老公 Adrian笑指太太注重飲食後,除健康好咗亦少咗用油,廚房不再油𣲷𣲷,連洗潔精都用少啲,非常環保。 

fit一世

「食住瘦」減肥

Ads by Google

最近有研究指肥胖跟基因有關,但唔代表就可以亂食嘢唔做運動,畢竟瘦人都有三高,是會影響健康。要你做運動減肥可能無時間,從飲食入手又怕無啖好食唔符合人性,連飲水都話唔得,寧願肥死好過苦死。既然如此,有無諗過「食住瘦」?看似匪夷所思但唔代表無可能,因有實例作參考,她就是 Kay仔。

 

Kay仔高峰期重 153磅,全身脂肪比例更達 42%,屬「爆脂型」。強調肥唔係罪但確實影響健康, Kay仔說:「那時荷爾蒙失調,生理周期亦受影響,情緒低落連帶皮膚都變差。」


最近出書教人愈食愈瘦,內有好多計算營養的方法,食譜和飲食建議,非常實用。$98/本,各書局有售。 

以前去邊度都要吃,仲要好濃味。 

以前屬中央肥胖型,依家瘦咗又健康。 

好多副作用

Kay仔肥皆因愛濃味,唔肥唔油唔香口唔食,最愛打邊爐鋸扒擦 pizza,餐與餐之間更要有零食,汽水薯條薯片絕不可少。
要減肥怎會傻到針對改善自己的飲食習慣,更係邊吃邊搵其他方法, Kay仔亦然,食減肥丸排油丸,搵中醫調理兼按穴位、扎手指,甚至全戒澱粉質只吃肉和菜。
她坦言坊間所有方法都試勻,初時真能減掉一、兩磅,但「副作用亦都出嚟,面青口唇白,狂生暗瘡又爛面,瞓唔着情緒低落,那時身體真的好差。」
後來有位女西醫告訴她長此下去會影響健康,她才醒覺要尋正路搵營養師幫手。「見營養師的時間唔長,但教曉我要注意每天卡路里攝取量,如何揀選健康食材和改善進食方法。」

食住瘦不是夢


上年三月底喺 fb跟人分享減肥心得,有過萬 like。 

Kay仔開始看書研究、上網刨文,學會計算每天卡路里攝取量、看營養標籤,並鑽研低油低脂烹調法,盡量做到低糖低脂低卡低鈉。一個月下來,她減掉 8磅;半年搣甩 40磅,由 153磅變為 113磅。
「坊間普遍認為減肥就要吃得清淡,最好齋吃白灼蔬菜、水果沙律,這反而令很多人愈吃不到愈想吃,最後受不住誘惑令減肥計劃功虧一簣。減肥其實都可以好人性,只要你懂計算熱量,選對食材和方法,餐餐都可以食芝士蒜蓉焗龍蝦、荷葉海味糯米飯、泰式香辣魷魚。邊食邊瘦絕非天方夜譚,且絕不反彈。」

3款食極唔肥食譜

想減肥成功, Kay仔建議自己煮。都知你實無時間,
所以佢推介多款自創健康快捷食譜, 10-20分鐘搞掂,卡路里又唔超過 500,真係換件衫化個妝嘅時間就有得食。

香草三文魚芝士撻(食 3個約 500卡)

材料:麥包 4片,切邊壓平。三文魚 80克,切片。雞蛋 1隻,打成蛋漿。低脂芝士 1片,切條。黑胡椒和香草適量。
做法:以 200度預熱焗爐,約 5-10分鐘。麵包壓進焗模內如一朵花。把蛋漿倒進麵包內,將焗盤放入焗爐焗 10分鐘。拿出焗盤,加入三文魚片、黑胡椒和芝士條,再焗 3分鐘至芝士融化。以適量香草作裝飾即可。
唔肥原因:麥包含極低反式脂肪,且用低脂芝士(右),脂肪含量亦唔高。又或可用芝士碎代替($18-$36@各超市和烘焙店)。三文魚熱量低,成年人每周可進食 2次以代替紅肉。
忽評:咬落麵包脆卜卜,仲會爆蛋漿。有芝士香但唔肥。吃兩、三個已飽,好啱早餐或下午茶。


雜菜蟹柳豆漿燉飯( 1人用)

材料:燕麥飯 1碗。無糖豆漿 200毫升。蟹柳 4條、西蘭花 30克、洋葱 1/4個及紅蘿蔔 30克,全部切粒。油 1茶匙。低脂芝士 1片,切條。減鈉鹽少量。
做法:用植物牛油起鍋,把切好的材料炒香。倒入飯和豆漿拌勻。以細火煮 10分鐘。收汁後加低脂芝士和鹽調味便成。
唔肥原因:無糖豆漿代替高脂高卡忌廉,脂肪只有 3.2克,熱量亦唔高。亦可用脫脂奶代替。加埋盒植物牛油(左),有牛油口感又唔肥。
忽評:飯有豆漿香又不失濃滑口感。用的牛油唔會令飯太肥膩。菜多纖維高,蟹柳亦唔肥,夠晒健康。



