太爛玩

維港旁起「戶外泳池」 泳裝女雕塑試水

Ads by Google

明明話「未食五月糉,寒衣不入槓」,點知今年就過咗一個有史以來最熱嘅端午節!
唔好話寒衣,短袖衫都唔想著,只想著泳衣游水!
喺尖沙咀海港城好似有個戶外泳池,梗係要約埋一班朋友去游……
原來係假嘅!其實係一個藝術展覽,美國雕塑藝術大師 Carole A. Feuerman以游泳為主題製作出一系列雕塑,配合錯覺藝術嘅泳池,幾可亂真!雖然唔可以真係跳落去游水,不過眼睛吃冰淇淋,一樣涼快!

體態優美 猶如真人

來自美國嘅超寫實雕塑藝術大師 Carole A. Feuerman喺國際享負盛名,今次係佢第一次喺亞太區舉行首個個人展覽,一系列雕塑以游泳為主題,展現出唔同體態嘅美感。展覽一共有 6個雕塑,全部都係著住泳衣嘅女仔,不過唔係大家想睇嘅 Bikini美少女,而係游泳選手著嘅運動裝泳衣。其實呢一系列雕塑全部以泳手做 model,主要帶出肌肉美感,好似有一個游緊背泳嘅雕塑,就係以奧運選手 Lauren Perdue比賽前輕鬆狀態為藍本,要捕捉只此一刻嘅表情實在唔容易。為咗加強製成品嘅真實感,雕塑配件都非常講究,好似泳帽下面嘅頭髮、穿著嘅泳衣等等,全部都係真嘢,離遠睇真係分唔出係真人定雕塑!




蹲在銀色巨球上練習瑜伽嘅雕塑名為 Monumental Quan,展示人體完美比例,屈膝佇立的姿勢難度相當高。


海港城露天廣場搭起「戶外泳池」,擺放咗 6個以游泳為主題嘅雕塑,驟眼望以為呢度有三個?其實有一個係真人嚟㗎! 日薪一萬做救生員

為咗增加今次展覽嘅互動性,海港城特別以日薪一萬元高薪聘請「救生員」,逢週末於「藝術泳池」旁邊看守藝術品,以及向觀賞者介紹展品及推廣公共藝術文化。成一萬蚊一日,梗係多人報名, 400幾人入面揀咗 8位俊男美女,佢哋質素非常高,當中包括有醫科、法律系學生、欖球及排球代表隊成員等等,被揀中嘅 Ada不諱言係被高薪所吸引,不過喺大學主攻視覺藝術嘅佢就話,可以同大師級藝術家 Carole見面,一樣獲益良多。一到週末佢哋就以健康性感嘅打扮出現喺「藝術泳池」,毛手毛腳嘅人何其多,不過一班女救生員都話唔擔心,信得過大會保安呀!




Ada畢業於浸大,主修視覺藝術,佢話十分欣賞 Carole嘅作品,希望趁暑假賺錢之餘,亦可重投藝術嘅懷抱。


現年 70歲的 Carole A. Feuerman,從事雕塑藝術創作超過 40年,作品被多國元首收藏,包括日皇明仁、美國前總統克林頓等等。


Lauren Perdue係 2012年奧運金牌得主,上年正式宣布退役,呢個雕塑像真度極高,盛惠 12.8萬美元(約 99萬 8千港元)。


一班「藝術救生員」年齡介乎 20至 30歲,淨係對藝術充滿熱誠係唔夠嘅,大會仲特別幫佢哋補習,邀請導師介紹作品及藝術家嘅背景資料,絕對唔係隨口噏當秘笈。

Carole A. Feuerman個人雕塑公共藝術展
日期:即日起至 7月 5日
時間: 10am-10pm
地點:海港城海運大廈露天廣場

撰文:關錦雯
攝影、攝錄:陳淘鈞
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()