登機證

旅行 旅遊 越南芽莊預告 一晚房價任做 Spa

Ads by Google

做人做到十項全能當然好,靚仔有錢高大風趣有品味專一學歷高識煮飯脾氣好仲唔會放屁,仲唔無敵?世事邊有咁完美。
有一項過人之處已經好足夠。似位於越南芽莊的 Fusion Resort Nha Trang,尚未正式開業,已吸引我率先飛過去搶先採訪。因為,俾了房錢,入住期間,全程可以任做 spa,不另收費。
有呢項賣點,吸引力已經爆燈。 Resort的套房仲要特設我呢世仔未見過咁大的超巨型 private pool,加埋水清程度有如馬爾代夫級數的無人沙灘。九月三號無啦啦多日假?唔請多幾日假去旅行,唔通留喺香港欣賞大媽跳舞?

 

夠唔夠?

保證一日至少兩次 spa,去芽莊,要先飛胡志明市,再轉機。之前又要申請簽證,好似有啲唔方便,所以,一定要有超強賣點先夠吸引。
Fusion Resort Nha Trang嘅最強賣點,唔使講,一定係任做 spa。點樣任做法?你一入住,即刻可以去大堂旁的 Maia Spa訂位,有位就做得,保證唔到你一日做足廿四小時,但保證一日至少做到兩次。房價包晒,不另收費。
日日做 spa,同一款,咪好悶? Maia Spa設計咗一套可以平衡你身體、精神、情緒嘅療程,以七日作一週期,又用當地香草又有美容,加埋印度來的師傅傳授按摩絕技。你住夠七日先好同佢講悶。
我親身接受過療程,可能尚在試業階段,技師明顯尚在摸索階段,但 spa centre有成 24間房,有單人房有雙人房,夠多,將來正式營業時,應該唔會出現人逼人的慘況,亦應該應付得到任做 spa的壓力。

 




試業期間有上門服務,技師去到你間房幫你按摩。到八月正式開業, sorry,上門服務就會取消。都合理,如果入埋房真係請多一倍人手都唔夠。


Maia Spa的裝修可以話走不花巧的平實路線,要雙人房先有浴缸。相信最主要原因係為咗日後應付極大用量。俾你揀,可能都情願間房細啲,但多房啲,變相你又可以做多幾次。





Spa提供的服務,包括桑拿、額頭滴油、瑜伽、印度式水療等等,仲會利用自己種植嘅香草來進行自然療法。款式多多,一日做兩次就一定無問題。





Maia Spa位於 resort的入口旁,自成一國,特別寧靜,只可惜無海景。由朝早十點開到夜晚十點,記得一早 book定位。 二千呎私人泳池 最啱開 party

Fusion Resort Nha Trang共有 72間套房或別墅,因為分別座落於 12米高沙丘上,所以全部對住無敵大海景。一般情況下,去 resort度假,當然係一對情侶去最合理,唔通一男一女加多一個電燈膽會好玩啲咩?今次,我要反傳統,強烈建議你一家大細有咁多人叫咁多人去,或者你 call齊朋友去開 party,因為,間 Oceanfront Grand Beach Villa,真係好正好正好正。
四間睡房,佔地成八千幾呎,足足裝到八個人,其實,裝八十人都得。有埋客廳、飯廳、廚房,好少事,最勁係個 private pool,有成二千幾呎大,游極都好似未游完咁,我就真係未見過大過人哋酒店 public pool嘅 private pool,去買啲酒、帶個 speaker,基本上,自己間房可以搞個酒店級數嘅 poolside party。
游游吓泳池水,嫌悶,仲可以直接跳去沙灘,浸海水,爽爆。如果,你真係無咁多人同行,無所謂,其他房間嘅 size雖然比起 Oceanfront Grand Beach Villa細啲,但內籠格式、傢具設計、用料,接近一致,追求浪漫的住客都一樣會滿足到。




泳池面積很大,加埋 Jacuzzi,加埋可以坐喺 Cabana曬太陽,每晚房價約一萬港幣,除番開八個人,唔算太貴。


去露天花灑位沖涼,唔使驚有人偷睇喎。房間外有圍牆,除非有人故意擒高偷窺,否則,你驚沙灘有路人行過透過玻璃裝返入房好過。


每間房都有呢個凌空浴缸,睇上去係幾靚,但排水時,好易搞到滿瀉整濕地板。


Resort內的不同款房間,裝修風格和家具幾乎一致,最特別係乜嘢都可以摺平,例如 Day Bed可以攤直變平面,電視就放喺摺櫃內,放低咗就變成茶几狀,令間房睇上去更闊落。


