時代廣場舉行「武士學堂」活動,等小朋友可以一嘗做小武士嘅滋味,最吸引係費用全免,上 facebook登記就可以,不過額滿即止!

太爛玩

星戰迷 學做絕地武士

Ads by Google

《星球大戰》喺香港有好多 fans,今年時代廣場將會有大型星戰活動,最近喺網上仲可以見到李治廷扮成絕地武士嘅宣傳片,係咪好有型呢?
想睇大型星戰 figure要等到 10月,不過 crossover嘅第一炮已經開始,就係全港首個星球大戰「武士學堂」!可以同黑武士 1對 1較量,對星戰迷嚟講,簡直夢寐以求,不過今次活動淨係俾小朋友玩,大人無份喇!

揮劍打贏黑武士

「武士學堂」係專為 6至 12歲嘅小朋友而設, 7月週末就可以報名上堂,小朋友著上長袍,揸住光劍,化身武士學徒。扮演絕地武士嘅靚仔會親自傳授光劍招式,叫一眾小朋友向左打、向右打,小朋友只要有把劍喺手,仲可以創作到好多招式!上完堂之後,最後梗係要同黑武士和白兵對打。小朋友面對高大嘅黑武士難免有啲驚,不過大部分都好勇敢,最後黑武士梗係被擊敗!其實呢個活動只得二十分鐘,旨在俾小朋友感受一下《星戰》嘅世界,俾小朋友玩吓當係暑期活動,話晒可以同《星戰》角色同台較量,都算係一個難得體驗。每位通過訓練嘅小武士可以獲得證書同紀念品,最開心其實係家長,可以同《星戰》人物合照留念!




每位小朋友同家長最後可以同黑武士及白兵合照,呢張全家福,其實爸爸笑得最開心!


「武士學堂」逢週末先上堂,平日呢個位置就放咗三個黑武士同白兵嘅 Lego看守,一樣咁受歡迎。


小朋友上完堂會獲頒一張證書,雖然對小學面試無乜幫助,不過當做留念都好!


大熱天時要喺無冷氣嘅地方披着長袍,耍出不同招式教小朋友,絕地武士哥哥大汗疊細汗,見到都辛苦。 星球大戰「武士學堂」

日期: 2015年 7月 11、 12、 18、 19日
時間: 1pm-6pm(每日十節,每節 20分鐘)
地點:時代廣場地面展覽廳
網址: http://www.facebook.com/HKTimesSquare 

卡通人物 暑假攻陷商場

踏入暑假,各大商場充斥住卡通人物,小朋友除咗要上暑假班之外,仲有大把好去處!

《魔雪奇緣》 3D魔幻館

前年上畫嘅《魔雪奇緣》到今年繼續人氣高企,九龍灣 MegaBox就有一個「 3D魔幻館」,入面有超過 30幅大型立體場景,包括電影入面嘅經典場面,當然唔少得 Elsa公主同 Anna公主,各位鍾意迪士尼小朋友,一定要去朝聖!

MegaBox《魔雪奇緣》冰雪小鎮觀光館

日期:即日起至 9月 30日
地點:九龍灣 MegaBox L9
時間: 10am-10pm
門票:成人$168、小童(身高一米或以下)$138
購票方法:即場售票或網上預定 http://www.3dhk.com.hk 

六米高巨型黃小鴨

仲記唔記得維港嗰隻黃小鴨?今個暑假尖沙咀都有黃小鴨,不過係講緊潮鴨 B.Duck!今年係 B.Duck十周年,喺 iSQUARE有一隻六米高嘅巨型鴨,又有其他唔同造型,非常可愛,每逢星期日仲有抱抱會, B.Duck會以精靈派對 look示人,戴上煲呔及帽子,與大家合照。

iSQUARE B.Duck十周年遊樂園

日期:即日起至 8月 31日
地點:尖沙咀 iSQUARE地下、大堂及 3樓
時間: 10am-10pm
網址: http://www.isquare.hk 

撰文:關錦雯
攝影:譚俊軒
攝錄:羅錦波

    全站熱搜

    tvb4life 發表在 痞客邦 留言(0) 人氣()