日韓到會

天王嫂 朴秀珍

Ads by Google

近年韓流聲勢有增無減,不過帶起韓流嘅始祖,一定要數十幾年前嘅《藍色生死戀 2》,當年迷倒唔少少女(而家變晒中女)嘅裴勇俊,今年已經 42歲,宣布即將榮升人夫,秋天會同女演員朴秀珍結婚。
朴秀珍係邊位?做過啲咩戲?點樣可以俘虜一代天王?只係想講一句,天王嫂呢份工唔易做,祝你好運! 


女團出身 主持突圍

朴秀珍今年 30歲, 16歲嘅時候已經加入娛樂圈,當年仲係中學生嘅佢被星探發掘,成為少女組合 Sugar嘅成員之一。組合成員仲有《 Kill Me Heal Me》嘅女主角黃靜茵,以及去咗日本發展嘅 Ayumi(而家改咗名叫 ICONIQ),出咗 4隻迷你大碟,仲去過日本發展。 2002年出道,第一隻大碟叫《 Tell me why》,四個女孩子嘅可愛甜美舞步及輕快曲風,令人留下深刻印象,係當年嘅新人王。組合於 2006年解散,朴秀珍就個人發展,轉型做演員,雖然參與多套人氣電視劇嘅演出,不過多數都係配角,最令人印象深刻係 2009年喺《愛你千萬次》,同 Super Junior成員希澈做歡喜寃家,以及 2010年喺《我的女友是九尾狐》做第二女主角。直到 2010年,朴秀珍終於搵到自己嘅方向,就係做主持,佢憑主持美食節目《滋味行》而人氣急升,因為佢喺節目入面不停食,完全放下女演員身份,毫不造作,形象非常討好。節目拍到第 4輯,被節目介紹過嘅餐廳都會大排長龍,難怪可以長做長有,朴秀珍都話結婚後會繼續主持。

朴秀珍入行十四年,從未做過女主角,終於喺人生大事上威一次,嫁俾老闆裴勇俊,升格做老闆娘。

90年代係韓國女團嘅戰國時代,朴秀珍(左二)嘅 Sugar算係壽命長嘅一隊。

喺《我的女友是九尾狐》入面做李勝基暗戀嘅師姐,典型女二角色,陷害女主角,唔討好。

做飲食節目,最重要係俾觀眾覺得食物好食,朴秀珍每次都大啖咁食,食相完全唔似其他女演員咁扮嘢,反而令人對佢好感度大增。
安慰情傷生情愫

樹大招風,朴秀珍被起底,網民發現佢都係有料之人,仲有長腿,天王睇得上眼都有番咁上下。

今年 2月,裴勇俊宣布同有錢女友分手,三個月後,已經話同朴秀珍結婚,佢哋相差 12年,本來大纜都扯唔埋,究竟愛火係如何點起?原來上年 3月杉秀珍加入裴勇俊旗下嘅經理人公司,本來都無乜來往,直到裴勇俊失戀,有雜誌爆料指當時裴勇俊受咗好大打擊仲病埋,杉秀珍好細心咁照顧佢,因而擦出愛火花。雖然只係拍拖短短三個月,不過覺得同對方好夾好有默契,於是決定今年秋天結婚,雙方仲已經見埋家長。閃婚消息傳出之後,引起各界討論,有人話佢哋決定得咁急,可能係奉子成婚,不過當事人否認。其實裴勇俊已經 42歲,近年退居幕後打理生意,以為結婚唔會帶來太大影響,不過公司股價喺公布婚訊之後立即急挫 5%,唔通師奶 fans全部沽貨?

一個月前,朴秀珍喺 Instagram上載婚紗相,仲話自己即將結婚,原來一早已經有暗示。

由於外界對婚訊諸多推測,朴秀珍以親筆信交代心情,指自己「搵到過一輩子的人」, sweet到爆。

朴秀珍雖然無乜代表作,不過情史就非常精彩,曾經同東方神起嘅允浩傳緋聞。

裴勇俊近年專注從商,上次露面係兩星期前,陪旗下藝人金賢重入伍。

撰文:關錦雯
nextb@nextmedia.com

全站熱搜

tvb4life 發表在 痞客邦 留言(0) 人氣()