車人一句

毋懼大時代轉變 邵仲衡 x M-Benz CLA250 Shooting Brake

Ads by Google

有邊個會諗到 23年前嘅電視劇《大時代》出土重播竟然爆紅?又有邊個會諗到翻撻彈起嘅唔係主角秋官或青雲,而係演丁孝蟹嘅邵仲衡?仲要大把後生女話 like佢!你以為邵仲衡只係一個潛水多年嘅演員?但其實佢早轉行做汽車生意,幾乎個個做車嘅人都識佢,而且玩車經驗豐富,廿幾年前喺《大時代》入面已經見佢集集揸 Benz,絕對係玩車老手!適逢 M-Benz推出最新主打年輕人市場嘅 CLA250 Shooting Brake,今日嘅邵仲衡又 like唔 like呢部 M-Benz新世代產物?




Shooting Brake最出位就係傾斜嘅旅行尾箱,確實比傳統旅行車瀟灑。

人人深夜追睇《大時代》、人人話大佬孝好型,究竟有幾型?筆者當年睇住套劇首播,邵仲衡個角色身為大佬,出入有手下、又坐豪 Benz、仲要手持水壺大哥大!可恨當年筆者車牌都未有,而且只夠錢出部天地綫,大哥大月費係$800/100分鐘!點畀得起呀?

「以前 Benz旅行車只有酒店先會用。」

由於筆者同邵仲衡早已認識,所以我會好似《大時代》內忠青社嘍囉咁叫佢做大佬。

Face:「大佬,以前拍《大時代》時,係咪經常要坐 Benz?坐咩車多?」
大佬:「咁做大佬梗要坐 Benz先似樣! 90年代初 Benz好巴閉,係身分象徵,喺套劇度最常坐 W124同 W126,仲有其他劇都坐過 SL,製作認真過𠵱家好多。」
Face:「咁以前有冇啲好似 Shooting Brake咁嘅旅行車?」
大佬:「有旅行車,不過好少見囉!同埋以前旅行車畀人嘅感覺唔及房車咁得體,邊有人會覺得旅行車係潮車嚟呀?只會喺機場同酒店門口先見到,以前 Benz旅行車只有酒店先會用。」
Face:「咁大佬你𠵱家有冇揸 Benz呀?」
大佬:「有!我自己有部 E仔,不過比較少用,我老婆咪就係揸緊 CLA囉!我就覺得女人揸 CLA房車好睇啲嘞,畀我揀就梗係要旅行車啦!」




大佬孝喺劇中多數自己揸車,當年睇到真係型到不得了。


大佬孝帶住成班細佬,個個都坐 Benz做腳車。


其實現實中邵仲衡喺 90年代初已沉迷四驅車活動,仲揸車四圍去,癲到沙漠都去過。 「 Benz順住時代不斷進化,冇脫過節。」

Face:「覺得以前《大時代》咸豐年嘅 Benz同𠵱家有冇咩大分別?」
大佬:「嘩!分別梗係大啦!以前所有 Benz都係尾轆車,邊有頭轆車呀?只有日本車先用頭轆咋,生產成本平好多,而且維修比尾轆易啲。呢部 CLA Shooting Brake用頭轆絕對係好事,如果死牛一面頸只做貴價車,市場會好窄,大潮流一路向前去, Benz用頭轆都冇問題呀,佢 keep到個質量就自然有人欣賞。」
Face:「其實咪好似藝人咁!要變通之餘又要有個人風格。呢部 CLA Shooting個款咁 young,你又 like唔 like?」
大佬:「我鐘意佢個款呀,而且加咗啲橙色裝飾好靚,外表特別啲先啦!如果問我佢有咩唔夠好,我嫌個車尾太斜囉,高大啲坐入後座都會容易頂頭,用正宗旅行車較直身車尾就梗係好啲,但又冇咗 Shooting Brake斜尾特色。」
Face:「講起車廂,呢部連內籠都有橙色配件,會唔會太浮誇?」
大佬:「唔會!我覺得最靚係個車籠添呀!除咗後座頭部空間矮咗啲外,前、後座都用原廠仿猄皮桶凳,加埋啲橙白色直條,好有 7、 80年代賽車味道!仲有所有門皮、中控台、地毯都繡咗橙色線,吸引呀! Benz就係呢度好嘢,唔老餅,順住時代不斷進化,冇脫過節。」




表板大細分明,而且中央有顯示屏,方便閱讀車輛資訊。


話明新世代 Benz,點可能咁單調?車內有 12種氣氛燈調校。


電暖座位、泊車感應、停車熄匙等系統開關,全設於中控台上,大佬孝都話方便。


由於 Shooting Brake車頂面積較房車版大,所以天窗都大過人,接近天幕頂!


