石頭人 Michael Chiklis主力拍電視劇,爆紅是隱形女俠 Jessica Alba同埋霹靂火 Chris Evans兩姊弟。
來到新一代《神奇 4俠》,演員全新,有啲都幾估佢唔到。隱形女俠係 Kate Mara,即是《 House of Cards》第一季嗰個女記者,本身只細 Jessica Alba兩年,但遲十年做同一個角色。演石頭人嘅,竟然係靚仔 Jamie Bell,變石頭喎。做霹靂火是黑人演員 Michael B. Jordon。最正常應該是神奇先生起用《鼓動真我》( Whiplash)上位中的 Miles Teller,但係細隱形女俠四年,玩姊弟戀?
唔得咩?




電影在八月六日上畫,同期最強對手是彭于晏的《破風》。美式全特技鬥港式搵命搏。


隱形女俠


神奇先生


霹靂火


石頭人 年輕化


為咗演霹靂火, Michael B. Jordon特登去請教前輩 Chris Evans。換來答覆是:「我幫你唔到喎。」咁又真,你又無佢咁靚仔。

電影公司超有信心,戲未上,已經計劃兩年後出續集。導演 Josh Trank同樣係八十後新人,一心追求年輕化,同埋寫實,所以堅持搵黑人做白人的弟弟,符合世情。
古仔無乜大變,講四位年輕人被安排送上太空,回來時,多咗超能力,一個身體能屈能伸,一個識隱形,一個識噴火飛天,一個似石頭咁硬。面對嘅奸角,依然係 Dr. Doom末日博士,找來在《猿人爭霸戰:猩凶崛起》( Dawn of the Planet of the Apes)做猩猩 Koba非常出色的 Toby Kebbell負責。今次唔使扮猩猩,不過要戴面具。單憑賽前觀察,咁多個角色,似乎以呢個揀得最好。

撰文:方俊傑
mailto:hotpot@nextmedia.com

全站熱搜

tvb4life 發表在 痞客邦 留言(0) 人氣()