On Sandra藍色綴拉鏈短袖上衣$9,100啡色彈性羊毛裙褲$14,000白色尖頭鞋$5,900All from CélineOn Anthony紫紅織花毛衣售價待定黑色西褲售價待定黑色皮鞋$5,415All from Dunhill

Cover Story

舞台看人生 吳君如 黃秋生

Ads by Google

「舞台劇即是在舞台上呈現的戲劇。」「話劇比其他戲劇形式更接近真實生活。」(摘錄自中國百科在線)
人生舞台,正正就是這樣。把社會實況,以輕鬆手法,搞笑形色,諷刺時弊,看的開心,演的過癮。
最近吳君如( Sandra)和黃秋生( Anthony)首次跟甄詠蓓、潘燦良等神級舞台劇演員合作《狂揪夫妻》,表面看似輕輕鬆鬆的實況話劇,其實深藏着現代社會最人性的一面,最現實和所謂最文明的社會狀況。
當舞台劇初哥遇上老鬼,劇未上演,不如先來看看他們這對舞台夫妻的真情剖白!

啱啱遇着剛剛


On Sandra藍色格仔流蘇上衣$17,000黑白色百褶裙$17,000Both from Proenza Schouler

人夾人,人夾戲,依照這條方程式計算,好明顯,吳君如同黃秋生是最夾的一對。眾所周知二人私下老友鬼鬼,所以,今次首次合演舞台劇,我已單方面認定了是講心多過講金。

吳君如:係貪得意,其實都係啱啱遇着剛剛。如果有其他劇團搵我,我都唔會話一定推。今次剛好遇上好劇目,加上有黃秋生,甄詠蓓同潘燦良,我覺得無論時間、人腳、劇本等各方面都好好我先接。呢行個個都 friend,唔通個個叫我做我都做咩!其實我都無 5秒就 KO佢吖!有時候就算 friend都好,唔鍾意做就唔鍾意,尤其是做呢一行咁多年,有時候有啲朋友都唔好意思開口問,明知我有啲都唔會再做。
因為我之前都有睇過波蘭斯基拍呢套戲,係陳可辛推薦我睇,又係一個巧合。其實之前黃秋生都有訂過另一套戲俾我睇,但我覺得唔得。其實劇團都周圍搵過唔同劇目,但今次呢套劇實在太好,波蘭斯基翻拍過, 2009年百老匯又上演過,總之呢套劇一定好好,所以我都好想試試。

黃秋生:原本第一次嗰個劇本只得我同佢兩個人,但因為劇本唔啱,所以再搵過另外一個劇本,結果就變咗四個人,就係咁樣開始。所以都唔係搵咗套劇先搵君如演,而係之前 turn down咗一個劇本,嗰時已經搵咗佢去演,跟住再搵到另一個劇本,覺得啱做喎,但係就要多兩個人,就咁開始咗呢套新劇。好彩上次嗰個劇本唔啱,如果唔係兩個人都幾辛苦。

吳君如:其實開頭 OK,但去去吓開始無以為計。

黃秋生:半場之後就唔得啦。其實我無諗咁多,最主要係有劇本你就攞嚟,全世界劇本有好多,我自己一個唔會睇得晒,佢哋有劇本就攞嚟俾我。我但求第一唔好咁複雜,兩、三個人搞掂,投資唔好好似上
次咁,件事唔好咁「頭大」,最緊要係開開心心,上次好 heavy。我覺得今次開開心心,無論劇團,我自己以至社會都好,我都希望開開心心。

認真你便笑了


On Anthony黑色 tee Stylist's own深藍色西裝褸$11,100黑色西褲售價待定黑色亮皮 loafer$5,415All from Dunhill

話劇改名為《狂揪夫妻》,名字搞笑,以為是胡鬧劇?查實認真看,細心想,你會發現這劇其實是反映人性、社會、現實、善與惡、真與假的啟示錄。笑中帶着反思,對白句句精警絕核,「 message」滿場飛,就連兩位老戲骨都覺得好有挑戰性。

黃秋生:我係飾演一個「和稀泥」嘅角色,把口成日講住「和諧,大家好,唔好嘈,唔好嗌」,表面和善嘅小男人。其他角色虛偽、偏執、自我中心,香港就算無 90%,都有 75%嘅人有以上嘅人格,所以人人都會有共鳴。

吳君如:我演嘅角色,永遠覺得自己好文明,呢個世界都好文明,咩都要講得清清楚楚,咩都要用佢嗰套價值觀。又鍾意研究藝術,因為藝術可以平衡自己心態,但可能對方就只係顧住搵食,唔理人死活,只係一味求發達。四個人,有底嘅一面,表面嘅一面,人人都有十幾面,所以每一句對白都可以令人有共鳴,夫妻關係都係一樣,兩公婆以為好合拍,一唱一和,但就因為一件事,突然間叮一聲先發現,「咦!乜你原來咁嘅睇法,你唔係撐我㗎?原來你一路都咁唔滿意我?」原本我嘅角色係想將老公改造得高級一點,將佢變成知識分子,點知老公俾個老婆撩吓撩吓火咗,表態自己其實係草根!而最有共鳴係講電話,好好笑,個老公不停用電話傾生意,都唔知點解一個電話可以搞出咁多事情,佢因為傾生意, 24小時都拎住個電話,就好似依家好多人講電話講到連一秒鐘都唔想停咁。大家約出嚟食飯又睇電話,我自己有陣時坐車都睇電話。無可否認依家個世界真係充滿娛樂性, facebook呀,互聯網呀,真係好有娛樂性。以前拍戲,去一個 location坐車坐足四個鐘,依家,好似四個鐘都唔使,你會覺得好驚,因為你有個手提電話在手。

