牛油曲奇微脆,唔會一入口就散晒,每塊直徑大約 1.5厘米,一啖可以食晒。 

試食王

謝霆鋒曲奇唔夠 chok

Ads by Google

男神謝霆鋒憑《十二道鋒味》升呢成廚神,萬眾期待佢間餐廳,不過,佢投身飲食界第一步,竟然係開外賣曲奇餅店。投資七位數字,又自己瞓身拍宣傳片,就算開幕日好低調,但已經有好多人慕名幫襯。鋪頭位於中環結志街,唔就腳,鋪面細到一眼睇晒,裝修都好簡單,只係得少少 display位,全店獨沽一味賣一款曲奇,冇乜嘢好睇。牆身印上戴住廚師帽嘅熊仔,賣萌唔賣 chok,有型過 Angelababy用自己個樣做生招牌嘅。店員有禮貌又有笑容,細心解說一盒曲奇有 108塊,有甜酸苦辣四種味,仲提點我辣味好辣,最佳食用日期係七月前,好細心。問到係咪謝霆鋒整,店員就好隱晦咁話佢有份參與囉。

 

曲奇餅盒設計都好簡單,全黑色再加上三塊漫畫化曲奇,都係謝霆鋒有份設計㗎,但覺得送俾人唔夠高貴。入面包裝又係幾求其,只係用薄身瓦通紙分成四格,搞到部分曲奇未開已經碎咗。每隻味有六包獨立包裝,每包有四至六塊,好唔環保。包裝上寫明甜酸苦辣,仲畫埋公仔,有奇華 feel。甜係唧花牛油曲奇,牛油味幾香,質感偏脆身,唔係 Jenny Bakery嗰隻鬆化,不過不失。酸係檸檬曲奇,一包有六塊長條形,薄脆,帶微酸,個人幾鍾意。苦係朱古力,唔甜亦唔苦,朱古力味都幾濃。最特別係辣味,食得出有粒粒辣椒籽,但冇想像中咁辣噃。睇番成分,冇乜奇怪化學嘢如防腐劑添加劑,抵讚。二百蚊一盒,如果可以野生捕獲謝霆鋒,呢二百蚊先至抵俾。


用黑朱古力製作,味道幾濃而且一啲都唔甜,質感比牛油曲奇硬,普通咗啲。 

辣味曲奇係牛油曲奇底加指天椒粒,辣味隱約,幾得意。 

檸檬曲奇比較薄身,香脆帶酸,好開胃,個人推介。

鋪頭 display只係得四格,有個 N字同埋麵粉棍,冇乜特別。 

試業期間大把人幫襯,仲幾盒幾盒咁掃。 

鋒味曲奇$200全黑色鐵盒加獨立包裝曲奇,設計似奇華,除了檸檬曲奇每包有六塊,其他每包四塊。

評分

食物:★★★
服務:★★★★
環境:★★★
抵食:★★★

 

鋒味
地址:中環結志街 39至 49號 F鋪
電話: 2608 0036
營業時間: 11am-8pm

試食王

喜歡外出用膳,也喜歡誠實,不相信飲食網站的所謂評分,也怕了所謂食家獲得優待後的意見,情願隱姓埋名,真金白銀,測試飲食雜誌飲食網頁捕捉不到的真實一面。

五月生日免費食蟹自助餐

即日起至 5月 31日,五月生日人士幫襯灣景廳自助晚餐, 4位或以上惠顧,壽星仔女即可免費用餐, 10至 12位可有兩人免費, 6位以上同行更加免加一, 8位以上無限飲汽水及啤酒,優惠可同時使用,非常抵食。現時「蟹皇盛宴」主題,有多款蟹菜式,更有北海道毛蟹、俄羅斯皇帝蟹腳和日本松葉蟹任食,蟹迷要試!

「蟹皇盛宴」自助晚餐
地址:灣仔港灣道 4號灣景國際 1樓灣景廳
電話: 2802 4284
供應時間: 6:30pm-9:30pm
價錢:
星期一至四成人$438、長者$408、小童$348
星期五至日、公眾假期及前夕成人$478、長者$438、小童$368

川寧新出原片茶葉茶包

英國茗茶品牌川寧,最近推出新產品 Large-Leaf Discovery Collection,茶包採用原片茶葉調配,絲質三色茶包可以釋放茶味,更加香濃。更有十一款新口味調味茶,包括鮮紅玫瑰果洛神花花草茶、杧果乾薑綠茶、香橙女伯爵紅茶等,清新適合夏天飲用。每盒 15個茶包賣$89,於各大超市發售。


撰文、攝影:試食王
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()