於十米高的瀑布玩瀑降,全副裝備從天而降,玩嘅時候唔覺得咁高,睇返相先識驚!

太爛玩

瀑降 十米瀑布 挑戰膽量

Ads by Google

睇旅遊節目,成日見到主持人攀山涉水,喺大自然尋幽探秘,例如去四國跳瀑布,香港人好似得個恨字,唔通香港真係只得石屎森林?
其實喺香港嘅郊外,一樣有好多好玩嘅地方。「瀑降」,是從瀑布頂游繩落下,看起來似是很危險,不過在教練的指導之下,一個人游繩落到十米瀑布,講求技巧及膽量,刺激感十足,成功感極大!

十分鐘游繩落瀑布

家母教落「欺山莫欺水」,所以當面對眼前呢一幅十米高的瀑布時,都咪話唔驚!教練先搵一棵樹掛上繩索,以繩結固定,之後就開始示範一次如何游繩落瀑布。教練話右手係主繩索,無論如何都不可以放手,否則就會失去平衡,嚴重的更可能會被瀑布打向大石,造成意外。教練紮穩馬步,兩分鐘就完成瀑降!不過初學者慢慢來,起碼要十分鐘,教練會從旁指導,一同游繩下降,如果不能企直身體,可以試用臀部滑下。由於人和繩只有一個支點,初學者在瀑布的石上很容易失去平衡,加上對路線不熟悉,顧住確認下一步如何走,已經花了很大力氣,碎步一下一下向下行,好似行極都未到。瀑布嘅水流又會忽大忽細,一下跣腳真係嚇親,絕對係膽量嘅挑戰!




由上面望落去,角度非常斜,幾乎見唔到底,不過喺教練指導下,安全游繩沿石落去,完成之後嗰份滿足感超乎想像!


有一些比較短的水澗,可以當作滑梯,好玩過水上樂園!


玩瀑降很容易撞向大石,所以一般建議穿長袖薄上衣,不過夏日炎炎,唔怕刮損可以著泳衣! 教練一對一指導

今次負責帶團嘅韓榮疇( Gordon),有超過十年攀山經驗,瀑降經驗豐富。今次嘅瀑降地點,係位於粉嶺鹿頸嘅屏南石澗, Gordon表示屏南石澗係香港較熱門玩瀑降嘅地點,相對上沒那麼陡峭,撤退路線較多,比較安全適合初學者。出發之前,教練會先跟參加者進行簡單教學,如游繩的正確姿勢等等,並到斜坡練習。教練先在斜坡一對一指導參加者,因為無水,可以更容易指出改善地方,參加者亦可以熟習後才出發。練習完出發,要先行過南涌郊遊徑,大約 30至 40分鐘,才會到達石澗,沿住石澗玩瀑降下山,時間許可的話,可以做 5次瀑降,遇到水夠深的話,仲可以玩跳水!可能大家會擔心安全問題,不過全程有教練睇住,亦穿上救生衣,比起自己去跳安全得多!不過都有後遺症,就係玩完之後肌肉痛,我就貼咗兩日膏布,可想而知運動量之大!

瀑降體驗流程

先穿上瀑降裝備,如頭盔、安全帶、安全釦等等,教練會略為講解整日行程,以及基本手勢。記得準備防滑爬山鞋、防水背囊,想影相就要帶防水手機袋,否則一跌落水就報銷。



到水壩附近的斜坡練習,睇教練示範時覺得好容易,實際一行落斜坡,就發覺要企起身一啲都唔容易,下盤功夫好重要。

估唔到成個體驗最辛苦,係行呢條郊遊徑,要行 30至 40分鐘,對於沒有行山經驗的宅女如我,行到一半輕微中暑,真係失禮!不過柳暗花明又一村,行到上去就有好風光,可以喺潭中暢泳一番消暑,補充一下體力就開始玩瀑降。









第一個瀑降大概兩米高,水流唔算急,參加者喺教練帶領下慢慢爬,有啲位置可以行兩條路線,今次挑戰咗左邊,難度較高,無水一樣咁驚!



見到水深之處,可以試吓跳崖,教練會先跳一次確保安全。同跳笨豬跳一樣,唔好猶豫,眼望遠方,踏一大步就跳出去,爽!(不過我入水時手掌拍在水面上,痛咗半個鐘!)



挑戰今次最高嘅十米瀑布,由於有彎位,難度提升,平均要 10分鐘才下降到瀑布下,有助教拉緊繩索,保障安全。



由早上 11點玩到下晝 4點,體力透支,不過可以征服瀑布,呢個經驗咁難得,點都要喺瀑布影相留念!

瀑降體驗團

可到「香港攀岩歷奇」網頁報名( http://www.hkrca.com/canyoning ),費用$680,連來回粉嶺火車站至鹿頸的交通費,以及瀑降需要的裝備,需自備水及食物。亦可透過 Klook報名,網址: http://www.klook.com 

撰文:關錦雯
攝影、攝錄:羅錦波、陳偉傑
模特兒: Candy@BOM MOUTON
mailto:hotpot@nextmedia.com

全站熱搜

tvb4life 發表在 痞客邦 留言(0) 人氣()