黃秋生:我覺得呢套戲係講人性。

吳君如:啲對白好抵死,好密集。

黃秋生:啲對白真係難記,唔好以為係一句半句絮嘴。要度吓點樣翻譯啲字眼先可以講得順啲,同似番我哋平時講嘢咁,唔係純粹翻譯劇。

吳君如:我依家每日都拎住劇本,坐車又噏兩句。

是舞台劇不是鬧劇


On Sandra藍黑色羊毛大衣$54,800蔚藍色針織背心$8,200藍黑色西褲$8,800綴橫間雙面羊毛圍巾$15,400All from HermèsOn Anthony啡色 trench coat售價待定藍色格仔短外套售價待定黑色西褲售價待定All from Dunhill

舞台劇,講節奏,無 take 2,仲要講 taste。何謂 taste?何謂真正的舞台劇?聽聽兩位演技派有何高見!

黃秋生:其實演舞台劇係洗滌心靈。

吳君如:今次係我第一次真真正正咁演舞台劇。

黃秋生:佢以前做過《花心大丈夫》啦,嗰啲舞台劇我都做過,我都知係咩嘅一回事,嗰啲只係一個「 put it all on show」,即係一班明星背吓台詞,開咗位,嘻嘻哈哈咁。

吳君如:其實都唔求其,嗰陣時都有杜琪峯排戲。

黃秋生:佢會覺得咁樣就叫做認真咁排,但其實以舞台劇嚟講,嗰啲係唔適合舞台嘅。

吳君如:今次我就係鍾意佢哋好多事都好認真。其實真係好難講,呢個關乎到 taste嘅問題,個 taste要調校到啱啱好,又唔會曲高和寡,又會唔好 commercial到一人彈一句,好 snap stick嘅戲,調校到啱啱好。我覺得佢哋攞得個平衡好好。唔會令觀眾感覺好翳悶,又唔知道講緊咩但又要扮明,亦非嗰種睇完出嚟唔記得晒,得啖笑。我覺得佢哋將個 taste
調校到好啱數。加上因為今次個劇本好完整,就算有少少甩漏都唔會太差。就好似你去睇大型 show《 Lion King》、《 Sound of the Music》,你已經知道晒個故事,故事已經好完整,歌又好聽,所以就算演員未必演得好出神入化但你都會覺得好好睇。所以我覺得今次呢個劇本有着數,差極有限。即係劇本完整,你跟足去演都唔會差得去邊。

黃秋生:如果以我 standard嚟講,我擺到好高。依家最擔心夠唔夠時間做,如果可以跟住 schedule背晒劇本,開晒咁多位,仲有一個月時間執戲就得。但後面好難,有太多要配合嘅細節,呢個做緊呢樣,嗰個又掟嘢,另一個又要避開嗰樣嘢,好多技術上嘅嘢,就好似一個馬戲團咁,呢個真係好難。

幾難都好,想必難不倒兩位好戲之人吧!

撰文:黃婉冰
形象:區永欣、蘇韻詩
攝影: Simon C 
化妝: Arris Law
髮型: Seiko Sin@Hip Hair Culture
場地提供: Emax
mailto:nextplusone@nextmedia.com

2015年07月16日



Cover Look

 

愛鬥戲

 

吳君如,搞笑天后;黃秋生,演得之人,兩個第一次合演舞台劇飾演夫妻,舞台上鬥嘴打交兼而有之,未睇先興奮。第一次,壓力少不免,尤其是自言第一次演出「真正」舞台劇的君如,「感覺好攰,壓力一定有。拍電影還可以控制某些事情,你知啦,黃秋生又好鬼有主見,潘燦良已經是舞台界王子、老戲骨,又有甄詠蓓做導演,對住他們三個又點會無壓力?什麼盲拳打死老師傅,我又覺得未必,現在的壓力主要是來自還未摸清應該如何去演。」另一男主角秋生則有另一種體會,「做舞台劇,時間比拍電影長,兩個人對足兩個鐘,互動溝通,研究劇本、演戲、交流,一定會比電影多好多。」
觀乎兩位在鏡頭後你一言我一語,扮鬼扮馬,合拍又抵死,絕對是另類精彩!

Behind the Scene

 
















撰文:黃婉冰
攝影:黃婉冰
mailto:nextplusone@nextmedia.com

    全站熱搜

    tvb4life 發表在 痞客邦 留言(0) 人氣()