Isaac  24歲香港教育學院社會科學系 Yr.3Isaac指金屬天線筆是驗樓的必備工具,用來敲打牆身去判斷樓宇有否批盪、石屎剝落等問題。

U撈

向測量師之路出發

Ads by Google

自 2010年發生馬頭圍道塌樓事件後,令社會關注香港的樓宇老化問題,現時全港約有 5,900幢具 50年以上樓齡的樓宇,每年更以 580幢的速度在增加。舊樓多,樓宇檢察的需求自然多, Isaac現為助理測量員,除了賺了不少實戰經驗及零用錢外,還看準測量業對人材需求若渴,決定畢業後考牌做測量師,在業界大展拳腳。




Isaac說:「我哋條 team近期主要負責公務員宿舍,好多都三、四十年樓齡, 10單就有 2至 3單係 high risk嘅 case,需要盡快派人維修。」

「舊建築物內部最常出現嘅維修問題係批盪,即係石屎牆同油漆之間嘅物料因環境溫度、濕度嘅變化,導致牆身『起撲』。」採訪當日, Isaac來到一座舊屋村,用金屬天線筆敲打牆身,憑聲音分辨牆身的批盪情況,如油漆與防水物料黏力夠不夠,更一面指出需要維修之處,解釋得頭頭是道。
24歲的 Isaac今年將於香港教育學院社會科學系畢業,年紀輕輕卻已從事了 3年建築測量與驗樓的工作。「之前我讀測量嘅副學士課程,規定要有相關嘅實習經驗先可以畢業。 12年嘅暑假,有師姐介紹我去𠵱家間建築測量公司做實習,負責樓宇檢查。見份工唔使淨係坐喺 office,可以周圍去,加上上司肯教我嘢,同事之間又相處得唔錯,彈性返工時間遷就到平日大學上堂,所以過完暑假,我都繼續做呢份兼職。」

專做政府物業


當發現單位有剝落、裂紋等問題, Isaac就會拍照和記錄位置,再整理報告,交給相關的政府部門去判斷何時上門維修。

Isaac的工作主要負責檢查學校、警處、公務員宿舍等政府物業,勘察建築物外牆、內部天花、櫥櫃有否結構上的危險。「時薪有$50,返朝 9晚 6,一個月返 15至 20日,月薪平均有 7、 8千,兼職嚟講算可觀。」
雖曾讀測量課程,但 3年的實戰經驗令 Isaac體會到書本知識與真實情況相距甚遠。「同一個 case,教授會教你一個個 step去處理問題,但現實中涉及好多預算、人工及師傅質素等掌握唔到嘅變數,成日睇到住戶同維修師傅討價還價,未必可以按部就班咁完成,就要識得變通。」

有商有量

另外,讀書只教你專業知識,卻沒教你如何處理客戶的情緒。 Isaac說:「你同我都唔會鍾意有陌生人喺自己屋企行嚟行去,又檢查又影相,所以遇到唔合作嘅住戶係可以理解。我哋檢查完要影相寫 report,試過有住戶會要求我哋 delete啲相,雖然我哋會照做,但要同佢哋解釋番,咁做等於未完成單位嘅勘察,下一步嘅跟進同維修就執行唔到,但尊重住戶嘅意願係最重要。」
Isaac曾經因測量工作重複沉悶而轉過其他兼職,「我做過補習、民政署活動助理及 bartender。」然而,快將畢業,他以前途着想,認為測量業前景穩定,決定重操故業,更由兼職轉為全職助理測量員。
「我讀社會科學,冇特別嘅專門行業可以投身,但自馬頭圍嘅塌樓事件發生後,樓宇檢驗需求好大,亦令相關專業人材嘅需求增加。加上持牌嘅測量師起薪有 5、 6萬,累積 3年相關工作經驗,就可以去香港測量師學會考牌做測量師,自己睇到條較清楚嘅路向,想有一份穩定嘅工作。」




Isaac說:「牆壁有剝落嘅地方唔可以就咁上番油,應該要將剝落嘅地方全部剷走,重新批盪,油上防水物料、油漆,咁先可以保養得耐啲。」


Isaac指做驗樓單位內外都要兼顧。 點入行?

Isaac現任職的新福港集團,樓宇保養部約有 60人,專承辦政府物業的樓宇檢驗工程。 Isaac說:「唔一定要讀測量先可以做驗樓嘅工作,我有啲同事係讀 marketing,都嚟做兼職。冇相關背景可以由助理樓宇檢察員做起,負責從旁協助嘅工作,好似用簡單儀器睇樓宇結構、拍攝記錄位置、整理報告等,時薪約$50起。」
查詢: http://sfk.com.hk 

撰文:杜曉婷
攝影:楊晴
部分圖片由被訪者提供

    全站熱搜

    tvb4life 發表在 痞客邦 留言(0) 人氣()