Dream Car

百萬中置獸  Lotus Exige S& Alfa Romeo 4C

Ads by Google

想玩中置引擎跑車,感受一下引擎聲由背部傳嚟嘅滋味,係咪只得車價動輒 250萬以上嘅 supercar?又唔係嘅,半價 110萬都可以有部同樣快得驚人、內外都高收視嘅中置引擎跑車仔,而且比貴成倍嘅 supercar更具原始駕駛風味!講緊係剛剛由代理引入本港嘅 Alfa Romeo 4C,同埋追加自動波版本嘅 Lotus Exige S。兩部車都係市場罕有百萬身價中置引擎跑車,比同級多人追捧嘅 Porsche Cayman S更重口味,有冇膽量試吓?

中置引擎從來都有種無形嘅魔力,好似逄係中置引擎嘅車都係勁車咁,就算用普通引擎,操控功架都與別不同。 4C可以話係 Alfa Romeo近年最具話題作品,根本係縮水 8C,而且注入大量高科技,單係碳纖底盤已經連法拉利都冇!而出咗 15年都只得手波版嘅 Lotus Exige S,今年就追加自動波版,擺明係要更平易近人搶客。




筆者個人就比較 buy Exige S嘅車頭, 4C最大敗筆係頭燈加咗燈罩。


4C(左)車身比 Exige S短小但因為用上圓渾車身線條,望落更肥大。


4C(左)嘅車尾設計比 Exige S更花心思,尤其底部擾流板同尾喉佈局美觀。 單睇外表都知堅

Supercar絕對有樣睇,而 4C同 Exige S都係最正宗中置引擎雙座位跑車,基本格局同 supercar冇分別, 4C更加起用大量弧形線條,而且鮮紅色車身同尖銳嘅車頭好襯, supercar感覺比 Exige S更濃。不過筆者覺得碳纖罩頭燈實在多此一舉,配上後非常突兀,如用返傳統大燈組合,會更順眼。
比 4C長 63mm嘅 Exige S,因為外觀上用咗較畢直嘅線條而好似大足一個碼,車身比例亦好睇啲。而且用傳統頭燈,再配合頭冚同泵把大型入風口,更易接受,簡單講即係比 4C更順眼。當然,以新鮮感而論, 4C會吸引啲,畢竟 Lotus玩中置引擎跑車係家常便飯, Alfa Romeo就罕得多!




現行嘅 Lotus Exige S喺 2012年推出,已經係第 3代,所以頭燈都加咗大熱 LED日行燈。


因為 Exige S屬車系中頂級型號,所以包圍都勁啲,尾翼十足賽車咁款。


細細架車都用 17吋軨,再加上 4-pot前卡鉗配鑽孔碟,制動力同貴價 supercar有得比。


4C碳纖頭燈內藏 5粒 LED細燈、大燈同指揮燈,造型非常複雜,完全唔襯咁有線條美嘅車身。


向後斜嘅車頂線條靚絕,車門仲有導風骨位引入生風到車尾入風口冷卻引擎。


雖然同 Exige一樣配 Pirelli P-Zero胎,但 4C用更大嘅 18吋傳統菊花軨,令操控性更穩定。 兩種唔同輕底盤

雖然兩部車車價都係接近 110萬,亦都強調原始駕駛風味,但兩間車廠用咗完全唔同嘅方法去演繹。首先 4C破天荒自家發展出一個集輕量與堅硬於一身嘅碳纖底盤,就好似一個碳纖浴缸咁承住駕駛者,市面上只有 McLaren車系採用相同設計,威到不得了! Exige S就唔使多介紹,當然用返以特殊膠水及窩釘組合嘅鋁合金底盤,車內地台都清晰可見。
得到碳纖底盤同大幅度輕量化恩惠, 4C車重只有 895kg!只係得半部小型 7人車咁重!而 Exige S就因為配上較重嘅 V6引擎而有 1,182kg,雖然比 4C重,但輸出更大,算係抵消咗。




4C車廂算幾豪華,皮革同塑料交替而成,望落都唔會好 cheap。


4C用上半部有防滑猄皮嘅賽車式平底軑盤,兩幅式設計極之有型。


碳纖底盤其實都係車廂主要裝飾之一,毫無遮擋下暴露於地台上。


4C底盤由一體化碳纖製成,再加上前後鋁合金車架。


因為 4C中控台冇波棍,只用按掣選擇波檔,所以升降檔全靠軚盤+/-波掣。


原裝音響設有彩色 mon.仔,有埋聲控同免提功能。


油門腳踏就有斜度,但 brake腳踏就好似賽車咁接近垂直,踩 brake時要慢慢習慣。


中控台冇首飾箱,所以 4C座椅後面中間加咗個有鎖嘅暗格補數。


4C嘅座位當然冇電動調校,但有得校背部角度已經十分難得。 豪華簡潔兩極化

其實兩款車都好忠於車廠嘅造車風格, 4C雖然話就話有原始風味,但 Alfa始終係民用車大廠,所以乘客一樣可以舒適乘坐,全因車內設備、陳設都同一貫 Alfa相似,適量真皮裝飾加塑料、原廠車機、電動倒後鏡,仲要有埋彩色 Mon.表板,以原始感跑車嚟講簡直係豪華!
而由手波改為自動波嘅 Exige S,就只係喺原有波棍台上加咗幾個轉波按掣,仍然係極之原始。雖然 Exige S貴為車系頂級型號,但中控台上都係只得 3個冷氣掣,表板都係原始指針式,軚盤直徑比 4C更細、更普通,連倒後鏡都係手動,幾乎可以用「家徒四壁」嚟形容!相信世界上冇乜幾多款車價過百萬嘅車可以齋成咁!




