星期日,「野餐媽媽」 Phoebe(左一)一家大細去中山紀念公園玩,順利泊車之餘,草地空曠到可以打高爾夫球!

親壹親

暑假 7大特色公園遊

Ads by Google

暑假一連放個幾月,細路當然開心,但阿爸阿媽就最頭痕,究竟可以點打發時間?其實識揀,簡簡單單去公園,已經可以消磨大半日,而且低消費!今次聯同兩個極鍾意去公園的家庭一起精挑細選,針對喜歡野餐、玩水、追求異國風情等不同喜好的家長,推介心水公園。

「揀野餐地點除了草地夠大夠靚,周圍配套亦好重要,例如考慮交通是否方便、易不易找到泊車位。」媽媽 Phoebe說。她熱愛野餐的程度,連囝囝的同學都會為她「起朵」叫「野餐姨姨」!

市區搵少人草地野餐


Phoebe說,野餐會帶小朋友喜歡的簡單小食。天氣炎熱為免食物變壞,攜帶時可將食物存放在冰袋或手提小冰櫃。

「野餐姨姨」帶住一對五歲的孖仔 Matthias、 Matthew,試勻港、九、新界多個公園,當中有兩個野餐勝地會不斷「翻兜」再去,分別是科技大學的草地和中山紀念公園,除了草地又大又靚,重點是人流不多,亦易找到泊車位。「近年大家都鍾意去佐敦谷公園野餐,星期六、日去好煩,次次都要爸爸留在車上等車位,通常等一小時才等到!草地又多人得好恐怖,想搵個位開餐都好難。」
這個星期日,「野餐姨姨」再度去中山紀念公園野餐。爸爸 Angus好快已在公園旁的露天停車場泊好車,走去大草地上找了個樹蔭位,開帳篷、鋪地蓆,還帶了個玩具龍門來準備踢球。媽媽 Phoebe在車上幫一對孖仔搽好防曬用品,就帶着一袋二袋食物、玩具去草地會合爸爸。草地位於公園中央,一邊是市區建築群,一邊是海景,風景很美。

玩波吹泡最適合


平時出街怕整濕地下,好少有機會玩泡泡槍, Matthias(左)和 Matthew(右)難得去草地,就把握機會盡情玩。

「原先想煮雞翼帶來食,不過今日太熱怕變壞,所以帶簡單的食物,而且要放在冰袋內。」她預備了生果串、菠蘿腸仔、魚蛋和燒賣,「兩個仔成日郁來郁去,相比起在餐廳坐定定食,他們更鍾意野餐,可以食得比較隨意,又可以在草地跑,這兒又成日有船和直升機經過,他們好鍾意睇。而草地亦好適合玩泡泡玩具,因為平時好難在石屎地上玩,會玩到地下濕晒,怕跣親其他人。」難怪「野餐姨姨」有各種各樣的泡泡玩具,包括泡泡槍、大型泡泡劍、電動泡泡船等。

新開公園不好玩

近期有三個新公園特別受注目,不過「野餐姨姨」去過覺得「無料到」,「啟德郵輪碼頭公園簡直『 N不准』,不准玩球類活動、不准踩單車,好多活動都禁止,而且草地不太靚;調景嶺的香港單車館公園我未試過野餐,但遊樂場設施不吸引,而且長期多人,每玩一樣都要排長龍;觀塘海濱公園的草地面積好細,不太舒服,而且每樣遊樂設施相隔太遠,很不方便,設施雖然幾新穎但不太好玩,沒有滑梯、韆鞦玩,是一些用來鍛鍊肌肉的設施,其實大多數新式的公園遊樂場都是如此。」

中山紀念公園

「搭車族」點去?
鄰近西營盤站 A2出口,步行約 5分鐘就到。

「自駕族」點泊車?
公園鄰近露天停車場,車位不少,假日都易搵位。

配套設施
•草地•兒童遊樂場•海濱長廊•體育館、室內游泳池•紀念孫中山的雕塑等

話你知

康文署網頁有提供港、九、新界三十多個公園的資料,包括各個公園的開放時間、歷史、公園特色、設施等資料,值得參考。
網址: http://www.lcsd.gov.hk 
keyword:「康樂」>「康樂設施」>「公園及動植物公園」

遠離繁囂濕身之旅

嫌郊野公園太遠,但又想遠離嘈雜的市區, Megan就幫到你。家住屯門的 Megan不喜歡鬧市,平日鍾意帶住兩歲半的子桓(花名叫「魚子醬」)遠離繁囂,進軍大嶼山,她尤其鍾意去迪欣湖。「迪欣湖的遊樂場有得玩水,同時亦有草地,玩完可以野餐!」果然,公園的遊樂設施以船為主題,場內亦有噴泉供小朋友玩,「魚子醬」帶了一些沙灘玩具去玩,玩到全身濕透。如果小朋友足三歲,仲可以在人工湖玩腳踏船。
換了套新衫,兩母子去到草地野餐,「這兒草地夠多,不只集中在一處,我通常會揀對住個人工湖的位置野餐,好舒服,心曠神怡。」簡單的粟米粒、小蛋糕、迷你公仔三文治,足以餵飽「魚子醬」,吃飽後起身周圍跑,又再次成身濕! Megan提醒各位媽媽,記得幫小朋友帶定兩三套衫仔替換。「家長成日覺得『依家天氣熱到嘔,點出街?』但只要不覺得熱是一回事,就可以去好多地方玩。」




