魚介豚骨番茄海蝦沾麵$88食唔出番茄同海蝦味,淨係有魚介胡椒味,叉燒粒同筍都喺湯入面。

試食王

MK熱石麵得個玩字

Ads by Google

拉麵好似不復當年勇,不過每兩三個月仍然有新店繼續開。旺角漁場台風其實係荃灣拉麵台風的姊妹店,成個餐牌唔同,唔似得豚王開幾多間分店都係一模一樣。鋪頭貼滿海報,仲放滿一樽樽魚乾同埋木牌,好有日本魚市場 feel。店員好有禮貌,一坐低就俾膠箱我哋放袋,仲問我哋使唔使要多個膠箱來墊腳,食碗拉麵都咁貼心,加分。

日頭賣沾麵,夜晚賣拉麵,想試晒兩種就要幫襯兩次。沾麵有三款選擇,日本師傅整完就會以日文大聲叫喊,好有氣勢。先試番茄海蝦沾麵,雖然有一大堆櫻花蝦,不過湯底冇乜蝦味,又完全冇番茄味,只係食到好大陣胡椒味。反而焙煎黑芝麻味幾好,芝麻味香濃突出,麵條粗身煙韌,有質感,好食。食到中途,店員主動問我哋需唔需要加熱石,將兩粒石放入湯中,湯立即咋咋聲,不過加咗熱石之後,碗麵都只會變得微暖,啲湯唔會滾起,似 gimmick多啲。




每人有兩粒熱石,又重又大粒,加咗落湯咋咋聲又標晒煙,視覺效果一流,不過湯底轉眼就開始凍。


可以唧檸檬入湯,令湯底清新冇咁膩。


魚介豚骨焙煎黑芝麻沾麵$85黑芝麻味幾濃,沾麵湯亦有一大堆白芝麻,夠香又唔鹹,推介。


燒海蝦味豚骨拉麵$88話係最受歡迎款式,蝦味比午市的沾麵突出,好味。


拉麵食到尾,愈食愈覺得少湯,好似食撈麵咁,如果可以多番啲湯就更好。


沙甸魚味豚骨拉麵$85(加紫菜$10)有成五六塊紫菜,沙甸魚比鰹魚味清淡同多一分鮮味,唔鍾意太濃味可以試。

夜晚有四款拉麵,店員好詳細咁解釋魚介、鰹魚同沙甸魚有咩分別。沙甸魚面層有魚乾仔,賣相吸引,魚味清香,唔會一味死鹹。蝦味聞落好香,但食落唔算太濃,比午市的沾麵好味。麵條比一般拉麵店的分量多 1.5倍,真係幾大碗,但冇得揀軟硬度,一上枱已經係硬身。晚市嘅叉燒比午市好,原塊腍身有肉味,不似沾麵的角切叉燒支離破碎,一粒好乾好嚡另一粒又肥。整體質素唔差,難得午市同晚市唔使排隊,又唔使加一,食得過。




餐牌寫明午市賣沾麵,夜晚賣拉麵,仲畫上可愛漫畫公仔。


兩個日本師傅負責煮麵,好有日本小店氣氛。


鋪頭呈 L形,唔係吧枱就係面壁位,勝在闊落唔使背貼背。 評分

食物:★★★ 1/2
服務:★★★★★
環境:★★★
抵食:★★★★



漁場台風
地址:旺角快富街 39號建煌華廈地鋪
電話: 2487 4488
營業時間: 12nn-3:30pm, 5:30pm-10:30pm

撰文、攝影、攝錄:試食王
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()