採訪當日, Sing正帶領幼稚園生參觀香港賽馬會四川奇珍館,「暑期學堂會有小朋友與大熊貓、海豚嘅親密接觸,導師要識得控制秩序及引導小朋友喺當中學到保育知識。」

青雲路

暑假搵好工 做導師專教小朋友

Ads by Google

來到 6月頭,一年一度的暑假正式開始,是各學生尋找暑期工的季節,除了賺到錢外,也是累積工作經驗的好時機。近年對小朋友的教育及身心發展都非常重視,不同機構都推出針對嬰幼兒的服務,如海洋公園便招聘教育大使向小朋友介紹動物及保育資訊,史丹福游泳學校則聘請嬰幼兒班游泳助教,學生們可趁這些機會了解為人師表的工作狀況。

CASE 1:海洋公園學堂導師

踏入暑假,海洋公園教育部正招聘暑期學堂導師及暑期教育大使,教育主任 Sing表示:「暑期學堂導師會帶領 4至 11歲嘅小朋友,與大熊貓、海豚及鯊魚等動物互動,並負責活動用嘅物品,好似製作教材,喺學堂中教小朋友動物及保育嘅知識等。暑期教育大使則負責喺唔同嘅動物展館,向遊客講解動物資訊。」
海洋公園會安排每位新入職的員工接受 3日的培訓,「要學習公園資訊、客戶服務技巧及動物習性等,好似熊貓嘅棲息地面臨緊咩問題,每日作息等資料都要背熟。又要識得帶動小朋友嘅興趣,例如問熊貓有幾多隻手指?令小朋友更加投入,之後會安排有經驗嘅同事一齊出勤,令新入職員工更快上手。」




暑期學堂導師時常要接觸 4歲至 11歲的小朋友, Sing認為求職者需要有耐性及愛心,「如果有幼兒教育相關嘅經驗會更好。」


在接觸完動物後,學堂導師要帶領小朋友在課室做一些小組活動,例如繪畫、創意手作等,加深對動物體驗的印象。 做足資料搜集

入職 3年的 Sing,最初是由暑期學堂導師做起,再轉去當全職教育助理,「當時做暑期學堂嘅導師,要帶小朋友活動,每次都要做定資料搜集,好似學堂會有為海象準備食物、介紹海洋生態等活動,你要備定課,唔係有機會俾小朋友問到口啞啞。試過有位小朋友之前上過我嘅班,隔咗兩個月再嚟公園玩,去展館問同事要搵我,仲話之前玩得好開心,成件事令我好有滿足感。」




暑期教育大使需要在不同的動物展館為客人講解動物資訊, Sing表示:「公園現時約有 10個展館,崗位會不時轉換,員工對每個展館都要有認識。」


在亞洲動物天地,暑期教育大使需要介紹小熊貓生活習性、飲食習慣等。 點入行?


海洋公園教育經理 Janet

海洋公園教育經理 Janet表示公園會聘請大量暑期工,以應付暑假期間去公園的遊客,「入職者要有香港中學文憑考試同等及以上學歷,暑期學堂導師及暑期教育大使都係前線人員,要面對遊客,最好有主動開朗嘅性格,舉辦活動要與唔同嘅部門合作,溝通技巧好重要。面試時我哋會有個團體遊戲,見工者要合力去完成,我哋會從中評分。」暑期學堂導師及暑期教育大使時薪約$60至$70,暑期學童導師每星期工作 3至 6天,每天工作約 4至 8小時,而暑期教育大使基本每周工作 44小時。
查詢︰ http://www.oceanpark.com.hk 

CASE 2:教 BB游水


余家誠(右一)及 Coco(右二)正帶領家長指導自己的嬰兒在浮墊上做踢水動作,余家誠表示︰「父母同 BB一齊游水,彼此有親密嘅肌膚接觸,可以增加依附感,而助教同教練都會留意各嬰兒嘅狀況,成個過程都好安全。」

採訪當日,課程總監余家誠及助教 Coco正在上 Water Babies課程,他們引領家長指導自己的嬰兒在熟習水性,隨着教練哼着歌,家長扶着嬰兒隨節拍在水中左右搖擺。「我哋會教 BB背浮、潛水、爬泳 1至 2米等技巧,另外可以增加親子關係。」
史丹福游泳學校的 Water Babies課程從澳洲引入,每個新入職的助教都要接受培訓,余家誠表示:「通過初步面試後,新入職者會接受 3小時理論堂及 3小時水中實習,好似教學技巧、課堂管理等,仲要學點去安撫喊緊嘅 BB,好似用玩具分散佢哋嘅注意力,再令佢哋安躺喺水流中,有助令佢哋唔喊。」

教 BB初頭會怯

現就讀銜接海外大學課程的 Coco,成為兼職助教已有 2個月,她表示教嬰兒游泳讓她有另類的體驗,「自己鍾意游水,之前都做過教練教 5至 6歲嘅小朋友游水,主要係指正番啲游泳動作。𠵱家教 BB游水嘅感覺好唔同,初頭接觸 BB會有啲怯,驚整喊同整親佢哋,慢慢見到家長信自己,而且 BB由唔鍾意掂水到唔捨得走,個成功感好大。」
Coco表示助教的工作主要是從旁協助教練,「教練會帶領成堂嘅活動及控制氣氛,助教喺堂上要做協助教學嘅工作,例如見到某啲家長唔清楚點做時,要同佢哋講解,及糾正佢哋嘅動作等,所以溝通能力都好重要。」
Coco每星期會教班 6至 8小時,「之前要返學,上堂時間集中喺星期六、日,返工個更期可以自己揀,嚟緊暑假會開多咗班,會返得密啲,如果夾到時間會每日都返。」




新入職者需接受水中實習訓練, Coco(左)正學習嬰兒正確的背浮技巧。


學校有提供一些公仔及布偶,讓導師可以在嬰兒哭鬧時以作安撫用途。 


Matthew Matthew及太太 Jack Holly客人

之前帶 BB去泳池,佢哋表現得好抗拒,於是報咗 Water Babies班,導師教咗啲技巧好有用,𠵱家見 BB對水完全唔驚,而且玩得好興奮,我哋同 BB都玩得好開心。

點入行?

史丹福游泳學校現時正招聘嬰幼兒游泳助教,歡迎暑期工,課程總監余家誠表示應徵者的性格比泳術更重要,「踏入夏季,多咗家長報名,我哋都需要更多嘅人手應付。 Water Babies課程對象係 6至 48個月嘅嬰兒,教水嘅地方都唔會好深水,求職者嘅泳術基本游到一個直池就足夠,我哋反而會睇重佢哋有冇耐性、愛心及同理心,有良好嘅溝通技巧及有幼兒工作相關經驗會優先考慮。我哋每個月都設有考試,助教通過咗考試就可以成為正式教練。」助教時薪為$70,通過考試後時薪為$200。

史丹福游泳學校
查詢︰ http://www.stanfordswim.com.hk 

撰文:曾志恒
攝影:傅新發
部分圖片由被訪者提供

    全站熱搜

    tvb4life 發表在 痞客邦 留言(0) 人氣()