對小朋友來說,迪欣湖的遊樂場最吸引之處就是地上的噴泉,所以兩歲半的「魚子醬」帶齊沙灘玩具來玩,玩到全身濕透。


Megan預備了簡單的小食,同囝囝「魚子醬」來個湖邊野餐。 迪欣湖活動中心

「搭車族」點去?
迪士尼站下車再步行 15分鐘或轉乘穿梭巴士 R8;乘巴士到青嶼收費廣場,再轉乘穿梭巴士 R8

「自駕族」點泊車?
迪欣湖附近有小量車位;若找不到車位可考慮停泊在迪士尼樂園停車場,但需要步行一段時間。

配套設施
•草地•兒童遊樂場、噴泉
•場內唯一的小食店是 7-ELEVEN
•提供腳踏車、腳踏船出租服務(早上 10時至下午 5時)

異國風情沙上遊樂場


愉景灣大白灣沙灘的盡頭,有個建在沙灘上的遊樂場,玩沙玩水之外,仲有滑梯玩,令 Megan和囝囝異常興奮。

追求異國風情的話, Megan推介去愉景灣大白灣沙灘,因為沙灘盡頭,居然有個小型遊樂場。她說:「我印象中香港無乜沙灘有遊樂場,所以這兒好特別,小朋友玩沙、玩水之餘,仲可以玩滑梯、攀爬架。」
「魚子醬」急不及待拉住媽媽說要玩韆鞦, Megan笑說:「海邊盪韆鞦,好浪漫!」韆鞦架背後剛好有兩排高大的樹木構成一條林蔭小路,甚有異國風情。玩了成個下午,周圍都是外籍小朋友,差點以為自己去了外國旅行。日落時分,還有一堆在附近居住的外籍家長和小朋友,在沙灘旁的木枱、木櫈開生日會,還在欄杆繫上氣球,非常熱鬧。

愉景灣大白灣沙灘

「搭車族」點去?
中環 3號碼頭乘渡輪,或在東涌港鐵站乘搭巴士 DB01R、欣澳港鐵站乘搭巴士 DB03R等。

「自駕族」點泊車?
駕車人士可在東涌東薈城或欣澳港鐵站對出露天停車場泊車,然後轉乘巴士前往愉景灣。

配套設施
•沙灘盡頭設兒童遊樂設施,附近亦設更衣室及淋浴設施。
•臨海 D'Deck有不少食肆
•指定月份的第二個週日( 8月 9日、 9月 13日、 10月 11日等),設「愉景灣週日露天市集」,賣特別的手作、有機產品和優質家具。
•玩完沙灘「未夠喉」,可乘免費穿梭巴士去愉景北商場的 playhouse
「 Discovery Land歷奇王國」玩。

五臟俱全市區大公園

放風箏、野餐、踩單車不一定要去郊野公園,交通方便的市區公園一樣做到,兼且周圍有商場、圖書館、泳池、租單車店鋪等配套,要消磨一日話咁易。針對不同類型活動,推介以下公園:

「動中帶靜」型
寶康公園
交通:寶琳站 B2出口步行約 5分鐘。
公園特色:公園有近 10種適合 5至 12歲不同年齡小朋友的遊樂設施,單是韆鞦已有 3款,亦有滾軸溜冰場及各式球場等。
周圍配套:附近還有游泳池、體育館、圖書館,亦鄰近新都城商場,適合家長安排一天活動,動、靜態活動皆有。

「一雞幾味」型
馬鞍山公園
交通:馬鞍山站 A1出口步行約 10分鐘
公園特色:公園位於吐露港海濱,亦可遠眺八仙嶺,景色優美。園內有適合野餐的大草地、兒童遊樂場、大型歷奇迷宮。玩完想細路有知識袋落袋,園內亦有一個介紹馬鞍山採礦歷史、採礦工具的有趣展覽。
周圍配套:玩完公園「未夠喉」,仲可沿海濱長廊步行至烏溪沙碼頭的海灘遊玩,順便觀賞一位吳伯用沙灘石頭堆砌的心形石「海之心」。




蒲崗村道公園可滿足一家不同年齡、技術程度的單車友。高架單車徑(灰色)適合大人挑戰,小朋友則可玩適合初級者的單車徑(橙色)。(圖片由康文署提供)

「一家踩車」型
蒲崗村道公園
交通:鑽石山站 A1出口步行 15分鐘,或轉乘小巴 19M。
公園特色:專為單車愛好者而設,園內有一條約一公里長的高架單車徑、適合初學者及小朋友的單車園地,亦有極限運動場,適合不同年齡、技術水平的單車友。公園設有單車租賃亭。
周圍配套:附近有荷里活廣場、鳳德商場,踩完一日車可去商場歎冷氣和醫肚。

「風箏野餐」型
大埔海濱公園
交通:大埔墟站 B出口步行三十分鐘,或轉乘巴士 71K。
公園特色:公園內的小食亭有風箏賣,不少人會直接買來在草地上放風箏;亦可登上回歸紀念塔睇風景或參觀昆蟲館。
周圍配套:大埔墟站附近有租單車的店鋪,一家大細可沿路踩至大埔海濱公園,難度較低。

話你知

暑假是本港經常打風落雨的季節,所以家長要預先計劃雨天行程,否則小朋友忽然無得出街玩會覺得掃興。由家長自發建立的網上平台 ohmykids搜羅了港、九、新界室內遊樂場的資料,為家長提供靈感。
網址: http://www.ohmykids.org 
keyword:「 Product Review」>「 Play Room室內遊樂場」

撰文:吳穎湘
攝影:于港民、關永浩
mailto:features@nextmedia.com

    全站熱搜

    tvb4life 發表在 痞客邦 留言(0) 人氣()