巴黎之花香檳下午茶$588/兩位@JW萬豪酒店大堂酒廊

常餐以外

銀河 24小時

Ads by Google

話就話賭場收入減少,濠賭股繼續處於低位水平,以為澳門酒店情況好差?我就覺得愈來愈誇。銀河度假城的規模超大,吃喝玩樂乜都齊,想住得好食得好可以完全不用踏出冷氣範圍。
Ritz-Carlton加 JW萬豪兩間酒店,餐廳數目不算多,但夠精緻,驚喜在酒吧都有特色。冇時間又想離開香港抖抖氣,梗要自我炮製 weekend getaway,入住新酒店,午市歎茶、香檳 high tea、自助晚餐,深夜再歎杯木桶 aged cocktail,直落 24小時,瘋狂吃喝, why not?唯一擔心有冇伴肯陪你癲。

自助餐必吃 荔枝木烤鴨

一眾餐廳之中,重點推介萬豪自助餐 Urban Kitchen。澳門的自助餐一般比香港平,也有 sell大堆頭的, Urban kitchen不鬥平不鬥多,中高價路線,以精選菜式擦亮招牌。主打必數北京烤鴨,不只從北京請來烤鴨師傅專門負責,更特別建造烤鴨爐,以荔枝木或蘋果木烤足五十分鐘,柴火烤出來的鴨有陣炭香,即烤即奉客,師傅更會推着車在客人面前即片即包,比不少酒家出品吸引得多,一晚要烤廿多隻!中菜的拉麵也是人手即拉,頗講究。加上點心、小炒、燒味等,中式選擇不少。
海鮮 counter亦有睇頭,即開生蠔、波士頓龍蝦、蟹腳等六款,刺身有帶子等五款,週末更供應大大隻的牡丹蝦,回本話咁易。西菜部分自助餐常見的肉眼扒,這裡供應澳洲和牛,肉嫩 juicy。去澳門想食葡菜?都有!葡國烤雞、炒蟹等數款,由經驗豐富的葡國菜大廚炮製。就連頭盤醬菜也有中韓共十多款,再加上十幾款蛋糕,軟雪糕機即製雪糕,由頭盤到甜品,各項都有精彩選擇,週末晚市最豐富,記得夾時間去食。




海鮮有六款,波士頓龍蝦、阿拉斯加或鱈場蟹腳、大蝦、青口、翡翠螺及即開澳洲生蠔,四五百元一位來計,算有睇頭。


店中設有烤爐,以荔枝木現場烤鴨,新鮮熱辣,必吃。


手拉麵可配擔擔麵或其他配料,即叫即煮。


餐廳亦供應散叫菜式,海鮮拼盤$688,除了海膽之外,其他刺身於自助晚餐時段都有供應。


三部軟雪糕機,供應朱古力、雲呢拿、杧果等多款口味。


甜品有十多款,包括即煎班戟,去澳門必吃的木糠布甸不時上場。 Urban Kitchen

地點︰澳門 JW萬豪酒店 1樓
電話︰+853 8886 6888
供應時間及價錢︰
午餐 12nn-2:30pm
星期一至四$228、星期五至日$268

晚餐 6pm-10:30pm
星期一至四$428、星期五至日$498
( 3-12歲小童半價)

懷舊粵菜 茶藝師服侍

如果你陪爸媽過澳門,可以去歎茶食中菜。 JW萬豪酒店的萬豪中菜廳,主打懷舊粵菜,總廚吳志佳師傅入行四十幾年,早於 1979年已在碧街的利園當大廚,近三四十年於東南亞多間酒店中菜當總廚,也為澳門新葡京 8餐廳摘下米芝蓮二星。他炮製的粵菜,都是老派做法,蝦子燜柚皮、野雞卷等懷舊菜都有。在選材上更為講究,配料會用上 20年陳皮、炒菜也加入黑蒜等,感覺更精細。
配套亦花過心思,有茶藝師駐場為客人沏茶,用餐前先奉上清淡的花茶 refresh一下,然後按客人的菜式再配搭沖泡合適茶葉,例如吃醬油乳鴿等濃味菜式,配以陳年普洱,甜品亦奉上匹配的茶葉。 VIP房的客人固然有茶藝師服侍,就算坐在大廳,也可以預訂茶藝師服務,夠貼心。




