me.jpg


Julian Cheung卡其色印花 tee$2,600 Marni黑白色幼間及米色併袖西裝褸$12,999深藍色西褲$7,299both Ann Demeulemeesterall from I.T

cover face

張智霖  101分男神

Ads by Google

眼前嘅 Chilam,點睇都唔似四十有三,無論 cool魔定初哥哥,這位美魔男均演繹得手到拿來!但原來,佢覺得自己演得最好嘅,始終係老公和老爸嘅角色!
「呢方面我俾足自己一百零一分!」自信滿盈,唔係大隻廣!單睇 Chilam之前喺內地真人騷《一路上有你》,向靚靚(袁詠儀)嘅街頭求婚戲碼,就知佢有幾浪漫,仲話要為靚靚嘅強勢形象解話!
「佢份人夠真,係講嘢大聲啲,份人比較強悍,但我就係鍾意佢唔虛偽,換個陰聲細氣仲唔慣啦!」呢番愛妻宣言,都咪話唔冧!男神仲講要過幾招俾囝囝魔童咁話!
「做男仔最緊要對女仔 gentleman,呢種教育重要過成績,要拍拖就唔該學好啲!」
女士們,係咪好啱聽?最少我,表示贊同!


張智霖鍾意袁詠儀夠強悍


張智霖教定魔童拍拖


Profile
 

Julian Cheung
出生日期: 1971年 8月 27日(處女座)
出生地:香港
身高: 5呎 10吋
體重: 130磅
語言:廣東話、普通話和英語。
學歷:澳洲悉尼 Pendle Hill High School畢業
簡歷: 15歲,隨父移民澳洲。 91年,跟許秋怡合唱《現代愛情故事》達雙白金銷量。 00年,憑《十月初五的月光》獲得無綫台慶「本年度我最喜愛的電視角色」。 01年,跟袁詠儀於美國結婚,五年後,兒子張慕童出生。
主要作品:電視劇《天地男兒》( 96),《十月初五的月光》( 00),《西關大少》( 03),《魚躍在花見》( 11),《衝上雲霄 II》( 13)。電影《邊城浪子》( 92),《極度重犯》( 98),《小親親》( 00),《月滿抱西環》( 01),《天行者》( 06),《天生愛情狂》( 12),《一代宗師》( 13),《 Delete愛人》( 14),《衝上雲霄》( 15)。唱片《現代愛情故事》( 91),《歲月如歌》( 13)。
Instagram: Cheungjulian




15年 袁詠儀Chilam跟靚靚從來沒影過結婚相,《一路上有你》這張婚紗照也算圓了夢,難怪靚靚感動到在節目中爆喊!


14年 張慕童Chilam話唔怕囝囝曳,因為佢大啲就唔會成日再黐住父母,要珍惜當下。


14年今年七月的澳門演唱會,據聞亦會大騷肌肉, Chilam透露已經開始節食,令人期待! 
愛佢真性情
 


Julian Cheung黑色膠框併金屬柄太陽眼鏡$1,999 Gentle Monster白色圖案 tee$999藍白色海浪圖案西裝褸$5,499黑色 cargo pants$3,999all N. Hoolywoodall from I.T

幾時都話童顏有着數,事隔十五載,今年翻拍《十月初五的月光》,依然一臉自信唔怕比較!
「我冇壓力喎!澳門戲份已到尾聲,呢套劇太刻骨銘心,唔使翻睇,我每個情節都記得,完全掌握到點去演!我估創作團隊比較有壓力,要滿足觀眾對童年回憶嘅期望,真係少一撇都唔掂!」神劇班底再聚頭,依然 friend過打 band!「最難得大家都仲咁好、仲咁紅!」的確,歲月不饒人,想當年張生還未成家立室,心態大概也有變。
「我從來唔會將自己嘅生活代入角色,因為角色有佢自己嘅性格設定!如果要講心態上有咩唔同,大概係依家做嘢會掛住屋企人,佢哋係我努力工作嘅原動力!」昔日大唔透嘅大男孩,今日成為懂擔帶嘅大男人,仲曉派定心丸,睇嚟當年成日要去片場「探班」嘅靚靚最安心!
「哈哈,佢係比較強悍嘅,但我又覺得 OK喎,起碼夠真性情!呢方面如果接受唔到,一開始就唔會開始,亦 last唔到咁耐!
「其實我覺得夫妻一定會有磨擦同不咬弦嘅地方,平時黑吓面、鬧吓交冇乜問題吖,唔使永遠都咁夾同甜蜜嘅,接受到大家性格就得!」我好奇鬧得最勁嗰次點收科?
「我真係唔記得!人生太短,唔開心事記嚟無謂,過咗就算,不過嗌親交都係我𠱁返佢先,唔好嘥時間!雙方僵持,狀況唔會變,冷戰即係懲罰自己,咁好蠢!」睇通睇透,層次又高咗!


