熱到爆

殺入工廈 至激新玩

Ads by Google

怕曬怕熱又怕落雨打風的女生,夏天開 party去哪裏好?齋去 cafe玩 boardgame太冇活力啦!擅長「捐窿捐罅」發掘新玩的新城數碼音樂台 DJ好友陳禮賢( Joey)今日帶領 DJ小花啫喱、 Peony、 Cherry夥拍《忽周》 App主播落思,殺入工廈,一次過試齊 2個新玩:用腳踢的巨型桌球 PoolSoccer,以及走入室內沙灘玩沙及充氣遊戲如笨豬跑、射籃球等,既緊張又刺激,最正係一邊嘆住冷氣一邊玩。

雙腳當 Cue棍踢桌球


紅遍東南亞的韓國綜藝節目《 Running Man》,早前都有玩過巨型桌球,不過係用手碌保齡球,嬌滴滴的宋智孝仲連入兩球,勁呀!

「波,並唔係咁打㗎。桌球,梗係用腳踢啦!」 Joey說。
講緊嘅係歐美勁 hit、於半個月前引入香港的 PoolSoccer,是美式桌球與足球的 Crossover,棄用 Cue棍,改用腳踢。 Joey更自言,分分鐘一「腳」掃清袋喎。
DJ們同忽周 App主播一行四人,嚟到 2,000呎的 BALL ROOM。睇見個場外形似巨型版桌球,實木枱坐落地面,鋪上綠色加厚地氈,面積有 6× 3米,共 6個袋口位,有 15個顏色波加白波變成特製足球, Size似 3號(五人足球嗰款)足球,令他們都不禁「嘩嘩聲」!唔講咁多,五秒內分成 Joey和 Peony一隊,主播落思和啫喱一隊,立即開波!負責人 Kase即搶說:「記得除鞋才可落場呀!」

點玩?「 Number 8」的基本玩法,是利用 7個實色波、 7個間條波、 1個黑波加 1個白波。開波一方的白波首碰邊款波為自己所屬的顏色波,入晒 7個,最後入埋「黑柴」為勝。熱身一輪, Kase強烈推介:玩隊際 2對 2,傳出白波時可由隊友接應傳送,講默契考策略,好玩刺激得多!大戰 3個回合,啫喱同落思憑住默契傳波,以 2勝 1負,勝出!

刺激度:★★★★★
好玩度:★★★★★
喘氣度:★★★
( 5★為滿分)




現場以黑色牆身設計,配合昏暗燈光,擺設深啡色木櫈、皮梳化,頗有格調,同時營造出「波樓」 feel。


話明巨型版桌球,連三角框都零舍巨,需要 2個女仔才搬得郁。


除了黑白波,足球上印有實色及間條作分組。 踢波有蹺妙!

 




1.用腳底推,較易控制力度和角度,又唔會弄傷腳趾,新手必學。


2.二人傳波,是由 BALL ROOM負責人創出。將足球融合美式桌球的玩法,啫喱先傳白波,在波未停定時再由落思接應,務求更準確撞中間條波入洞。話咁易,又入一球。 玩後感

 




Joey隊:個波比一般足球重身,冇咁易彈走。原本想挑起波玩花式都難啲。


落思隊:唔識踢波未必會輸,唔係講技巧與力度,又唔使扭波,最緊要二人合作度位傳球,連入兩球都話咁易。 型玩英式高速滑沙壺

小記仲發現,除了 PoolSoccer,場內亦有 Original版美式桌球、 boardgame、 PS4及賽事直播,甚至連罕見的英式桌上沙壺都有。玩法似冬奧比賽項目冰壺,改為喺枱玩,冰賽道改以鋪沙,推金屬餅滑向三角形得分區,高分者為勝,都好刺激!
落思玩咗 2回合,已掌握玩法,仲話最緊要手夠定,輕力推餅,一日唔落「坑」在枱面,都仲有機會被撞入得分區。




