80分

私口味

凸務 Madam

Ads by Google

𡃁仔時,睇《精裝追女仔 2》,係真心地覺得好無聊,但好好笑,便不無聊。好笑到一個地步,再睇重播,即使中間隔住廣告,仍然覺得好笑。只是現在再看,一諗起亞洲電視,一見到王晶,感受便變得複雜。像今日看《國產凌凌漆》時,見到李力持的名字,很多反應也不再像昔日的直接和單純。



仲覺得過氣的人和過氣的事仍然好笑,可能因為真係太耐無稱得上好笑的喜劇。在香港,周星馳後,任何一個也不在同一檔次。在荷李活,全盛時期的占基利( Jim Carrey)稱霸江湖,但近年孭到飛的,是 Adam Sandler,是 Ben Stiller,是 Vince Vaughn,講真,好多套,我唧都笑唔出。幾年前,爆出《醉爆伴郎團》( The Hangover),靠團隊合作,再拍下去,又不外如是。鬼佬版林敏驄 Zach Galifianakis似曇花一現。
估都估唔到,走勢更好的,是跟風之作《最爆伴娘團》( Bridesmaids)的導演 Paul Feig與女主角 Melissa McCarthy,看二人第三度合作的《凸務 Madam》( Spy),有一剎那,我覺得似在看《富貴逼人》,電影固然帶港產片味,例如一場廚房大戰,用餐具作武器,你就幾乎想送條大香腸俾佢; Melissa McCarthy也真有點肥姐氣場,肥,但靈活,惡得來討好。在《凸務 Madam》,最出乎意料的,卻是將傳統男性英雄踩得非常徹底。
以 Melissa McCarthy作主導,劇情講一個毫無實戰經驗的 CIA OL,為幫暗戀多年的特工拍檔報仇,首次出差,打擊核武器買賣。如此劇情,很正路,當然係講到呢位中女禾稈冚珍珠,勁到無倫。加插了 Jason Statham扮演經驗豐富的男特工,以為符合演員一貫形象,負責幫女主角解決危機,點知,原來只係個吹水怪,在任何範疇面對任何情況,只懂一味吹噓自己有幾勁有幾勁,其實根本一事無成,連普通常識都沒有。動作片巨星轉拍笑片,史泰龍與阿諾舒華辛力加,甚至雲迪素,都試唔少,但搞完笑,一手搞番掂嘅,始終都係靠這班大俠的驚人智慧和超乎常理身手,邊似 Jason Statham咁慘情,除了負責被嘲笑,被戲弄,直到結局,也毫無證明過自己能力。偏偏,他又會在散場前得到彩蛋。看完電影,你會明白集導演與編劇於一身的 Paul Feig,對世情實在太了解,女人表面上迷戀俊男,但到最後係會揀一個氹到自己開心的吹水怪。我在現實生活見過太多,幽默感遠比你想像的重要,只可惜,女人眼中的幽默,跟我眼中的幽默,永遠隔住一條鴻溝。
因為這一點,我對導演再用 Melissa McCarthy的女版《捉鬼敢死隊》充滿期待。有冇深度有冇哲理政治正確不正確 cheap唔 cheap賤格不賤格,好小事,我完全不介懷。只要好笑!你知道我們有幾耐笑唔出嗎?

方俊傑
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()