占士甸峰(原名李民峰) 32歲YouTube Channel: ATVB占士甸峰現職網站平台編輯,眼見樓價貴到唔合理,一啲平價舊樓又要被迫拆卸起貴樓,買樓只能夠發夢,惟有拍片發洩。

爆 Like王

恥笑大劉仔離地 《 2017買樓一定得》導演:朋友話我好 funny

Ads by Google

「睇少啲戲、去少啲日本,每月儲 3千蚊」就可以買樓?儲夠錢畀首期都可能要 40年啦!劉生部計數機可能同樓市一樣 short short哋,但係市民個腦冇 short,一面倒恥笑之餘更有網友拍片諷刺劉生離地無知,好似新進 YouTuber占士甸峰(真名李民峰)仲搵埋甜筒輝拍咗套《 2017買樓一定得》,笑吓好過啦!

F:你拍嘅片同住屋有關,係咪對香港住屋問題有特別體會?


甜筒輝喺《 2017買樓一定得》飾演地產佬劉蟹,鬧占士甸峰做人冇層樓不如死咗去。YouTube畫面

占:近排劉生叫人去少啲旅行, anyway我覺得佢其實係好人嚟,只係想叫大家少啲娛樂、少啲旅行去儲啲錢供首期啫,只不過用咗啲例子代咗入去,俾網民放大咗。你諗下如果買樓,你就要放棄你平時嘅享受,你想享受就冇機會上車,我覺得好公平㗎!睇你點選擇囉!好似我之前同屋企人住天水圍公屋,𠵱家只因為方便返工租咗私人樓住,計一計每月使多一、二千蚊,但慳咗啲時間,可以做 freelance搵番,都係一種選擇啫!

F:點解會拍片?


占士甸峰一個月前至開始拍片,片中不乏囡囡,佢解釋:「網友鍾意睇女嘛,視覺上係好啲嘅!」

占:嗰時同朋友一坐低就係講佛光街(野戰男女短片)單嘢,講講下就話不如拍啦,又不如立亂嚟炒埋一碟啦!因為我哋都係想好多人去睇啫,你知𠵱家香港人好揀擇啦,如果剩係講佛光街我諗唔得,加啲殘廁啦,咩都抽水啦!拍晒至考慮到係咪同住屋問題有關呢?至加番啲 message落去。

F:點解同甜筒輝一齊拍片?


《做完愛.回家之緊火雲銷》去番「佛光街打野戰」事件現場拍攝,遇到鐵馬,占士甸峰話:「我心諗係咪想趕我哋走,點知個警察話:『呢個位值得留念嘅!』就走咗,勁好笑!最衰冇拍低啦!」YouTube畫面

占:係喺機緣巧合下經朋友介紹,我一見面就扮佢場戲:「哈哈哈哈佛大學?」佢喺度笑,佢好鍾意傾關於星爺啲嘢,傾傾吓就 friend咗。佢真係接觸過娛樂圈,係幾資深嘅演員,雖然我哋都笑佢咪又係咖哩啡一個!但行內好多人認識佢,佢係編劇協會會員,佢思維好得,有佢喺度俾到好多意見,應該點拍都有好多 idea。

F:你外表都幾突出,係咪想入娛樂圈?

占:細細個啲朋友已話我好 funny,唔做戲嘥晒,𠵱家年紀有番咁上下,想認證下啫!我想令大家開心,做馬騮戲冇乜所謂。其實之前經朋友介紹,去咗拍《忠烈楊家將》嘅 making of,原來拍戲現場係咁嘅,原來要安排咁多嘢,就產生咗拍嘢興趣,但又冇諗過入娛樂圈,只係突然間屎忽撞棍啫,啲 friend唔鍾意對住鏡頭,推我去做主角啫!

F:《 FACE》 占:占士甸峰 攝影:楊學美術:姚岱其

    全站熱搜

    tvb4life 發表在 痞客邦 留言(0) 人氣()