被 270度的大熒幕包圍嚟踩單車,像置身真正戶外環境,好玩過齋踩。

太爛玩

踩單車 中環踩上雪山

Ads by Google

想減肥?用黎明嗰招靜坐減肥法?咪證實咗失敗囉。嫌辛苦,不如試吓喺中環踩 35分鐘單車,唔使曬,有得涼住冷氣,可以一邊聽住強勁音樂,一邊飛越雲霄冰川。
座落於蘭桂坊的 Pure Fitness健身中心,打造全球首個 270度巨形落地熒幕,將健身室變成超級影院。運動與虛擬世界結合,即係點?即係打機都打到你出汗兼減肥。

無咪錶無壓力

平時踩室內健身單車,都見啲教練同學員好 hyper,邊踩邊叫。對住 270度巨型落地熒幕踩,當然更興奮。雲層、冰川、日落、未來世界、重重障礙物,景色不斷轉,教練跟住賽道同音樂節拍,大叫左轉右轉、上斜落斜、企起身、坐低。 35分鐘的「 The Trip」虛擬單車班,你肯跟足教練指示全力去踩的話,能夠燃燒 500卡路里。記者試踩,感覺似打機,要投入,就要先愛打機才說服到自己。
The Trip的單車不似一般健身單車標示距離和速度,反而只有一個手動按鈕,用來增加或減少單車的阻力。咁咪唔知自己踩咗幾遠,達唔達標?教練 Leisa和 Daniel解釋,希望學員能盡最大努力去踩,但同時亦希望大家享受到精彩的視覺和聽覺效果,不用分心在錶板上。一般室內單車課堂,教練的單車通常面向學員,但在 The Trip的課堂中,教練的單車和學員同一面向,藉此營造「同隊」的團結感覺。




坐上單車,如果 seat位太高,會踩得好辛苦。最理想位置是企起身時, seat位與盤骨位高度相若。





腳踏位不用扣得太緊,方便雙腳着地,用來保持平衡。


手動按鈕可以調校單車的摩擦力,扭得愈緊愈要用力踩。如需緊急停車,可以用力按下按鈕。


虛擬搏擊都得

健身中心會不時推出新賽道,令學員日日踩都唔悶。虛擬影院健身教室日後更會有不同課程,如搏擊、太極、武術或者較為柔和的 body jam、 body balance等。想像吓一邊與對手搏擊,眼前不停出現障礙物,要揮拳擊破或跳起避過,絕對是 4D打機體驗。




當畫面轉為上斜時,教練會叫大家企起身踩。好攰㗎!


上堂前可以先選定單車座位,坐近中間,視覺效果會更逼真。 最激不停轉動攀石牆

想刺激啲,可以玩攀石牆( Freedom Climber),與一般攀石牆不同,這一幅會不停轉動,你可以無限攀爬直至頂唔順先停低。教練 Pago示範攀爬技巧前,先調校攀石牆轉動的速度,轉動較慢,較適合初學者。
睇 Pago爬得好似好輕鬆,其實起初要先摸索一下平衡感,而且因為牆身會轉動,好難後退,所以每踏出一步都要想清楚,否則好易踏空跌親。如果已將牆身轉動調校至最慢,仍然覺得太快, Pago就提醒大家可以盡量將身體和四肢靠向牆身,能再減低牆身轉動幅度。攀石可以訓練大腿肌肉外,還可訓練深層肌肉踢走脂肪,亦能提高平衡力和穩定性。




Freedom Climber的牆身會邊爬邊轉,以增加難度。


攀爬前調校好牆身轉動的速度,初學者千萬咪高估自己,玩最慢的就好了。


手伸得愈直,身體距離牆身愈遠,動作愈大,牆身會轉得愈快。


爬繩結( climbing ropes)看似簡單,其實非常難平衡。





想向更高難度挑戰的話,可試爬無打結的繩索。無繩結作雙腳支撐,連歇息的時間也沒有,難度大好多。 草地推車減手臂

喺夏天無可能唔著背心短褲,有「拜拜肉」和「水腫腳」煩惱的女生,呢款 Sled on Athletic Turf草地雪橇運動,一次過可以鍛鍊晒兩組肌肉,啱晒你。人造草地增加阻力,臂力與大腿需一同發力,最適合打欖球、踢足球人士,以訓練向前衝的爆炸力。記得推時要坐低身,否則易傷腰。




女生推的雪橇比較細和輕身,與草地的摩擦力也較小。推雪橇時要注意姿勢,手臂盡量伸直,雙膝成弓字向前推進。


要練大力啲可增加負重,可選擇不同磅數的鐵餅。 體操由地面做起

睇奧運,見到體操選手喺單雙槓上跳來跳去,仲有吊環,都覺得一般人無可能做到。但原來要學體操,無想像中咁難。一切由坐喺地上做起,教練 Tom教學員先坐在地上,練習一些在槓上的基本動作,令雙手習慣如何發力。大約一星期練習二至三次,約二至三個月便會慢慢掌握,到時便可轉在槓上練習。
女生的體操項目相對溫柔,同樣在地上進行,利用 wall bar可以做倒豎葱和其他伸展的動作,有助訓練核心肌肉、手臂及膊頭肌肉。




體操教練 Tom玩體操項目已超過十年,雙槓當然難不倒他。


初學者可先坐在地下開始訓練手臂肌肉,手臂夠力的話,會較易掌握在槓上的平衡感。





女生可以做一些放鬆關節、伸展的動作。這組動作可以強化肩膊和核心肌肉,有效操練出身體線條。

Pure Fitness 1日通行證
費用:$350(包括一節 The Trip(須預約)、其他健身項目及健身中心設施如浴室、桑拿房任用。)
查詢及預約︰ 8200 0032/
http://www.pure-fitness.com 

撰文:吳韻菁
攝影:譚俊軒
攝錄:羅錦波
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()