想有圓滿家庭
 


Julian Cheung三色針織上衣$9,400Marni from I.T

或者你就吓我我讓吓你,一凹一凸,慢慢能形成一種默契。「話晒咁多年,我哋冇默契咪仲怪!」 Chilam一向給人大男孩嘅感覺,我好奇作為老公,會俾自己幾分?「咁梗係 101分啦!」
一輪笑聲過後, Chilam即一臉認真講,「我細細個父母就離婚,總是覺得有缺失,或者我想喺呢段關係上彌補番自己嘅童年,依家唔可能再扑爛晒啲嘢,我需要一個完整嘅家庭,去圓滿自己嘅人生。」講多無謂,行動最實際, Chilam在拍大陸真人騷《一路上有你》時,就趁機喺首爾街頭,當住五百人見證下,向靚靚補跪當年冇做嘅求婚儀式,再發表「一起變老」宣言,十足韓劇橋段,浪漫到呢!
「私底下好少俾驚喜佢,好多時都係佢血拼完後,變成我嘅驚喜(笑)。近年因為工作忙,大家少咗相處嘅時間,一齊上呢個節目,反而俾機會我哋創造一啲難忘回憶。計我話,夫妻檔拍住上搵人仔,當然 OK啦!


最緊要 hea
 


Julian Cheung啡色仿玳瑁膠框太陽眼鏡$1,899 Gentle Monster黑色棉質 tee$999 Blood Brother炭黑色直腳褲$3,199 COMME des GARÇONS Hommeall from I.T軍綠色迷彩針織外套 stylist's own

咁多冧女計仔,今年八歲囝囝慕童,據聞都開始有心儀嘅女仔,有冇過兩招俾佢? Chilam一聽即笑言,「咁佢又唔係即刻要拍拖!最緊要對女仔 gentleman,學懂點去對待一個人,比考試考幾多分更重要!」會俾囝囝做童星嗎?
「將來佢入唔入娛樂圈唔到我管,但依家唔想佢多個身份返學!(囝囝有興趣嗎?)佢五時花六時變,今日話做太空人,聽日又話想做賽車手,我只想佢做個好人!」一句到尾, Chilam堅拒做怪獸家長!
「有一個 hea嘅童年好重要, hea唔係一個負面詞語,可以 hea先有時間去認識同面對自己,諗吓自己真係需要乜、唔鍾意乜。」但據聞靚靚一心想囝囝贏在起跑線喎,意見分歧點解決?「呢個係小朋友嘅命運,自然有佢一條路,聽晒我講亦未必啱!」慈父嚴母,難怪魔童勁黐 Chilam,靚靚肯定呷大醋吧! Chilam聞言笑話,「咁都冇辦法,惟有再買個包包𠱁佢!」手袋打人牙骹軟,咁識做好難嬲得你落!


後記
 

講起囝囝即一臉窩心,八卦 Chilam有冇計劃湊返個好字?「香港嘅父母搵間學校都要過五關斬六將,我覺得一個就夠,不過佢(靚靚)想再嚟多次『受難曲』,咁睇天意啦!」幾時都話,尊重老婆嘅男人,係最吸引嘅!

撰文: Bel Chow
形象: Nata Ngai
攝影: Ray Siu
化妝: Hetty Kwong
髮型: Vic Kwan@ii hair& nail
鳴謝: I.T

    全站熱搜

    tvb4life 發表在 痞客邦 留言(0) 人氣()