以傳統粵菜作主打,卻在賣相花心思,頭盤小碟按人數奉客。


大良野雞卷配炒鮮奶$168六、七十年代流行的野雞卷本來較肥膩,師傅將肥豬肉切薄,以玫瑰露醃過,炸得香口不油,炒鮮奶混入鮮蟹肉,鮮味更出。


20年陳皮醬油乳鴿$120醬油和滷水料浸煮乳鴿,肉嫩入味,加上廿年陳皮絲的清香,濃而不膩。


年輕茶藝師 Richard家裡做茶葉生意,十歲開始飲茶,樂於和客人分享茶經。 萬豪

地點︰澳門 JW萬豪酒店 1樓
電話︰+853 8886 6228
營業時間︰ 11:30am-3pm, 5:30pm-11pm

木桶陳釀 威士忌雞尾酒

通常對酒店的 lobby lounge不抱期望,最關心都係個 high tea掂唔掂。 JW萬豪大堂酒廊供應兩款下午茶,普通的兩位用$338,勝在唔貴。好在有巴黎之花香檳下午茶,兩杯 Perrier-Jouet香檳,配生果花盤、 opera蛋糕、鬆餅伴燕窩醬等,夠晒高貴,$588兩位,吸引!(見 P.78圖)
酒單選擇也豐富,烈酒特別多,十幾萬一支的 Croizet 1961年陳年干邑都有。竟然連雞尾酒都有驚喜,用 12年麥卡倫來調酒之餘,酒吧更有迷你橡木桶,將雞尾酒加入迷你橡木桶中,陳釀兩星期,令雞尾酒帶木桶香,$75絕對值得一試。




Barrel Aged Boulevardier$75威士忌、 Campari及 Vermouth放於木桶中兩星期,令酒身加添木味。


Gentlemen's Quarterly(後)$70用麥卡倫 12年調成、 Blueberry Chocolate Julep(前)$70有威士忌、可可酒及果香。 大堂酒廊

地點︰澳門 JW萬豪酒店地下
電話︰+853 8886 6228
營業時間︰ 8am-1am

JW泳池吧

萬豪泳池也有酒吧,不過暫時只供住客享用,平日人少清靜。計劃將於週末搞派對,開放給所有人。
泳池酒吧供應精緻快餐,安格斯漢堡$148襯以芝士辣肉腸、紅洋葱醬及半乾番茄三種口味。 Bubbly Raspberry& Mint$55

池畔酒吧

地點︰澳門 JW萬豪酒店 3樓
電話︰+853 8886 6228
營業時間︰ 10am-6pm

Ritz-Carlton 24小時免費吃

豪得起,一定要住 Ritz-Carlton,所有房都係套房,八百幾呎空間包括私家 jacuzzi,開幕優惠$3,588起一晚,好貴?如果價錢包括享用 Club Lounge, 24小時免費吃,又點計?
酒店會所行政酒廊一向只供行政樓層客人專用,但澳門 Ritz-Carlton只有套房,所以暫定於開幕期間,行政酒廊開放給所有住客享用。自助早餐、自助午餐、自助晚餐之外,下午茶及深夜時段都有小量小食供應,就連啤酒、指定葡萄酒都是免費,計落其實好抵!雖然免費,用料依然是高質素,蔬果香草是歐洲入口,幾款法國芝士,廚師即煮主菜,例如法國海鱸魚、煎帶子等。款式當然不似一般自助餐豐富,總算頭盤、即做主菜、甜品齊備。




