男生穿西裝，謹記恤衫袖口位要長過外套。 

職刻十大

畢業生搵工前的 10個 ready

Ads by Google

5月又將近畢業的季節，初出茅廬的畢業生定必對職場戰戰兢兢，見工前可能擔心到瞓唔着。《職刻十大》今期就為職場新鮮人提供搵工及返工前要做好的 10個準備，令你在身心都 ready去踏入人生另一個新階段。

1.見工　執個 look

禮儀形象導師Debbie 

禮儀形象導師 Debbie表示︰「面試如果唔知着咩好，男仔着西裝以示尊重最穩陣，不過男生要注意恤衫袖口位要長過外套，衣領唔好俾外套遮住，領𧘹亦唔好長過皮帶位；而女仔條裙唔好太短，及膝會比較適宜。」

2.影張靚相

CV相可臉帶微笑或露齒笑容，讓面試官覺得你自信及容易與同事相處。 

在見一份新工前，對方首先見到的是你份 CV， CV寫下個人資料、學歷、工作經驗等不用多說，有時 CV會要求落相，千萬不要就手用手機自拍，搵身邊的影相達人幫手，把自己影得好好睇睇， HR見到自然會加分。

3.學做 interview之王

去完「見工面試技巧工作坊」，你仲唔成為「 interview之王」！香港青年協會 

K1、 P1考名校可以去補習社 join面試特訓班，畢業生見工都一樣可以參加求職模擬面試班。香港青年協會定期開辦「見工面試技巧工作坊」，教授面試溝通的技巧，又設有模擬面試訓練。所謂「工多藝熟」，練多幾次自信心大增，搵好工冇難度！

查詢： http://clc.hkfyg.org.hk 

4.開個見得人的 email account

重新開過個四正的電郵帳號，建議用自己個名加生日日期就萬無一失！ 

現在求職多半是用 email send信，但麻煩你 send信前 check吓自己個電郵帳號先。「 i_m_a_fool77777」、「 die_dead_death666」等如此有個人風格的 email就不要用來 send CV， HR姐姐見到只會冷笑一聲然後略過你的申請。

5. facebook刪 post洗底

你唔會知未來老闆條底線去到邊，返工前記得 delete晒啲激 post及白癡留言。 

年少輕狂，總會在 facebook留下一些「那些年」的白癡印記。調查指有 36%的僱主在請人前先會到 facebook起吓應徵者個底，所以麻煩你先刪除當日「分手互數臭對方罵戰」等太重口味的言論，事關 facebook在職場上已是你的人生履歷，見工返工前應執到靚靚仔仔先見老闆。

6.口才提昇課程

好多行業都是靠把口食飯，為前程着想，有「語癌」要及早治療。 

讀書的時候做自閉仔最多識唔到女仔，但在職場不善溝通表達，可以是見工失敗，或者得罪同事、老闆，最後甚至被炒魷魚。將勤補拙，有時間可報讀聖雅各褔群會的「口才提昇與領導溝通技巧證書課程」，學識口甜舌滑想人緣唔好都幾難。

聖雅各福群會
查詢： http://sjsmile.com 

7.水晶增人緣

有時利用水晶也可助你在職場立足，塔羅占卜師 Angela︰「佩帶水晶不要多過兩條，碧璽可加強人緣得貴人相助，令好事走近自己，有助找到好工作；另外想消除心中不安，見工時可佩帶紫龍晶，令你面試表現更顯自信。」

塔羅占卜師Angela 

碧璽有增加工作運的作用，但面試時可將它袋入褲袋或手袋，免得引起面試官的誤解。 

8. Grad trip玩盡先搵工

歐元、日元都咁抵，唔好錯過老天爺的一番好意，去一頭半個月旅行先返來搵工啦！ 

長達 4個月的漫長暑假，在你拋四方帽的一剎那將成絕唱。唔使咁灰住！趁今年港元強勢外匯低迷，去返個 1、 2個月的畢業旅行，一班同學仔在異地窮風流，盡興而歸！ Anyway，人總要面對現實，歡迎你加入 40年死做爛做打工仔呢個大家庭！

9.學管理時間

書中有不少圖像去說明如何有效地管理時間，好像設定目標的 6個步驟，讓人更容易理解及明白。 

當正式加入一間公司工作，你的工作效率及時間編排不再單單反映在成績單，還會影響公司運作，要學懂時間管理，不妨參讀《圖解時間管理學》，書中會講述時間管理的重要性，教導有效地運用時間的方法，如懂得界定事情的輕重緩急，能有助策劃一天的工作行程，提升工作效率。

購買點︰三聯書店

10.調節生理時鐘

只要慢慢調節生理時鐘，早睡早起，不怕遲到。 

返學時習慣每天玩到晚上 2、 3點，第二日課餘可以補眠，但去到正式上班，讓上司見到你不斷「釣魚」，可能試用期也過不到。如果覺得一下子很難改，應在正式上班前一段時間就嘗試提早睡覺時間，慢慢調節生理時鐘。

撰文：曾志恒、杜曉婷
攝影：葉偉豪、曾志恒
部分圖片由被訪者提供