75分

私口味

迷你兵團

Ads by Google

《迷你兵團》( Minions)真係好受歡迎,你看看市面,幾多品牌借它們當宣傳推廣?《魔雪奇緣》( Frozen)只擊得中小女孩,《迷你兵團》卻通殺,細路女、女朋友、老婆、阿媽、阿嫲,個個都話得意可愛,分分鐘你本人就是得閒會唱 Banana Song的其中一分子。



從《壞蛋獎門人》( Despicable Me)中抽出來自立門戶,理所當然。以六十年代的英國作為故事主要背景,有點始料不及。如意算盤或者是這樣:小朋友只要見到班黃嘢已經收貨,安排佢哋上太空落地獄也沒有分別,反而要考慮一下如何取悅埋成年人,拿英女皇拿披頭四拿御林軍來增強感情分,是一個不錯的選擇。𡃁仔𡃁妹不知道 Abbey Road條馬路有什麼好笑,更能凸顯老鬼們自以為的優越。
在可愛大過天的時代,最重要簡化。《迷你兵團》在這一方面可謂出神入化,以一種英文唔係英文的發音去溝通,基本上係世界通用,一個配音可以走遍全球,還有什麼比它更簡單?用作宣傳電影的短片,例如講 Minions去戲院睇《侏羅紀世界》( Jurassic World),效果其實比九十分鐘片長的正本戲更出色。因為夠晒無聊,完全符合笑完就算的需求。到電影本身,要講究情節,要有上文下理起承轉合,部分章節,便顯得有點吃力。
《迷你兵團》三位主角,畢竟不似《反斗奇兵》( Toy Story)的胡迪與巴斯光年,有棱有角有個性,真人一樣,足夠串連一個完整故事有餘。迷你兵團的特點是無腦呀,是蠢,是聽教聽話,是似羊群般跟大隊,如此個性,老老實實,又點可能擔得到大旗?
所以,如果閣下是一位怪獸家長,點可能容忍貴子弟觀看《迷你兵團》呢?萬一他們真係有樣學樣,覺得迷你兵好可愛,於是洗了自己腦,收埋獨特的個性,甘心去做結局中幾百隻迷你兵的其中一隻,毫無思想地盲目附和大佬,咪死?培育多年的心血咪功虧一簣?還是,做家長的,根本最想子女真係一生一世聽教聽話,阿媽指住東個仔永遠唔會望向西?寫到這裡,鄰座的太太又開始黑面了:「 Minions咁可愛,你使唔使諗到咁複雜呀?」 Sorry sorry,如果我似 Minions咁簡單,我應該會活得幸福快樂,但寫唔到足夠字數去填滿欄目,到時,可能真係要聽晒阿爺阿嫲話才生存到。所以,還是容許我諗得複雜少許吧。

方俊傑
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()