漫遊毒物

東洋鋼鐵  RE:EDIT Iron man#02 Extremis Armor

Ads by Google

從來玩 Iron man唔美國孩之寶就係香港 Hot Toys,咁你有冇聽過一個日本品牌叫千值練呢?佢係專做超可動塑料 figure成名,天元突破、三一萬能俠等已經絕版升值;舊年年中佢哋開始行英雄主義,至今已推出第 3款 Iron man figure,雖然睇落比 12吋 figure細隻,但就有日本設計美形外觀、超變態高可動性,新作 Extremis Armor仲首次加入合金成份,啱晒唔舉鐵唔安樂的香港玩家!

加重合金成份

聽工作人員講,千值練理念係精密、超可動,而且唔想因為系列概念縛死自己,首作 RE:EDIT#01「血邊裝甲」就追求「變態可動性」,另一款 Armorize就玩拆甲、仲有 Tony人頭,而呢款 RE:EDIT#02 Extremis Armor「絕境裝甲」則因應頭兩款作品的買家反應,加入合金關節,畀到我好大新鮮感。
雖然因此令可動性比「血邊」少 20%,但記者試玩就仍然覺得好好扭,飛天、爆地乜都做到,關節亦比千值練早期設計進步,尤其扭動小腿時裝甲會向內縮,加大屈曲角度,仲唔怕甲撞甲刮花零件,加上眼部、心口 LED燈, 18cm細細隻方便收藏,且精細度唔會輸畀 12吋好多,拎上手真係好有 feel。










RE-EDIT系列 Iron man比一般電影超人玩具更有個性。上色都好靚,呢隻酒紅色係要噴好多重油先得到呢個效果,睇落真係分唔到係膠定合金。


呢張圖就可以睇到邊個位係合金製,比例絕對唔算多,目的係增加少少手感,同埋令大腿關節更耐玩。


再 close-up睇小腿位,可以 180度內屈,跪地、爆地都做到。


身型高瘦,心口同眼都有燈,不過隻黃色就唔係好突出。


有地台、透明背景板、同埋 display用金屬臂同 5對替換手。


背面電池盒唔算礙眼,而開關掣其實係有片紅色裝甲遮住,係我拆走咗影相。 陸續有來

未來仲會有 Warmachine、 Iron Patriot、 Hulkbuster(左起)排隊等住出,愛國者跟漫畫版、手上有美國隊長盾,而隻 HB就比較迷你。










撰文:鍾世傑
攝影:傅新發

    全站熱搜

    tvb4life 發表在 痞客邦 留言(0) 人氣()