新車激試

大白象  Infiniti QX80

Ads by Google

香港地小路窄,大車可以話無用武之地,近年流行嘅大型豪華 MPV,其實已經係路面極限,出入某啲偏遠小路、甚至市區停車場,都顯得笨拙。不過,巨大車身可以顯身價、又可以耀武揚威,總有人追求更大嘅車! Infiniti呢個充滿美式口味嘅牌子,點可能冇大車看門口?代理剛引入旗艦豪華四驅車 QX80,車長超過 5m!車高超過 1.9m!揸出街霸氣十足,貨車都忌你三分!

Infiniti QX80 Spec.

引擎: 5,552c.c.V8
馬力: 400hp/5,800rpm
扭力: 57.1kgm/4,000rpm
傳動: 7前速自動、附+/-模式
耗油: 6.3km/L
車身: 5,290 X 2,030 X 1,925(mm)
車重: 2,725kg
車價:$1,389,000
查詢: Infiniti HK( 2756 9123)

 


QX80長達 5,290mm,高 1,925mm,好似 Prius呢啲家庭房車,拍埋去就好似小朋友一樣。 

近年個個中產都以擁有高頭大馬嘅 SUV為榮,陰謀論咁睇,可能同自卑感有關,身家唔夠人豐厚,自然想買部外表夠大、行出嚟嚇鬼、比百萬房車更有睇頭嘅車。中產識咁諗,有錢佬都識咁諗!鬥大嘛?歐洲大型 SUV都夠晒照,不過要玩得夠罕, QX80一定最爆。

不可亂入車場

相信全港車迷都對 QX80陌生,全因廠方從未引入如此巨大怪獸,但 QX80又唔算係新車喎,因為 QX80喺 2010年已經以 QX56之名推出,只不過適逢全線車系改名,加上廠方直接引入新車, QX80先得以嚟到香港。 QX80有幾大?車長 5,290mm、闊 2,030mm、高 1,925mm,仍然冇乜頭緒?就以香港通街都係嘅 Toyota Alphard為例,車身係 4,915 X 1,850 X 1,895( mm),即係話 QX80完全大過晒 Alphard!更甚者係車身高到有頗多停車場入唔到!同貨 Van有得揮!代理都表明,唔旨意客人喺香港地揸,據知現時有興趣買家都係用 QX80走中港。
QX80車身有大量 Infiniti車廠特色,魚網形鬼面罩再配以大量電鍍裝飾,本來氣勢十足,但前輪沙板加上散熱孔實在有啲怪,影響車頭造型。車尾方面,尾燈套用細一個碼嘅 QX70設計,不過因為 QX80車內有 3排座位,車尾唔可太斜,所以就算尾燈本身幾靚,都同車尾唔襯。


不規則形狀尾燈來自 QX70,不過同巨大嘅 QX80好似唔係太夾。 

沙板開散熱窿,據知真係有用,因為引擎艙堅熱,但賣相唔靚仔囉。 

鬼面罩用上車廠常用嘅魚網款式。 

車頭巨到無倫,但頭燈相對細,好彩有啲電鍍裝飾襯下,先冇咁突兀。 

日系宿敵 LexusLX570

QX80巨霸日本車,只有水貨 Lexus LX570先係佢對手,採用 383匹、 5.7公升 V8引擎,輸出上比唔上 QX80,而車身尺碼都細少少。長 5,005mm、闊 1,970mm及高 1,865mm,已經係相當之大,加上 7座位佈局,自 2008年推出以來都有唔少人用佢嚟跑中港。車價:約$1,600,000

比歐洲車更豪


2,725kg車喺強力輸出下,起步加埋一啲都唔笨重。 

來港版本 QX80有分 7座及 8座,其實分別只在於尾排中間有冇安全帶,而好多人都擔心後排空間不足,喺 QX80身上都冇出現,腳部完全唔頂中排背,而且中排及後排都有電動摺疊功能,方便過好多正宗 MPV!
去到 QX80呢個級數,空間已經係必然,反而最重要係夠唔夠豪! 3排都有獨立出風口,中排有暖座,前座更有冷、暖座墊及軚盤電暖功能。娛樂設備方面,全車音響由 BOSE負責,中排更可享有尊貴嘅無線耳筒,而且前座頭枕背有獨立顯示屏,隨時變身私人影院。除咗舒適享受外,安全駕駛輔助都唔少嘢,軚盤上可操作行車線偏離警告系統及設定同前車距離嘅定速系統,全部都係唔使加錢,真係啱晒中港使用。

 

 


駕駛艙用上等木料配真皮構成,豪華中見典雅一面。 

前座全電動調節,而且有位置記憶及冷、暖風功能。 

中排座位有好多空間,舒適性可以拍得住房車,如有天幕頂更正!

全車共有 13個 BOSE喇叭,可媲美家庭影音組合。 

跟車有埋無線耳筒同遙控器,戴上即享私人視聽空間。 

最後排中間位加上安全帶,就可以載 3個人,空間當然冇 2個人咁好。 

筆者肥大身形坐入後排,雙腳都仲有郁動空間。 

引擎氣吞天下

QX80車重達到 2,725kg,比一般 SUV更重,要推動呢個車重,車廠為佢配用一台 5.6公升 V8自然吸氣引擎,馬力達到 400匹,扭力更有 57.1kgm!起步加速輕鬆有餘,根本唔覺佢有 2,725kg咁重。 QX80除咗係豪華車之外,四驅車先係佢真正身份,所以喺波棍下方設有電子四驅系統操作掣,可設定 Auto、 4H及 4L 3種四驅模式,而且後輪有電子 Lock掣,配合限速落山系統,令 QX80輕鬆進出惡劣地形。此外,亦有 4組行車模式選擇,分別係 On Road、 Rock、 Snow及 Sand,可自動調節四輪扭力分布及引擎輸出,真係乜嘢路面都攔佢唔到。
筆者以 QX80走上飛鵝山扎山道試車,發覺行車感覺好似一部大房車,入彎時車身出奇地唔算好側,而且軚盤都唔係虛浮,路面感唔錯。雖然試唔到大爛地,但觀乎 QX80咁嘅設備,其實係預咗畀中東市場嘅油王去沙漠狂奔,走中港都浪費咗佢。

 

 


軚盤上嘅定速系統更可以設定與前車距離及防止偏離行車線。 

7速波箱表現唔錯,波牙比例恰到好處,低轉發揮到強大扭力。 

波棍下方集合所有驅動系統嘅操作掣,攀山涉水靠晒佢。

其實 5.6公升容積有 400匹馬力,唔算特別勁,只可以話香港市場少有啫。 

表板中間嘅小屏幕可清晰顯示四驅模式及行車模式。 

撰文:袁國基
攝影:葉曉明

    文章標籤

    Infiniti QX80

    全站熱搜

    tvb4life 發表在 痞客邦 留言(0) 人氣()