專題 Log In

辣冧家庭客  M-Benz B200& Volkswagen Golf Sportsvan

Ads by Google

歐洲車廠好醒目,耐唔耐就會整啲新車種出嚟, SUV興足十幾年,四門 Coupe反應亦唔錯,而嚟緊會興嘅,相信就係 Sports Tourer。其實 VW早喺 2004年已推出 Golf Plus呢種肥大揭背車, 2005年 M-Benz亦都有 B-Class,用嚟冧啲對外形冇乜要求嘅實用家庭客。不過喺現今運動熱潮下,大叔要著 Jordan、肥師奶又話去跑步,呢類肥大揭背車當然要配合,所以 2代 B-Class已開始注入 sporty元素,今年 facelift埋更加靚仔,真正稱得上係 Sports Tourer。而 VW就仲徹底,今代直頭將 Golf Plus取消,改出 Golf Sportsvan,外形更辣,而且更有新意,實行同 B-Class齊齊谷起 Sports Tourer市場!

 


睇番 2006年 5代 Golf仲未喺香港爆賣時嘅 Golf Plus,真係肥到成個波咁,今次 7代嘅 Golf Sportsvan就明顯修晒身喇! 

其實早喺 2006年嘅時候,當年 VW代理都引入過同 Sportsvan差唔多嘅 Golf Plus,不過當年反應一般,喺街上都冇乜見蹤影,今次 9年後再引入類似車款,成續係點言之尚早,但同級對手 B-Class都保持穩定銷量,就知市場有需要。

外形全面發大

其實好多人都知, B-Class係由 A-Class變化出嚟,只不過 M-Benz為佢開出新車系。同樣地 Golf Sportsvan都係由 Golf變出嚟,車身比普通 Golf長 83mm及高 126mm,雖然長度仍然比 B-Class短 55mm,但高度就高出 21mm。兩部車唔單只大小接近,形態都似,都係好似發水麵包一樣肥大,瀟灑就講唔上,幾穩重咁啦。不過有一點唔可以否認,就係 B-Class facelift後,車身包圍組件更跑車化,對比 Golf Sportsvan係醒目少少。

1,520公升尾箱

得到車身脹大影響, Sportsvan車廂空間可謂三級跳,先講尾箱就有 500L容量,可以媲美好多中型房車,如再將後座向前摺疊,尾箱更可達 1,520L!直迫 B-Class嘅 1,547L!雖然數字上 Sportsvan嘅尾箱唔及 B-Class大,但實際坐入車廂嘅感覺又唔同。 Sportsvan用上玻璃天幕車頂,就算實際空間同 B-Class差唔多都好,但視覺空間好得多,後座乘客都可以受惠。講起後座,唔可以唔提 B-Class一直都有小朋友至冧嘅摺合餐枱,已成為呢類車指標,所以 Sportsvan都有同類設計鬥冧客。


B200嘅尾箱空間可擴展到 1,547L,比 Sportsvan更大!睇唔出呀! 

前座有電動調節位置及支撐力,高級過 Sportsvan。 

B200後座比較大張,承托力更好。 

B-Class由第 1代至今都有後座餐枱,家庭客至 like。 

 

 


摺埋後座之後儲物空間達 1,520L,加上天幕車頂,視覺上比 B200更大。 

前座只可手動調校,而且未有用半桶形設計,承托力一般。 

Sportsvan後座座墊較平,而且勝在有收藏式手枕。 

有摺合餐枱,又有後座冷氣風口, Sportsvan都幾齊料。 

性能相當接近

都唔會有人預呢類家庭車可以有驚人性能,不過都唔可以太弱雞嘅,事關潮流興 sporty,少少運動化對賣車有正面影響。測試嘅 Sportsvan用頂級 1.4公升 turbo引擎、 150匹馬力版本,即係同 Golf GT一樣,馬力上輸畀 B200少少,但扭力一樣有 25.5kgm,耗油表現甚至一樣。其實揸起上嚟 Sportsvan嘅下盤功夫比 B200更 sporty,入彎反應更準繩,都有普通 Golf GT 8成功力,不過車廂寧靜程度及舒適性就未必及 B200。波箱方面, Sportsvan當然用 VW最拿手 7速 DSG波箱,不過只可以喺波棍上操作+/-模式,而 B200嘅+/-波反而只可喺軚盤撥片操作,各有各好。




B200(左)用 1.6 turbo對 Sportsvan嘅 1.4 turbo,輸出十分接近,連耗油量都一樣。

B200車廂用料更高級,而且金屬裝飾夠晒 young。 

B-Class用軚波可節省空間,但+/﹣模式就只可以喺軚盤撥片操作。 

車廂 90%同普通 Golf一樣,白色皮配黑色鋼琴木都幾靚。

7速 DSG波箱表現出色,而且波棍旁有大量新設備,包括電子泊車手掣、 Auto Hold、行車模式、自動泊車系統等等。 

BMW打孖上

唔係筆者吹水,除咗 M-Benz B-Class同 VW Golf Sportsvan外,一向辣慣嘅 BMW上年都推出咗類似嘅 2系 Active Tourer,仲一反 BMW傳統改用前輪驅動!而且咁都未夠,今年仲要加推 2系 Gran Tourer七座版,下星期就上市。喺 3大德國廠力谷下,你話 Sports Tourer有冇可能 hit唔起嘞!


撰文:袁國基
攝影:葉曉明

    全站熱搜

    tvb4life 發表在 痞客邦 留言(0) 人氣()