鐵鏟烤肉鍬紅燒 半份$128 全份$198鍬紅燒有特製的醬汁, Kenny與 Diana調配過百次才成功。材料有粉絲、白菜、年糕及豬肉,直接將鐵鏟加熱,把材料煮熟後便可享用,風味十足! 

Jobs Live

鐵鏟料理 煮出新式韓國風味

Ads by Google

近年韓食不停進駐香港,但要在眾多韓國食店中闖出名堂,就要搞搞 gimmick,讓人慕名而來之餘,更想一試再試。繼風靡本港的炸雞加啤酒、部隊鍋及安東雞後,辛安東元祖奶奶雞的創辦人 Kenny於今年初,夥拍友人 Diana,於元朗開設韓式鐵鏟料理 119 Korea Station,希望可以再掀起一股新的韓式風潮!

 


Kenny(左)與 Diana都會親自製作料理,他們更學懂與 90後員工溝通,令他們對工作有熱誠,「唔可以鬧,要多啲同佢哋傾偈,照顧佢哋情緒,搵多啲共同話題,做嘢先會開心。」 

119  Korea Station的裝潢以消防為主題,主賣韓式鐵鏟料理,老闆 Diana與 Kenny相識近 10年,大家同是出身於飲食業, Diana說:「以前做過日本菜,但見近年好興韓國菜,個勢仲愈嚟愈勁,加上見 Kenny開咗辛安東元祖奶奶雞,生意幾好,搞到自己都想試吓創業。」
要在本港韓食店中突圍而出,當然要有新鮮感! 2人於 14年 3月到韓國旅遊時,嘗到當地的鐵鏟料理,喜歡嘗試新菜式的 Kenny表示:「首先覺得佢用鐵鏟好得意,喺香港冇見過;另外,佢哋用鍬紅燒煮法整豬肉,味道好特別,好有家鄉嘅感覺。」

韓國打工學藝

品嘗過後, Diana與 Kenny希望將鐵鏟料理引入香港。 Diana先在韓國當地做資料搜集,試過多間鐵鏟料理,還在其中一間打工,學習製作方法,「學咗半年,自己有飲食業底,技術上都唔算太難。但都有辛苦嘅地方,好似韓國人鍾意食泡菜,日日都要醃,醃到對手好痛!加上我唔識韓文,佢哋英文又唔算好叻,所以好多時要加身體語言先至溝通到。」
回港後, 2人正式合作, Kenny表示:「醬汁嘅甜、酸、辣、鹹分量都要慢慢試,我哋一齊調配咗過百次以上先滿意!呢度主要賣鐵鏟料理,我嗰邊就賣安東雞,兩間店鋪合作,多啲 idea可以互相 support,為客人帶嚟新鮮感。」


隊長沙律 $58特製的甜酸醬,加上冰鮮芒果粒的沙律,十分開胃。 

鐵鏟芝梨炸雞 半份$128全份$198芝士醬汁炸雞,加上 cream及蕃薯蓉,口感新穎。 

鐵鏟芝士排骨 半份$128全份$198先加熱令芝士熔化,再把每塊排骨沾上芝士。

元朗人流多

119 Korea Station位於元朗西菁街,離大馬路只有 5分鐘路程,故人流不俗,只開業 3個月,現已平均月賺約 40萬,「客人以 90後為主,都會有一家大細嚟幫襯。晚市 6點開始, 5點幾已有人排隊,成日都爆場呢!」
Diana坦言難請全職員工,「可能飲食業工作時間長,年輕員工多數只肯做 part time,希望請多啲長工,有充足人手。」


Tony 客人自己都幾鍾意食韓國嘢,睇報紙有介紹呢度,覺得鐵鏟料理幾特別,喺香港未見過,食過都覺得幾好食,遲啲會帶埋朋友嚟試! 

Diana表示現很多食店都有特色主題,才可以吸引客人,「裝修方面,我都有問 Kenny意見,我覺得消防都幾多配件,又可以同鐵鏟 match到,整出嚟都幾靚。」 

 

119 Korea Station 元朗西菁街 9號富盛大廈地下  3565 6911


撰文:霍芷晴
攝影:傅新發

    全站熱搜

    tvb4life 發表在 痞客邦 留言(0) 人氣()