售$59/盒@CitySuper 

芝士蒜蓉焗龍蝦

材料:龍蝦 1隻,約 1斤。蒜蓉 2湯匙。黑胡椒少許。低脂芝士條 2條。低脂噴射裝牛油適量。
做法:龍蝦放尿、洗淨、開邊,抹乾後塗上蒜蓉,並噴上牛油。放上芝士條,放入已預熱至 200度的焗爐,焗 12分鐘。撒上少許黑胡椒碎即可。
唔肥原因:每 100克龍蝦肉才只有約 110卡左右熱量。芝士有鹹味,鹽都唔使落。最重要這支噴射裝植物牛油(右),噴幾下用好少量就能覆蓋大範圍,非常好用。且零卡零脂不含反式脂肪仲有奧米加三脂肪酸,真係唔肥又健康。($59/支@CitySuper)
忽評:龍蝦有肉汁,唔嚡口,仲有蒜蓉同牛油香。


減磅要知食幾多

Kay仔話減磅最重要識計卡路里。「一般減磅速度為每星期 1至 2磅,最為健康。 1磅相等於 3,500卡路里,即每天減少 500卡路里,相當於 1碗飯加 30克已煮熟的肉類。」

推介食極唔肥零食

正餐令人肥,零食亦係致命傷。故天生愛吃的 Kay仔,
會四出搜尋零卡低脂的零食做代替品。

無糖糖($9.9/盒@便利店、超市)

口痕想食糖,不含糖分的低卡糖至啱。
二寶果汁糖更是最新出。食落九成似平時那種,雖然用代糖,但唔多覺。但每天不應食多過一包,免攝取過量糖醇而肚瀉。


日本低卡即溶咖啡($46.9@一田超市)

一般的即溶咖啡多數好甜,極力推介呢款。
每條只有 13卡, fling下手都無咗。但用的是代糖,未必人人能習慣,否則飲齋啡最好。

米餅(約$15@一田超市、 Log-On及 Health Quest)

唔講真唔知,米餅原來好肥,脂肪含量同薯片一樣。但這款米餅卻非油炸,每 100克脂肪含量低至 3.4克,真係好低脂。食落唔多油,口味較清淡。
有紫菜、 pizza、芝士等選擇。但要注意眾多口味中,以芝士味最香口同時含較高脂肪。

0 Cal蒟蒻啫喱($24.9/18粒/包@一田超市、卓悅一生良品)

夏天到梗係想食凍嘢,
但外面買到的大多數好甜。
好彩日本人發明咗這款零卡蒟蒻啫喱,無卡路里之餘,
仲有纖維。每次食 3至 4粒仲有少少飽肚感,可以過下口癮。
有什錦味和單一種味道。

零卡低糖果汁冰條($11.9/10支/包@一田超市)

純果汁製造,低卡低糖較一般果汁雪條少甜。最啱減肥人士夏天食。

零卡低糖黑朱古力(約$34/包@一田超市、卓悅一生良品)

這款朱古力, 100克才 0.2克糖,
幾乎等於無,加上零卡又是黑朱古力,不但減肥可過口癮,仲可以
抗氧化。但仍建議每周吃兩次,
每次食兩格就好。

其他進食貼士

1.唔好全戒澱粉質,最好早點吃,因為太夜吃怕變醣分積在身體,好易肥。
2.煲老火湯盡量用瘦肉,而且飲 1小碗就夠。
3.原來每天少食多餐,身體會額外消耗多約 200卡路里。
4.少吃肉,改吃海鮮。唔食牛扒改吃牛腱,這些部位脂肪較少。
5.調味多用香草、胡椒來代替鹽、油。
6.減肥期間都可吃甜品,如豆腐花。
7.打邊爐先吃菜、菇、豆腐、紅蘿蔔等。手切牛代替肥牛。湯底用清湯、番茄湯,甚至水。醬料用生葱、辣豉油。鍋最好一邊放肉一邊放菜,免菜吸晒肉的油分。
8.自助餐先吃沙律,下醋汁、橄欖油。再吃刺身、海鮮、龍蝦仔,差不多飲兩杯水冷靜下,才決定是否吃肉和甜品。吃時最好拿細碟放,以控制分量。


撰文:馮淑玲
攝影:梁幹持、劉玉梅
錄像:蔡政峰

    全站熱搜

    tvb4life 發表在 痞客邦 留言(0) 人氣()