宋智孝近年傾向鍾意演出收費台嘅劇集,新劇《前女友俱樂部》要同前男友交手,再次演繹強悍中女。

電視精

宋智孝搞唔掂姊弟戀

Ads by Google

期待已久嘅金秀賢新劇《 Producer》終於喺星期五播出,呢套劇被視為今年重頭之作,其他電視台唔敢正面交鋒,紛紛調動節目免做炮灰。收費台 tvN偏向虎山行,推出新劇同《 Producer》打對台!
搵嚟宋智孝做女主角嘅《前女友俱樂部》,行愛情小品路線,男主角係今年飛躍進步嘅卞耀漢,卡士同隔籬台無得比,諗住靠口碑搶客,衰晒,對神劇完全無法構成威脅!慘!

同時段對《 Producer》

上年嘅《急診男女》,喺《 Running Man》做慣女神嘅智孝 BB,傳神演繹失婚中女,同崔振赫做歡喜寃家,產生化學作用,喺收費台創下 5.9%高收視。相隔一年,智孝再次參與 tvN嘅電視劇,喺《前女友俱樂部》入面,又係做甩拖中女,睇嚟智孝嘅盛女形象真係深入民心。故事講智孝係一個電影製作人,因為公司面臨倒閉危機,於是改編人氣網絡漫畫拍成電影搏翻身,才發現個漫畫家係自己前男友,漫畫內容係佢同其他前女友嘅愛情故事。智孝重遇前男友,兩個人先係火星撞地球,最後會否再續前緣?故事係俗套到不得了的愛情喜劇,要做得好睇一啲都唔容易。作為收費台嘅 tvN,喺製作電視劇上偶有佳作,由《請回答 1994》、《急診男女》,至上年年尾嘅《未生》,都贏盡口碑,收視更加跑贏免費台劇集。今次嘅《前女友俱樂部》,咁啱同金秀賢主演嘅神劇《 Producer》同一時段播出,收視無得比,不過口碑絕對可以一拼!




劇集入面,講卞耀漢同智孝係同年,現實生活中,男方比智孝細 4年,睇落始終唔太似,根本就係姊弟戀。


卞耀漢上次喺《未生》做擦鞋仔,今次形象 180度大改變,喺劇中對個個女仔都咁好,已經有新花名叫「曖昧暖男」。


智孝做慣綜藝節目,喺劇集要搞笑一樣無底線,第一集已經著古裝貼大粒癦。


《前女友俱樂部》梗係唔只一個成員,幾個前女友見面,不難想像最後必定大打出手。


其中一個前女友,係前 T-ara成員花英,當年有傳被其他隊員欺凌以致離隊,今次做狐狸精搏翻身。 《未生》男配角上位

叫得做《前女友俱樂部》,前男友嘅人選都好重要。今次同宋智孝鬥氣嘅係卞耀漢,對於劇迷嚟講,佢個名可能比較陌生, 2011年以 25歲之齡先出道,起初主要喺電影圈發展,拍過多部獨立電影,直到上年拍《未生》,正式投入電視界。佢喺《未生》入面飾演男主角嘅同事,係每個人身邊都有嘅典型諸事八卦擦鞋仔。卞耀漢演活咗角色,隨即片約不斷,今次《前女友俱樂部》更加一躍成為男主角,性格溫柔體貼但優柔寡斷,周旋喺四個前女友之間,傻更更咁非常討好。宋智孝配卞耀漢呢對彷姊弟戀,俾人感覺好新鮮,加上女仔強勢男仔弱勢,正正就係時下男女嘅寫照,應該令女性觀眾更加投入㗎。可惜,頭四集收視暫時未如理想,只係僅僅有 1%左右,隨住《 Producer》開播,更有機會再下跌,睇吓之後有無機會力挽狂瀾!




《前女友俱樂部》梗係唔只一個成員,幾個前女友見面,不難想像最後必定大打出手。





撰文:關錦雯
hotpot@nextmedia.com

    全站熱搜

    tvb4life 發表在 痞客邦 留言(0) 人氣()