Club Lounge設有開放式廚房,放滿新鮮香草、復古番茄等食材,早午晚餐都有廚師即煮主菜。


午晚市 live station有兩款主菜,例如吞拿魚、海鱸、羊架等。


冷盤有數款風乾肉及五至六款法國芝士。


選擇雖少,芝士餅、朱古力撻等甜品水準不錯。 Club Lounge

地點︰澳門麗思卡爾頓酒店 53樓

20年余市 逐杯叫

Ritz-Carlton大堂設於 51樓, bar& lounge亦位於 51樓,居高臨下望着人造沙灘和激流,景色不錯。 High tea以外,這裡的輕食其實一點都不簡單,自家煙熏三文魚毛蟹卷、慢煮和牛肋骨、烤北海道帶子伴杧果醬等,全部都是五星酒店西餐廳菜式,製作功夫繁複,只不過分量細。如果想吃簡單的午餐或晚餐,酒吧的菜式也夠滿足。
至於酒類,主打 Gin& Tonic的配搭,九款氈酒及五款 Tonic任配搭,再加上自選香料及生果,口味多樣化。另外已宣布暫時停產的余市威士忌,這裡仍然有供應, 12年、 15年及 20年都可以逐杯叫,分別是$218、$368及$458一杯。在日本搶不到貨,來到澳門歎番杯頂頂癮啦。




Ritz-Carlton酒吧的定價比萬豪貴, Official Sangria$118配上一小片火腿三文治,勝在精緻。


Gin and Tonic$138可自選配搭, Tonic有紐西蘭的 East Imperial、英國的 Fever Tree及 Fentimans。


慢煮和牛牛肋骨$178以酸子、紅葱等慢煮,汁醬味道甜酸濃郁,牛肉軟腍。


烤野生多寶魚$178伴以焦糖洋葱及慢煮小牛肉,魚肉油潤滑溜。 麗思酒廊

地點︰澳門麗思卡爾頓酒店 51樓
電話︰+853 8886 6868
營業時間︰星期日至四 7am-12mn、星期五至六 7am-1am

Ritz-Carlton泳池吧


有機紅菜頭沙律$128

Ritz-Carlton泳池酒吧亦只供住客享用,座位少,但頗講究,供應有機食材、有機啤酒及葡萄酒。

麗思池畔廊

地點︰澳門麗思卡爾頓酒店 3樓泳池
電話︰+853 8886 6868
營業時間︰ 10am-7pm

百老匯大街 一次吃勻地道小食

度假城另一部分百老匯大街餐廳亦陸續開業,大街集合了十多間澳門地道名店,必試的皇冠竹昇麵、華生行燉湯、澳門最豪的杏香園糖水,還有本來只得街邊檔的成記粥品、要上街市熟食中心才吃到的梓記牛雜等。一條街已經集合著名小店,一餐可以分開飲湯、食麵、食糖水逐間幫襯,唔使在澳門市內流着汗四圍走,最啱懶人。

米芝蓮推介竹昇麵

香港的竹昇麵買少見少,在澳門連續三年成為米芝蓮推介的皇冠小館,老闆在廣州學做竹昇麵,每天在總店親自打麵,麵質特別爽口。蝦子撈麵最受歡迎,吃得到麵香及蝦子鮮香,簡單好吃。海蟹粥用生猛蟹即點即煮,粥底加腐竹和乾瑤柱熬四小時,很綿。




竹昇蝦子撈麵$80麵質爽口,不覺鹼水味,另上的湯底有大地魚香。


海蟹粥$280(半窩)粥底綿滑,蟹新鮮又多膏,啖啖蟹香。 皇冠小館

地點︰百老匯大街 A-G017
電話︰+853 8883 3338
營業時間︰ 11am-3am

抵食原盅燉湯

開業逾三十年的華生行,家族一向從事藥材生意,澳門人都鍾意食其出品的龜苓膏,溫和甘香,苦味淡,曾日賣 500碗。燉湯也吸引,除了常見的靈芝燉竹絲雞、田七燉豬𦟌等,亦有滋潤的木瓜雪耳燉象拔蚌、蟲草花燉水魚等,廿多款原盅燉湯,非常足料,六、七十元已有一客,最貴的燉鹿腳筋不過$130,以此質素,抵!




