蟹工船蟹販市場

登機證

旅行 旅遊 食蟹要在北海道 札幌

Ads by Google

最近有冇食蟹?
冇食蟹。
咁你之前又話有食蟹?
有食蟹。
啲蟹好食定唔好食?
唔好食。
吓,咁你又食?
你又食。
……
韓國醬油蟹大熱,喂,食到食物中毒喎,即使有啲公務員,不用靠食物都可以中毒,你都無理由傻埋一份啫。潮流不必次次趕,講到食蟹,始終係北海道出品最可靠。去到札幌,嚴選四大種類的蟹宴,即場捕獲、鐵板燒、放題、居酒屋,有平有貴有冷有熱。無商無量,食硬。

 







瑠玖任食放題


古艫帆來居酒屋


蟹遊亭鐵板燒 貪搶眼搭上蟹工船

模特兒是出租廚房老闆娘,據她形容,懂性以來,已經非常喜歡吃蟹。最光輝的紀錄是連續一個月不停吃大閘蟹,吃到寒氣入骨,恍似修煉《九陰真經》,仍然不停口。開辦出租廚房,有一部分原因是希望有個場地宴請親朋戚友齊齊食蟹。
找她來札幌嘗蟹,啱晒。第一站,來到札幌蟹販株式會社。幾個售賣新鮮活蟹的攤檔, OK OK,係有埋冰鮮蟹腳,有埋蟹湯罐頭,全札幌都係啦,去二条市場咪得囉,使唔使專登嚟呢間?
唔使。所以,我其實係去市場隔籬的蟹料理專門店「蟹工船」。什麼都不用說,一入去,已經俾隻船嚇親。船形水槽內,放滿不同品種的蟹,皇帝蟹呀、毛蟹呀,數量多,體形大。最好玩係任你拎起啲蟹影相,拎隻巨型皇帝蟹出來,一定可以遮住自己塊面。不信?請看看前一頁。
咁究竟點食法好呢?蟹工場提供好多選擇,如果你是有選擇困難症的人,推介一款$840的根室宴席,刺身、天婦羅、紙火鍋、蟹湯、原隻蒸毛蟹、炒蟹粉、魚生飯,你再多心都應該被滿足。 Calanthia則推介蟹鍋:「甜豉油湯底,最能夠帶出蟹的鮮味。食蟹,都係食鮮味啫!」所以,在香港,又怎可能食到真正札幌風味呢?




你去西貢食海鮮,都有好多海鮮睇,喺餐廳門口吖嘛,要咁樣對住啲蟹食蟹,過癮定殘忍,就看閣下修為了。


根室宴席$840,呢度係一人分量,你睇睇隻天婦羅蟹腳有幾大,就知無呃秤。天婦羅不夠鮮,炒蟹粉就只吃出鑊氣,重點是碟蟹腳刺身,勁鮮甜,抵番晒。





蟹鍋$443/二人分量,蟹肉夠鮮,唔削,蟹味濃郁,甜豉油湯底是精華所在,灼兩灼已經帶出蟹的鮮味。





位置始終較偏遠,鋪頭亦不算多,人流不能跟遊客必去的二条市場比較,可能因為咁,店員服務態度好得多,你幾乎想試什麼味,通通無任歡迎。





蟹工船

地址:札幌市清田區清田 1条 4丁目 5-41
營業日時間: 11:00am-9:30pm
電話號碼: 011-844-8050
交通:地下鐵南北線大谷地站
網址: http://kanihan.com 

信名牌蟹將軍賣鐵板燒

去過札幌的人,好多都幫襯過蟹將軍;未幫襯過,經過狸小路,都會見到門口嗰隻大大嘅蟹招牌。賣點係菜式夠多,而且平。
位於蟹將軍旁的蟹遊亭,不要以為是過來抽水的二打六,其實跟蟹將軍屬同一集團,由創辦人的兒子負責營運,主打蟹肉鐵板燒。
傳統上,在北海道食蟹,不外乎製成冷盤,或火鍋。蟹遊亭卻提供鐵板燒,目標是創新,在舊一派的成功方程式中,殺出另一條路。廚師會在你面前燒蟹,由切開蟹殼到只取蟹腳,優雅得似表演。蟹當然用番北海道松葉蟹和皇帝蟹,難得牛肉都用上頂級的北海道十勝和牛,大廚更會用一塊燒上品牌名字的方包去吸油,單單賣相已經無敵。老實講,食咗幾日蟹,來一餐不同烹調方法的,實在有必要,而且,雖然鐵板燒令蟹的水分減少,感覺上不夠嫩,但多了份香氣,效果也不差。




