寵物家

寵物酒店 Check In

 

Ads by Google

暑假係旅遊業旺季,酒店房爆晒,講緊係寵物酒店呀!
個個主人都出門,屋企嘅狗仔貓仔倉鼠都要搵酒店。
入住酒店可唔可以 order room service,餐餐食烚雞柳?有冇得出外自由活動?
同其他狗狗鄰居隔開啲又得唔得?
為免大家成為問題多多的「怪獸主人」,不如為寵物搵酒店前先了解吓有咩需要注意啦!

酒店都講動物權益

自己外出旅行,當然不能就此丟下動物獨自在家中,但餵食、執屎、放狗等工作不是個個朋友喜歡做,無理由次次都麻煩人。搵一間持牌寵物酒店,有專人看管,餐餐定時,放心得多。最緊要地方夠闊落,有空間俾狗狗跑步伸懶腰。位於荃灣工廠大廈,共有室內和室外兩層,每層五千呎大的 Doggie Kingdom,狗狗就日日都可以玩到飽。
酒店房間分三種,有適合兩隻大狗或三隻小狗同住的 famaily suit、適合大狗的 deluxe room和適合小狗的上下格房 standard room。狗狗住酒店難免長時間要留在房中,有合適的活動空間非常重要,同樣有養狗的店主 Chris就試過在這方面和客人有不同意見。「有客人帶隻大狗來,但想入住分上下格房的標準房。我覺得這房的高度不夠大狗伸展,最後談不成,只好建議他幫襯其他酒店。動物的權益好重要㗎!呢個都係我開店嘅原因,希望狗狗在市區都有個舒服寬敞的環境活動。」




Doggie Kingdom分三種大小的房間, Chris建議大狗不要住上下格的標準房,活動空間太細,有礙伸展。


自備有主人氣味的衣物和玩具,會令狗狗更安心。


酒店內裝有殺菌除臭空氣清新機,咁多狗仔一齊住都唔覺大朕味。 狗狗也 social

將狗狗放到寵物酒店,牠們會否很悶?其實,好多主人寧願狗狗只留在房內,都不願讓牠接觸其他狗,除了怕發生意外,主要原因是平日主人也沒有帶狗狗散步的習慣。「如果狗狗只係留宿數日也沒所謂,但如果留宿數星期,我都會建議主人讓狗狗有 social life,讓狗狗學識點樣同其他狗相處。有客人話佢隻狗狗嚟住完後,大膽咗,去到狗公園會敢同其他狗玩。」
要狗狗學識 social,有專業的馴犬師在旁指導,狗主就可以放心喇。 Thomas是駐場馴犬師,會負責部分狗狗的散步時間, Thomas會先為狗狗上頸繩,以策安全。狗狗會先互聞屁股,熟悉對方的氣味。 Thomas指除非兩隻狗特別夾不來會大打出手才需要分開放,否則無論大狗和細狗,都可以一齊玩。




狗狗了解對方靠互聞屁股,大狗和小狗都可以一齊玩。


想狗狗接觸吓其他狗,但又怕牠們打交?有馴犬師 Thomas在場維持秩序就安心得多。


職員會每日定時餵食,如狗狗有特別進餐要求,職員亦會盡量安排。 入住前要打齊針

現代人當自己的寵物是心肝寶貝,平日食好住好,當然會着緊牠們住酒店時的待遇。有時, Chris都會收到一些狗主過分緊張的要求,例如有客人指自己的狗狗只吃烚雞柳,否則寧願不吃。「我唯有解釋我哋無辦法做到,建議可以自備罐頭,令狗狗盡量食得新鮮。其實狗狗在陌生環境,無得嗲主人,通常都會乖乖就範。」
入住的狗狗需要已植入晶片、打齊針,還要帶備針卡,另外入住前職員會要求客人填寫一份問卷,詳細寫明狗狗的飲食次數、分量,還有牠們心愛的活動、玩具等。「我哋有提供乾糧,但為免狗狗轉糧而引入敏感、肚瀉,狗主最好自備狗狗食開的糧。另外亦建議狗主將狗狗用開的床仔、被鋪、玩具帶來,物件上的熟悉氣味,有助狗狗在陌生環境中感到安心。」




酒店上層還有個五千呎的天台,狗狗每日有三次、每次半小時的散步時間,不過夏天太熱,職員會在黃昏時候才放狗。


細狗可在室內位置活動。


想狗狗多做運動?酒店仲有恒溫游泳池,狗狗落水前最好先著救生衣,安全啲嘛!





狗狗 check out那天,酒店會免費提供一次美容服務,讓狗狗香噴噴地回家。

Doggie Kingdom
地址:荃灣柴灣角街 29-33號 2樓
查詢: 36283530/ http://www.doggiekingdom.com.hk/ 
收費:按房間種類收費,約$300-$800/日

兔仔倉鼠專門酒店


每日有十五至三十分鐘的自由活動時間,兔仔一出籠就周圍探索。

市面上貓狗酒店比較多,但如果養的是兔仔、倉鼠、龍貓,咁點好?動物嗅覺靈敏,俾貓聞到有鼠類,可能會好危險,絕對不能同住!好彩有人特別喜歡嚙齒科和兔類動物,更加為了牠們而開專門的「 Ro-la小小動物民宿」,好讓動物住得安心。

每日出籠半小時

嚙齒動物可以一整天只吃乾草和不停地便便,職員一早回來就要清理好籠中的便便,消毒及換上新的乾草作鋪墊。酒店提供所有小動物所需的底料、食物、零食、水樽等,不過職員亦建議各位主人可以自備用品和玩具,熟悉的氣味會令動物感到安心。雖然嚙齒動物可全日也留在籠中,但職員也會每日放牠們出來十五至三十分鐘跑動伸展一下。




倉鼠都係入住的旅客之一,相對兔仔、龍貓所需要的照顧較少,職員只需每隔兩三日為牠們換新的底料。





雖然每日都有新鮮菜當零食,但食得太多易肚瀉,要適可而止。


職員 Bowie每日都會為動物拍照,再傳給寵物主人。

Ro-La The Pet Hotel
地址:觀塘駿業里 10號業運工業大廈 6樓 E1室
查詢: 36908217/http://www.ro-la.com/ 
收費:按動物種類收費,約$15-58/日

撰文:吳韻菁
攝影:梁炳權
攝錄:胡春暉
mailto:hotpot@nextmedia.com

全站熱搜

tvb4life 發表在 痞客邦 留言(0) 人氣()