電視精

《死亡筆記》電視版醜怪

Ads by Google

金庸嘅武俠小說經典,每隔幾年就會被翻拍,不過選角往往惹人詬病,好似上年內地翻拍《神雕俠侶》,女主角陳妍希被指完全缺乏小龍女嘅脫俗氣質,仲笑佢係小籠包!
其實翻拍經典真係唔容易,日本漫畫《死亡筆記》首次拍成電視劇,兩位新進男主角,自然被觀眾將佢哋同當年電影版嘅藤原龍也、松山研一作比較,先入為主無可厚非。不過睇真啲,原來成個故事大改,角色性格、故事情節完全唔一樣,咁點解仲要叫《死亡筆記》呢?



《死亡筆記》拍日劇版,演員無可能同十二年前一樣,彌海砂由戶田惠梨香(左圖)換上水著女佐野雛子(左上圖),淨係氣質已經輸晒。

 




對比一下電影版(右圖)同電視版(上圖)嘅宣傳海報,點睇都係新不如舊。


相隔十二年

2003年日本漫畫界神作《死亡筆記》被拍成電影,當時引起極大話題,因為題材敏感,加上兩位男主角夜神月同 L形象鮮明,漫畫原著有大量 fans,擔心會令 fans失望。結果大受好評,大收 28億日圓,藤原龍也同松山研一更加被指係最貼近原著嘅男演員,令佢哋嘅事業更上一層樓。電影大收,本來一直都傳出想拍落去,不過傳吓傳吓,咁就過咗 12年,直到今年,終於再次翻拍《死亡筆記》電視劇。 Fans當然開心,不過兩位男主角已經由少年變成中佬,意味住一定要換角,咁就唔係嗰回事,唔係藤原龍也做夜神月、松山研一做 L,仲算係《死亡筆記》?萬眾期待下,電視台公布演員名單,由 26歲嘅新進男演員窪田正孝飾演夜神月,由於之前佢飾演過嘅角色比較柔弱, fans覺得佢演唔出夜神月嘅奸險。至於 L由山崎賢人飾演,年紀輕輕只係 20歲,因為成日演少女漫畫電影而被稱為「壁咚王子」,一樣被指無 L嘅影子,最離譜係 L嘅繼承人 N,明明係男仔,走去搵個女仔嚟演, fans完全接受唔到呀!




故事大改令 fans不滿,不過亦有網民話夜神月由叻叻高中生變成廢廢大學生,令人更容易投入劇情,我建議呢啲人去睇《愛•回家》算了。


松山研一、戶田惠梨香同藤原龍也當年都仲未係一線,拍完《死亡筆記》之後立即聲名大噪,而家已經係一哥一姐。

窪田正孝演技唔錯,更加超越福士蒼汰成為最突破男演員第一位,不過追星嘅夜神月、俾死神嚇到擘大個口嘅夜神月,邊個想睇呀?







天才變廢青

《死亡筆記》原著係講天才高中生夜神月,有一日無意中執到死神嘅死亡筆記,凡係名字被寫在筆記本上,嗰個人就會死,夜神月想用死亡筆記做判官,不過就被神探 L發現,兩人之間展開鬥智鬥力嘅對決。電視台一早已經事先聲明,今次日劇版同原作相比改動較大,夜神月由一個文武雙全嘅天才,變成一個普通嘅大學生,講佢執到死亡筆記後慢慢成長。第一集出街之後,簡直係完全不能接受,夜神月變成一個追星嘅宅男,原著明明彌海砂係暗戀佢為佢做跑腿,而家改到係佢迷上彌海砂所屬偶像團體。然後執到死亡筆記,竟然唔識英文要去查字典!試問一個咁嘅廢青點有資格擁有死亡筆記? Fans對呢個改動非常不滿,去官網留言大罵,甚至有人想去電視台索償!劣評如潮,估唔到第一集竟然創出今年日劇首播最高收視紀錄 16.9%,講到尾,大家咪又要鬧又要睇!




成套劇最令觀眾滿意,相信只是死神,加上 CG技術進步咗,特別逼真。


山崎賢人做 L,太靚仔太造作。 撰文:關錦雯
mailto:hotpot@nextmedia.com

全站熱搜

tvb4life 發表在 痞客邦 留言(0) 人氣()