單睇環境,已明顯睇得出蟹遊亭跟蟹將軍的街坊風情,是完全兩回事。


醃菜


沙律


原隻皇帝蟹蟹腳


是日餐湯


十勝和牛西冷厚切


是日海鮮


麵豉湯


蟹肉炒飯


甜品


大廚專心地燒製出套餐 B,一人份,仲要加埋 P.64嗰碟松葉蟹刺身,售$816,每道菜都好食,加埋的分量,啱啱好。 蟹遊亭

地址:札幌市中央區南 4条西二丁目 11
營業時間: 11:00am-3:00pm, 5:00pm-10:30pm
電話: 011-222-1117
交通:地下鐵南北線薄野站
網址: http://www.kani-ya.co.jp 

居酒屋罕有花咲蟹

北海道有三大蟹,包括較細隻,身軀上布滿短小羽狀毛的毛蟹;蟹腳特別長的松葉蟹;同埋 size最大、甲殼可以有成 30厘米闊的鱈場蟹,亦即皇帝蟹。在札幌,去間間餐廳都會有得食。
尚有第四款,花咲蟹。由於花咲蟹當造期相當短,每年只有七至九月才可以於北海道東部的根室捕獲,故此相對罕有,但係肉質最香濃又最多汁,識食一定食佢。
介紹古艫帆來,普普通通一間居酒屋,就因為有根室直送的花咲蟹菜式,變得不簡單,人氣最鼎盛係炸花咲蟹餅,啖啖肉,香氣令人難忘,只售$30一碟,齋食呢樣都值。




花咲蟹鐵砲汁$27,即係花咲蟹麵豉湯,話說蟹腳似鐵砲,所以叫鐵砲。廿幾蚊,咁足料,仲想點?


幾乎每張枱都叫嘅炸花咲忌廉蟹餅,蟹香撲鼻,$30一客,唔怕太快飽,一人食一份,唔過分。


店內另一人氣推介是焗薯,仲話一個月賣出一千份,$30,香係幾香,但味道好一般,都係食蟹好。


店算大,但食客亦多。食完飯,坐去酒吧區飲兩杯,也是不錯選擇。


古艫帆來

地址:札幌市中央區南 4条西 4丁目
營業時間: 3:00pm-11:30pm
電話號碼: 011-241-4646
交通:地下鐵南北線薄野站
網址: http://www.koropokkuru.co.jp 

順次序任食三大蟹

在札幌,最受遊客歡迎的,一定是放題。有乜嘢爽得過可以不望價錢,食完一隻蟹再食一隻再食多一隻?
無數提供放題的食肆中,我推介瑠玖,一來位於港人必行的狸小路,地理位置夠晒方便;二來係$300港紙,就可以任食毛蟹、皇帝蟹、松葉蟹粒半鐘,勁抵。
講真,質素就當然唔可以要求太高,但係啲蟹無乜雪藏味,又夠大隻,比想像中好得多,而且,上菜速度夠快,你一食完,店員就立即問你加唔加,呢樣真係無得頂。美中不足係太多規矩,續點時,三種蟹要順次序點,即係話,你唔可以不停只食皇帝蟹,一定要三款食完先再嚟下個 round。
除非,你搵到一個朋友,只愛吃毛蟹;另一個朋友,只愛吃松葉蟹。世事有這麼美好嗎?




第一個 round,就會先送晒三款蟹俾你,皇帝蟹啲蟹腳咁大條,食完第一圈,你識揀叫邊款蟹先啦。


家庭式小店,但大媽級的店員工作效率甚高,唔會出現任食所以超慢出貨的取巧情況。


雖然係放題,但質素也不俗,至少 size夠大。


除咗蟹放題,你亦可揀其他食物,例如魚生飯$84,不過,我都係建議你放題以外的,全部不用點。 有用資料

簽證:持特區護照及 BN(O)均毋須簽證
機票:捷星日本( Jetstar Japan)為擁有全日本最大飛行網絡的廉價航空公司,前往北海道的話可以選擇在東京、大阪及名古屋轉機。香港往東京於六月一日首航,單程未連稅票價$488起,每日有五至七班機由東京往返札幌,單程票價未連稅$270起。我今次則在大阪轉機,單程未連稅票價$499起;每日有兩至三班機往返札幌,單程票價未連稅$316起。玩完大阪,再去札幌,所費也不多,而班次夠密,安排行程更加有彈性!
網址: http://www.jetstar.com/hk  查詢: 3192 7451
貨幣: 100日圓約兌港幣$6.5
鳴謝:捷星航空







捷星日本已於日本營運十年,在日本營運 18條航線,來往國內 11個航點,每日超過一百班航機升降。


撰文:方俊傑
攝影:、攝錄:陳偉傑
模特兒: Calanthia Wong
mailto:hotpot@nextmedia.com

    tvb4life 發表在 痞客邦 留言(1) 人氣()