雪糕由靚女店員即叫即砌,建議喺非繁忙時間來,製作過程任你影。

試食王

 Loooop 地址:大坑浣紗街 2號 A鋪 電話: 8192 8815

大坑夢幻雪糕 排隊食紙

Ads by Google

早前每日熱到成 34度,唔少雪糕店爭住上場,幾乎每星期都有新店。大坑嘅 loooop,又係未正式開業已經大把人朝聖。為咗食多幾款雪糕,我仲竟然要三顧草廬先食到!第一次傍晚六、七點去,只係賣剩一款,其餘三款口味已經沽清。店員話一開門款式最齊全,惟有擇日再去。第二日中午十二點正去到,諗住做第一位客人,叫晒四款,點知等極都唔開門,同另一對摸門釘的客人齊齊無奈企喺門口等開鋪。第三次,先打電話去確認有開,門口已經有一大堆人排緊隊,使唔使咁誇張呀?

鋪頭好細,主力做外賣,只有勉強容納到四、五個人的立食位。入面有唔少可愛雪糕裝飾、畫作,充滿少女味。店員細心解說兩種軟雪糕同每款雪糕筒口味,亦問清楚需唔需要加埋食用紙裝飾,相當細心。四款口味已 set好,不得加減配料,每杯唔同主題,好似 POOL有海洋生物、 MOON有太空船同星星, XOXO仲有一粒用糖拉成的士多啤梨,賣相夠晒夢幻,個個都相機食先。 XOXO同 ZOO係牛奶軟雪糕底,奶味幾濃,質感亦香滑。 POOL即係藍綠色的雪糕,店員話似薄荷加波子汽水味,其實真係食唔出,酸酸哋,比牛奶味清爽。不過兩款軟雪糕都溶得極快,好快變成一杯奶昔。配料比較簡單,有草莓碎、乳酪味脆粒、爆炸糖等等,幾有特色。四款雪糕筒用曲奇餅製成,除咗咖啡味比較薄身香脆,其餘兩款牛油及紅絲絨味又厚又硬,食到半路已經好滯,食唔晒。紙公仔同埋圍住雪糕筒嘅米紙可以食落肚,似威化紙入口即溶,純粹過癮,冇味道可言。賣相嚟講, loooop嘅出品可以話係贏晒,不過食過一次紙,下次都係食番正常雪糕就算喇。




Ice S'more Bar$42一整磚燒至微焦的棉花糖,包着朱古力雪糕及威化,食落味道同阿波羅的一模一樣。


XOXO$53最受歡迎口味,拉糖士多啤梨超級硬,好睇唔好食。反而雪糕上粒粒士多啤梨乾及鮮果肉,清酸好吃,紅絲絨味曲奇杯好厚亦冇乜味。


POOL$50藍月雪糕食唔出店員所講嘅薄荷波子汽水,似酸甜的果味。黃色的乳酪粒粒好味,加埋燒至煙韌的棉花糖同海洋公仔,賣相一百分。


MOON$50原本係黑色的公主口味曲奇杯賣晒,雪糕有朱古力脆皮、金星朱古力脆粒、朱古力爆炸糖,味道最甜。


ZOO$53牛奶雪糕配咖啡味曲奇杯,有餅碎及朱古力威化筒,味道賣相最平實。


紙裝飾印得精美,連埋包住曲奇杯成張招紙都食得,冇味之嘛。


人頭湧湧,唔好彩霸唔到室內企位,就要在街邊食,雪糕溶到成手都係。


店鋪入面有半溶雪糕做裝飾,好萌。 評分

食物:★★★
服務:★★★★
環境:★★★
抵食:★★★

Loooop

地址:大坑浣紗街 2號 A鋪
電話: 8192 8815
營業時間:星期一至四 12nn-12mn、星期五至六 12nn-1am•星期日 12nn-11pm

撰文、攝影、攝錄:試食王
mailto:hotpot@nextmedia.com

    tvb4life 發表在 痞客邦 留言(0) 人氣()