兩邊枱都有計分區,玩完一邊再玩另一邊,設計窩心。枱上如氧氣珠的白色沙,名叫速沙,鋪滿枱上助滑行。


落思在第 2輪推餅(紅色)分別得 3分及 7分,以 2分之差,稍勝 Joey。

點玩?如金屬餅完整地滑入分區,即得該區分數;如餅停在「責界」則計細分,推完 4餅計枱上得分,高分為勝。

刺激度:★★★★
好玩度:★★★★ 1/2
喘氣度:★★

BALL ROOM
地址:觀塘興業街 14號永興工業大廈 12樓 C1室 營業時間: 12nn-12mn
入場費:成人$35/小時, 6歲以下小童$20/小時,包 1支飲品。 PoolSoccer需額外收費為每小時$100,人數不限。
查詢:致電 5405 4594,或瀏覽 facebook: theballroom.hk




設有 100吋大銀幕,遲啲球季可約埋球迷 friend一齊睇波。


Joey忍唔住篤番兩板先。 室內沙灘

最正碌地沙兼喪跑
位於觀塘工廈的室內沙灘,早前被網友狠批,指「無水無陽光無女𥄫」,我們倒是贊同!固然,到戶外運動出身汗,又可曬日光攝取維他命 D,健康啲!不過對於從不曬太陽又怕熱的四位主持主播來說,移師到室內沙灘,都是不錯的選擇。 Sand House至目前為止算是香港首間室內沙灘,面積達 4,000呎,沙灘位置佔 2,500呎,另設有兩間分別為 500呎及 200呎 party房。
甫進場,面前就是有冷氣有天花的沙灘。唔講咁多,立即踩落 12厘米厚沙,觸感幼滑唔拮腳,好過真正沙灘。此外,場內有大型充氣遊戲,必玩最受歡迎的笨豬跑,仲有移波波、射籃機等,又跑又跳,唔怪得冇落水都濕身。

刺激度:★★★★ 1/2
好玩度:★★★★
喘氣度:★★★★ 1/2




場內提供多款球類,隨手拎起西瓜波擺個 mini龍門就玩得一餐。 Joey掟入一球啦。


沙粒自國內引入,負責人話隔天會以 1:99雙氧水及紫外光燈消毒,咁乾淨,點碌都唔怕啦。


兩間 party房均設有 boardgame、足球機等娛樂設施,啱靜態的你。


近門口位置,設有儲物櫃,可租用擺放個人物品,比去户外沙灘方便又安全得多。如 book房或包場活動,放入房間就得。大型$20,小型$5 玩後感

 




落思隊:喺呢度踩沙走動唔刮又唔辣腳,兼且汗都冇滴,又做到運動,正呀!


Joey隊:充氣笨豬跑佔咗近 1半空間,我哋玩手球地方細,不過可以短距離勁射,冇乜難度。 笨豬跑

着起連住橡筋繩的安全衣、戴頭盔就玩得。設有兩條 10米長充氣跑道, Joey和啫喱各佔一條,跑向前,與背後的橡筋繩角力,加上跑道有沙粒,跣住跑仲刺激。最後 Joey將手上魔術貼黐得較遠,稍勝!記住跑完唔好放軟身體,否則被橡筋彈後,一仆一碌!

刺激度:★★★★★
好玩度:★★★★ 1/2
喘氣度:★★★★







室內樓底唔高,左邊跑道上仲有冷氣機,跑時身體要向前傾,戴埋頭盔,有 5呎 6吋高的你,小心撞頭! 

移波波
用豆袋擲走浮起的波波,擲走最多波者為勝,極考眼界。

刺激度:★★★
好玩度:★★★ 1/2
喘氣度:★

Sand House
地址:觀塘開源道 77號業發工業大廈 1期 6摟 D室
營業時間:星期一至日: 24小時開放,需預約。
收費:星期一至五: 1位成人+1位 12歲以下小童$130/6小時,遊戲包括沙灘玩具、飛碟、兒童狙擊槍、沙灘足球、閃避球及層層疊。
另有假日套餐(最少 6人):成人$158/2小時, 3歲以下小童$79/2小時,包括隨機充氣遊戲 2款。
查詢:可致電 5593 9711,或瀏覽 facebook: SandHouseHK

撰文:石美寶
攝影:周芝瑩
錄像:周昭強
部分服裝提供: Adidas

    全站熱搜

    tvb4life 發表在 痞客邦 留言(0) 人氣()