飯廳加客廳,隔籬就係一個有一般廚具嘅小廚房。


四間睡房,兩間係 King Beds,兩間係 Twin Beds。窗簾全部電動,好方便。 隨時隨地 早餐任你揀

既然 spa任做,房又超正,相信好多住客去到 Fushion Resort Nha Trang,都唔願走。畢竟,由 resort去到最旺的芽莊市中心,要成 45分鐘車程。邊捨得日日咁樣浪費時間出出入入?
所以,餐廳好重要。 Resort內只得一間叫「 Fresh」嘅餐廳,露天位對住大泳池,坐得舒服,提供西餐及越南菜,係屬於唔差嘅水平。
早餐反而有驚喜。唔係話啲 egg benedict特別好食,而係 resort好知道度假旅客嘅心態同需要,竟然全日提供早餐。過咗朝早,餐廳過咗時段無自助早餐咩,你鍾意幾時食喺邊度食都仲得,員工會將早餐拎去你指定地方等你慢慢品嘗。換句話說,即係你喜歡黃昏六點先到沙灘食件西瓜,加塊多士,一樣無問題,正常少少,叫入睡床上牙都唔刷就開餐,更加得,簡直係一般香港人恨咗好耐嘅生活模式!




「 Fresh」餐廳位於泳池旁,有露天位也有冷氣位,正式開張時,更會提供燒烤服務,客人可以自己 BBQ。


去 resort,通常包早餐,唔想蝕,但係又唔想十點前已經化好妝出到門口。 Fusion Resort提供的隨時隨地食早餐服務,簡直是惠澤眾生的德政。


自助早餐,糕點同冷盤採自助餐形式,其餘熱點可以隨意落 order,有西式或越南式選擇。








蟹肉沙律$78


黃鰭吞拿$149


澳洲羊架$156


杧果慕絲$57


朱古力香蕉蛋糕$57 寧靜的海 無人的沙灘

Fusion Resort Nha Trang遠離塵囂,即使所屬沙灘不算私人沙灘,但根本無外來遊客,與私人沙灘無異。由於 resort追求嘅係一分寧靜,主攻香港、日本、南韓嘅旅客,少見多醉酒鬧事多嘈吵的戰鬥民族。為貫徹始終,沙灘上提供的水上活動寥寥可數,就只有美女瑜伽導師日日駐場,模特兒 Alia跟住試玩,有板有眼,想玩其他水上活動,就要幫襯外判嘅 Boat Trip、浮潛團之類。但 Alia同我都同意,留喺 resort,喺夠長夠深嘅 infinity pool游游水,已經最享受。不要忘記,游完水,又可以去做個 spa,這項賣點,真係要用到盡。




當私人泳池都咁大,俾全間 resort住客用嘅公眾泳池,當然要更巨型,先有用。但七種房裡,有四種都有私人泳池,最細嗰個超過千呎,真懷疑有冇人會出房游。


沙灘的水清程度,跟馬代無異。不過,一條魚都見唔到,美中不足。


駐場嘅瑜伽導師,在泳池旁有個專門用來練瑜伽嘅位置,但如果你要求去沙灘練,一樣無問題。


$4,859起  3晚住宿連機票

有用資料:
簽證:持 BNO或特區護照均需簽證,單次出入境簽證須時兩個工作天,費用為$640。另亦可上網登記落地簽證,詳情可登入 http://www.visa-vietnam.org 。查詢: 2591 4517/越南駐港總領事館
機票:乘坐越南航空來回香港及芽莊,可經胡志明市或河內轉機,經濟客位由$1,750起。查詢: 2810 6680,網址: http://www.vietnamairlines.com 
套票:可以透過 Flight Centre訂購機票連酒店套票,於 9月 1日至 10月 29日出發,$4,859起包括乘坐越南航空經濟客位經胡志明市來回香港及芽莊,及 3晚 Fusion Resort Nha Trang連每日早餐。於 9月 1至 29日出發,$6,199起包以上機票及住宿外,另包胡志明 Caravelle Saigon住宿兩晚。詳情可前往 Flight Centre中環擺花街、灣仔或跑馬地分店查詢,亦可致電 2830 2868及登上 http://www.flightcentre.com.hk 了解更多。
貨幣: 1港元約兌 2800越南盾(文中價錢為港元)
鳴謝:越南航空

撰文:方俊傑
攝影:、攝錄:譚俊軒
模特兒: Alia Cheung
mailto:hotpot@nextmedia.com

tvb4life 發表在 痞客邦 留言(0) 人氣()