木瓜雪耳南北杏燉象拔蚌$70象拔蚌帶甜,加上淡淡藥材香,感覺清潤。


川貝花旗參燉原個雪梨$42花旗參甘香不苦澀,雪梨沒有變酸,比一般糖水店做得更好。 華生行

地點︰百老匯大街 A-G020
電話︰+853 8883 3338
營業時間︰ 12nn-2am

老字號石磨糖水

糖水老店杏香園在澳門無人不曉,一來出名真材實料,大部分材料如合桃、杏仁等都是用石磨生磨,不用機打,磨得細滑,味道香濃,就連椰汁都用椰子自家搾汁,絕不用現成貨,百分百原汁原味。不過價錢不便宜,一碗糖水三四十元,識食的就知道貴在用料及手工,清爽的馬蹄沙更是夏天必吃!




杧果馬蹄沙$43以慢火煮的馬蹄沙,清爽少甜,正!


鮮椰汁杏仁合桃$36質地幼滑,龍皇大杏味道香濃,鮮搾椰汁甜得天然。 杏香園

地點︰百老匯大街 E-G030
電話︰+853 8883 3338
營業時間︰ 12nn-2am

澳門放暑假  LMFAO坐鎮 SPLASH派對

新濠天地 Hard Rock酒店池畔派對 SPLASH,今年頭炮陣容強勁,請來 LMFAO創作主腦 Redfoo獻技,同場還有英國 DJ Tim Mason,及香港的 DJ Arun R,謝婷婷都打算一齊玩!

SPLASH池畔派對第十二浪
日期︰ 7月 11日 3:30pm-11:30pm
門票︰$480
購票: http://cityofdreamsmacau.com/splash 
電話︰+853-8868 6688/
香港 800 900 783

DreamWorks夢工場

金沙度假區 7月開始有 DreamWorks動畫明星撐場,包括喜來登酒店的功夫熊貓學堂( 7月 4日-9月 30日)、金沙城中心御桃源的親子樂園遊戲( 7月 7日-8月 31日)、金沙城中心烏魯木齊宴會廳的荒失失奇兵企鵝夏日盛宴,動畫主題美食派對( 7月 27日-9月 30日),以及動畫明星陪食早餐,邊食邊有 show睇。

價錢︰夏日盛宴成人$280、小童$160、家庭套票$988
明星早餐成人$238、小童$138、家庭套票$688
查詢:+853-8113 7915

MGM葡國風

MGM為慶祝葡萄牙國慶,展出大型藝術裝置《八面靈龍》,亦推出一系列葡國菜式。自助餐廳於六月加推多款葡國菜,葡式白酒蜆肉鍋、葡式海鮮飯等,甜點餐廳及天幕咖啡廳推出葡式下午茶(至 10月 31日)。金獅吧請來葡萄牙四人樂隊 80& TAL現場演出(即日至 7月 14日)。

價錢︰自助餐$428/位、下午茶$288/二人用
電話︰自助餐+853-8802 2372、甜點餐廳+853-8802 2324、天幕咖啡廳+853-8802 2555

文華住一晚送$2,000

文華東方酒店住宿 package送大禮,$2,888起入住一晚,包早餐兩位、 spa或餐飲$1,000消費額及壹號廣場$1,000購物禮券。換言之幾百蚊就可以住一晚,試得過。(至 12月 29日)

電話︰+853-8805 8822
網址︰ http://www.mandarinoriental.com 

撰文:黎狄敏
攝影:胡春輝
攝錄:梁炳權
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()