以大佬孝成 6尺身形坐入後座,又真係有少少頂頭,算啦!大佬都係要坐大車㗎嘞!


只需加$26,500就可以加裝「 Orange Art」套裝,當中最吸引當然係印上橙白色直條嘅座椅。 「其實𠵱家嘅 Benz好好揸。」

Face:「以前嘅 Benz就話大大部、以舒舒服服令所有富貴人家冧, CLA Shooting Brake唔大部,後座又少少頂頭,會唔會吸引唔到人?」
大佬:「咁𠵱家嘅 CLA Shooting Brake同以前嘅 Benz真係兩個世界嘅嘢,但佢唔係用嚟討好以前嗰班客嘛,後生仔客先係主力。後生仔對舒適要求冇咁高,好玩、有 gimmick先係重點,加上近 10年旅行車成為潮車, CLA Shooting Brake肯定受後生歡迎,嫌佢唔舒服嘅人咪去買 CLS Shooting Brake或者 E-Class旅行車囉。」
Face:「咁你覺得佢同你部 E-Class比較,揸起上嚟分別大唔大?」
大佬:「我頭先初步試過少少彎路,發覺避震 set得好好,慢車都幾舒服,帶有少少 sporty,入彎更有信心。而且值得一讚係個軚盤粗幼適中,好揸手,有啲似 Audi啲 RS軚盤。轉向反應比𠵱家啲 E-Class快,同廿幾年前啲 W126更加冇得比啦,入彎準好多!以前啲 Benz好似揸船咁呀,其實𠵱家嘅 Benz好好揸。」




車廂設計、用料都非常潮,大佬孝仲話軚盤形狀好好揸手!


大佬孝表示, CLA房車啱女人用,男人就梗係用 Shooting Brake啦!


正常情況(上)尾廂有 495L容量,如摺埋後座,空間可增加到 1,354L。


「用 2.0 turbo偈都好夠力喇!」

Face:「 CLA Shooting Brake用頭轆你話好揸,咁好似呢部 CLA250咁只用中級嘅 2.0公升 turbo引擎,又夠唔夠用?」
大佬:「香港地你用到幾多馬力?呢部嘢 211匹點會唔夠用?而且副偈唔係普通嘢, turbo有好好低轉扭力,好似呢啲少少濕嘅路面,盡油起步隨時可以 power steering響胎啦!我就覺得用 2.0 turbo偈都好夠力喇!而且 turbo介入一下唔覺好突然,幾 smooth。當然如果用到 CLA45 AMG嗰副偈就更勁啦!不過變成四驅之後,行車動態唔同咗,車身都重咗,玩法唔同。𠵱家 CLA250 Shooting Brake揸起上嚟有啲似自動波嘅 Civic Type R,易揸、似日本車。」
Face:「我見你頭先試車全程都用+/-波,覺得個波箱表現掂唔掂?」
大佬:「掂!波箱反應好快,而且拖波效果明顯,如果可以多個選擇喺波棍上操作更好,始終多一樣選擇就多一分本錢。」
Face:「有冇試到個停車熄匙系統?覺得點?好用嘛?」
大佬:「我又冇留意喎,試車冇乜點停過車。不過有都係好事,個個都講環保、為地球出一分力,只要對環保有幫助,有總好過冇。」







2.0 turbo引擎有成 211匹馬力,更厲害係低扭超強,加速力夠晒堅。


DCT雙極子波箱嘅轉波速度快到大佬孝都話佢掂!


話個秘密你知,我留意到大佬孝有時會用左腳踩 Brake,車手喎!


玩車多年,以前又做過汽車生意,今時今日上晒岸,有咩車未揸過?你睇佢從容不迫就知有料。 M-Benz CLA250 Shooting Brake Spec.

引擎: 1,991c.c.直四 turbo
馬力: 211hp/5,500rpm
扭力: 35.7kgm/1,200-4,000rpm
傳動: 7前速自動、附+/-模式
車身: 4,630× 1,777× 1,435(mm)
車重: 1,500kg
0-100km/h: 6.9秒
耗油: 5.7-5.5L/100km
車價:$499,000起
查詢:仁孚行( 2895 7339)

貴族玩意

「 Shooting Brake」其實係稱呼以前英國貴族專用嚟打獵嘅車,而呢類車既然係貴族所用,當然有咁罕有得咁罕有,基本上以前叫得做「 Shooting Brake」都係訂造車,唔係有錢就買到,要有面先得!今時今日由 M-Benz推出嘅 Shooting Brake仲有 CLS Shooting Brake選擇,不過入門嘅 CLS400都要$850,000,差唔多買到 2部 CLA250!

撰文:袁國基
攝影:葉偉豪

    全站熱搜

    tvb4life 發表在 痞客邦 留言(0) 人氣()