車廂一貫「 Lotus式」簡約,根本只係滿足基本需要而設,原始跑車嘛!


Exige S軚盤設計平平無奇,勝在銀色轉波拉桿大啲同靚仔啲。


Exige S地台可以見到簡單鋁合金用料同膠水外露。


Exige S用鋁合金底盤,為咗輕量化,只以膠水同窩釘接合。


表板款式同樣簡單到不得了,連轉數紅區都冇,但速度高達 300km/h!


雖然係 sell原始,但頂級嘅 Exige S都有 DPM( Dynamic Performance Management)電子巡跡控制系統輔助,不過就用扭掣畀你調校介入程度。


Exige S座位真正 hardcore!背部角度冇得郁之餘,仲預埋你裝賽車安全帶。 狂暴表現似超跑

中置引擎只係兩部車唯一關聯,其實細節佈局完全唔同。 4C配 240匹、 1.8公升直四 turbo引擎;而頂級嘅 Exige S型號就配排氣量大成倍嘅 345匹、 3.5公升 V6 supercharged引擎,兩車嘅 0-100km/h加速分別係 4.5秒同 3.9秒。數值上 Exige S可謂完勝,不過講到好玩,其實不相伯仲。因為 4C嘅 turbo引擎有輕微 turbo lag,加上 6速雙離合器波箱同表現進取嘅 d.n.a.行車模式,令每次轉波都有強烈推背感,官能刺激比 Exige S更強!




4C用嘅 1.8公升 turbo引擎其實唔係咩勁嘢,揭背車 Giulietta都用, 240匹同 34.7kgm輸出亦一樣,不過配喺輕成 425kg嘅 4C身上, 0-100km/h就快咗 2.3秒, 4.5秒就完成!


4C冇波棍,只用 4粒掣選擇手動、自動、空波、 1波同後波。


Alfa嘅 dna系統有 3個駕駛模式, Normal同 All Weather模式駕駛感分別唔大,但 Dynamic模式就會激進好多。


4C表板係用大 mon.模擬顯示出嚟, Normal模式下表板係黑色底。


All Weather模式會加大電子輔助系統介入,以應付惡劣路面,表板底色會轉為藍色。


4C轉換成 dynamic模式後,表板會變成紅色底及多出增壓表及油溫表。


Exige S自動波版只係除去咗波棍,喺相同位置加咗 P、 R、 N、 D四粒掣選擇波檔。


Lotus喺 Toyota生產嘅 3.5公升 V6引擎上面,加咗大大舊 supercharger增壓,令馬力暴增至 345匹,成為 Exige S最強型號嘅心臟。

而今次拍攝呢部自動波版本 Exige S,其實 6速自動波箱同引擎一樣都係來自 Toyota,就算 Lotus調校得幾激進,表現始終都係較順滑自然,加上 supercharge增壓系統輸出比 turbo線性,速度係快,但加速感都唔及 4C咁戲劇性。
操控方面,由於兩車都冇轉向動力輔助,所以軚感傳遞得極之直接,路上所有細微凹凸不平都傳到手心上。筆者會較欣賞 Exige S嘅駕駛感,因為加速線性、懸掛反應快得嚟唔算好扽。相反 4C就比較難駕馭,尤其高速過氹位時,懸掛吸震力唔夠柔韌,有改進空間。







Alfa Romeo 4C


雖然都係中置引擎佈局,但排氣量、汽缸數目以至增壓方式都唔同。

引擎: 1,742c.c.直四 turbo
馬力: 240hp/6,000rpm
扭力: 35.7kgm/2,100-3,750rpm
傳動: 6前速自動、附+/-模式
懸掛:前雙搖臂、後支柱
制動:前、後鑽孔透氣碟
車身: 3,989 X 1,864 X 1,183( mm)
車重: 895kg
0-100 km/h: 4.5秒
車價:$1,098,000起
查詢: Swire Motors( 2960 9288)

Lotus Exige S

引擎: 3,456c.c. V6 supercharged
馬力: 345hp/7,000rpm
扭力: 40.8kgm/4,500rpm
傳動: 6前速自動、附+/-模式
懸掛:前、後雙搖臂
制動:前、後鑽孔透氣碟
車身: 4,052 X 1,802 X 1,153( mm)
車重: 1,182kg
0-100 km/h: 3.9秒
車價:$1,080,000起
查詢: Richburg Lotus( 2877 0810)

上一級碳纖底盤要 400萬

可能有人覺得 4C用 1.8公升 turbo引擎咁普通都賣 110萬好唔抵,但其實全車最值錢嘅係個好似浴缸咁嘅碳纖底盤,世上冇幾多架車會用到!除咗 4C之外,用同類碳纖底盤嘅 supercar最平已經係 McLaren 625C,身價高達$3,998,000!當然 625匹馬力同 3.1秒 0-100km/h勁好多,但𠵱家用 110萬買部 4C就玩到碳纖底盤,已經好抵啦!

同級最 hit係波子

110萬左右嘅中置引擎雙座位入門超跑市場,一向都係 Porsche Cayman車系嘅天下,唔只品牌威、性能堅、設備齊,仲有唔同價位型號選擇。最平嘅 275匹 Cayman只賣$895,000,中級嘅 325匹 Cayman S售價亦只係同今次兩款差唔多嘅$1,079,000,但 4.7秒 0-100km/h就唔夠 4C同 Exige S快。

撰文:袁國基
攝影:葉偉豪

文章標籤

全站熱搜

tvb4life 發表在 痞客邦 留言(0) 人氣()