文善彤( Cherie) 24歲 城大人力資源管理 Yr.3原來 Cherie嘅師傅就係 02年世界泰拳冠軍,有「轟炸機」之稱嘅向柏榮, Cherie每日要同師傅對打。

Main Camp

節食跑山打擂台 城大女拳王:好享受被對手打中

Ads by Google

夏天到,絲打們為着背心熱褲,修身減肥係指定動作。現就讀城大人力資源管理 Yr.3嘅文善彤( Cherie),三年前跟朋友一齊去學泰拳希望修身減肥,點知打打吓上晒癮,超享受擂台格鬥互毆快感,而 Cherie邊打邊苦練,去年終於奪得香港 57公斤組別冠軍。
正常女仔怕痛怕瘀又怕操到肌肉一嚿嚿,但 Cherie講起打拳就勁雀躍:「可以同人對打令我好 hyper,我好享受被對手打中。」

通常女仔打泰拳都俾人當 TB,不過上週三( 27日)見 Cherie着住黑色 leggings加短裙,講嘢陰聲細氣,好難想像佢係現任香港泰拳 57公斤級別女拳王,出戰 8場只輸過 1場的 Cherie話:「雖然我唔化妝唔油指甲油,但我都貪靚,而平時我好文靜,得閒會睇書同煲韓劇。」不過為咗泰拳, Cherie將長髮剪短、戒糖節食控制體重,打到成身瘀傷都在所不計,冒住家人反對仍要打拳,「咁我真係好鍾意泰拳嘛,要我犧牲晒其他嘢都冇所謂,況且香港女仔打泰拳啲力無咁猛,唔驚打到口腫鼻腫,最多都係腳瘀。」




由初初體重 70幾 kg,到𠵱家貴為香港冠軍, Cherie話 3年多來苦練冇白費。網上圖片


14年 9月嘅香港泰拳拳王爭霸戰, Cherie成功擊敗 20多名對手,奪得 57公斤組別的冠軍。網上圖片


咪以為 Cherie係女仔,向師傅就會手下留情,對抗練習下下都打到嘭嘭聲,聽聲都覺得痛。 3年冇拍拖

在香港打擂台比賽的女拳手不多,平均每個重量級別只有廿幾人,好似 Cherie咁享受拳擊的女仔更加罕有,「打拳嘅招數千變萬化,唔似瑜伽咁悶,上到台可以用番師傅教過嘅招式,同人對打令我好 hyper,我好享受被對手打中,然後再狠狠還擊嗰種感覺,加上在場觀眾嘅歡呼聲,真係好有滿足感!」
雖然唔似《激戰》彭于晏咁推車軚,但 Cherie一星期都練足 6日,每次練 4至 5個鐘,跑山體能樣樣齊,「我幾乎每日都會俾師傅操到喊,一來辛苦,二來反問自己,點解唔可以再好啲!好多時操得太激,返到屋企攤上床典成粒鐘都瞓唔着,到瞓着仲會發夢起飛腳彈起,起身又會想嘔,不過可以出賽,呢啲濕碎碎!」除咗狂操,仲要節食,「每日餐單多肉多飯多菜,比賽前仲誇,水都唔可以飲多滴。」只不過咁操法,連讀書都分身不暇,更莫講拍拖,「自從三年前同男友分手,之後開始學打泰拳就冇再拍拖,連溫書都唔夠時間,仲邊有時間拍拖,不過我又唔係好恨拍拖,總之順其自然啦。」
快將畢業嘅 Cherie坦言冇諗過自己前途:「未諗做邊行,不過嚟緊畢業後都應該做住兼職先,因為想打多幾年泰拳,想不斷進步拎冠軍,衝出國際。」




Cherie一星期 6日都會以跑山兼跑街作為訓練的開始,一跑就 8km。


衣着少女其實 Cherie份人好貪靚,平時唔使練拳嘅日子,打扮好少女㗎!


多菜多肉每日除咗多肉多飯多菜,清淡少醬汁之餘仲要戒甜嘢,只可飲水飲奶,辛苦過軍訓。


GPA過 3好多同學識落先知 Cherie(左)係泰拳高手,笑言最多同學同佢講嘅係「唔好打我!」 中學生練大隻變拳王

近年愈來愈多學生參加拳賽,而且成績好彪炳!其中元朗公立中學校友會鄧兆棠中學的楊翱禧( Gary),初初都係想似張家輝咁操到變鋼條,但上泰拳班嫌唔夠刺激,索性主動要求教練用職業拳手嘅訓練模式去訓練佢:「教練見我咁大口氣當然奉陪到底,不過操咗幾個月見我又抵受得住,建議我不如去參加比賽,跟住 2013年就上台打公開賽,結果就拎咗冠軍,我都估唔到。不過自己因為要考 DSE而中斷咗一年練習,希望上咗大學可以再打比賽!」




楊翱禧( Gary) 18歲網上圖片


Gary話 18歲以下嘅泰拳比賽要帶頭套同護腰,唔使驚打到流晒血。網上圖片 撰文:彭家駿
攝影:周倪瑩
場地提供:榮拳館

    全站熱搜

    tvb4life 發表在 痞客邦 留言(0) 人氣()