熱到爆

最新紙•木玩

Ads by Google

父母視孩子為金叵羅,都想給他們最好。尤其買玩具,要安全好玩又有教育意義,有些父母更要求兼顧埋環保;小朋友玩得安全開心,又可保護地球,故近年流行紙製木造的玩具和兒童家品。最近發現有兩間新店開業,售賣的紙製木造用品創新又好玩,非常適合小朋友。

最新韓國進口紙家品

紙品店無論枱櫈、貨架、牆壁、收銀處,及店中央那條 10呎高的恐龍滑梯,全都用紙造。別以為紙紮品危危乎,紙收銀枱上放了塊 6呎長、 2呎闊、 2吋厚的實心木板,都無問題。我故意用力壓,它依然穩如泰山。而那條紙恐龍滑梯,小模特兒又爬又滑又搖又跳,大人企埋上去,它依然紋風不動,好厲害。
仔細查看發現,紙品由非常厚的紙板砌成。每塊紙板中間最少有三、四層的卡通紙承托住,紮實又不易變形(見右圖)。店主 Kelvin話,紙品全由韓國設計兼生產, 85%採用 Eco Forest木材。他解釋說:「我們採用的 Eco Forest樹只限於用來造紙。種植砍伐絕對要配合樹木的成長周期,不能亂來。造紙時採用粟米漿,環保無添加,不會傷害到環境。」


Miley house屋看似平平無奇的紙屋,黑漆漆在屋內點盞燈,即時照出滿室超夢幻圖案,連我都好鍾意。 90cm高× 87cm長× 75cm闊。$480 

紙貼紙囡囡攞親貼紙回家我就頭痛,因為唔環保,但依家有了這款紙貼紙,就唔怕造成地球太大負擔。$78/張 

Miley chair將紙條逐條砌在櫈架上,可跟小朋友一齊動手砌。櫈背紙條有 4款圖案,可配搭出 10個不同表情,哭笑嬲鬼馬,小朋友天天轉換,肯定鍾意。 43.5cm高。$180 

紙錢罌有羊、豬、兔和企鵝共 4款。除了羊仔錢罌有黑、白兩色,其他都是原色。小朋友放錢入去,企鵝對翼和動物的耳朵都會動,可吸引小朋友多儲錢。羊仔$49、其他$38。 

小朋友可以動手做

Kelvin進一步指出,紙玩具和家品對小朋友觸感亦較好。「紙品唔似塑膠咁冷冰冰、硬繃繃。內藏厚厚卡通紙,小朋友按落去唔會太硬,感覺舒服。我們的紙品多是原色,想鼓勵小朋友在上面任畫任塗任貼,自由創作出屬於自己獨一無二的玩具及家品,同時亦培養小朋友的創意。」
店內所有貨品只提供送貨服務,需買家按照附送光碟自行安裝。 Kelvin解釋說:「是想親子齊齊動手做,唔好下下只靠爸爸安裝,媽咪和小朋友都做到。尤其紙家品和玩具非常輕,一個貨架一位女士都拎得起。紙板上有晒榫位,一嵌就掂,連釘槌膠水都唔使。特別鼓勵 5歲以上的小朋友參與,讓他們從小學會自己家品自己做。」


恐龍滑梯甫進店即被這條 3米 8高的恐龍滑梯嚇親。它不是裝飾,真的可玩,仲任小朋友玩㖭! 

蘑菇櫈由 4層卡通紙板造成,能承托 660磅重量,大男人企上去都無問題。 3款圖案選擇, 23cm高× 27cm闊。$188 

士多啤梨圓枱士多啤梨圖案夠可愛。揭開蓋仲有 16個儲存格,放玩具、雜物唔怕亂。紙造夠輕,小朋友開蓋無難度,又唔怕夾親手仔。直徑 1米 2× 30cm高。$3,690 

Baby-reader shelf不斷放硬皮書上去都承托得住,夠穩陣。 54cm高× 33cm長× 24cm闊。$195 

做足保護措施

香港潮濕多雨,用紙品最怕發霉起黑點,清潔亦有困難, Kelvin卻說:「我們的紙品全做了防霉防菌防潮防蟲處理,並獲日本、美國和歐盟測試認證。韓國和日本客人一般可用 5年以上。香港有客兩年前喺韓國買咗張櫈和一間玩具屋給孩子,到依家都無投訴過。」
紙品清潔簡單,只需用濕毛巾一抹即可。但如倒瀉咖啡,建議最好於 10秒內抹走,否則怕會有漬。畫筆塗污不能抹掉。紙品亦經過防火處理,試過用打火機燒,要 17秒後紙品才着火,但火不大,蔓延亦慢,故可放心。

 

Paper World
營業時間:周一, 10:30am-6pm;周二至五, 10:30am-8pm;周六、日及公眾假期, 12nn-6pm
地址:九龍灣臨興街 32號美羅中心 1期 2樓 17號室
查詢: 3976 2976/FB: paperworld.hk

西班牙創意木玩具

外國有研究指,木的質感能令小朋友覺得溫暖、心平氣和。而凹凸木紋就對小朋友的觸覺發展有幫助,故木製玩具近年在港深受港爸港媽歡迎。最近有西班牙品牌木製玩具登陸香港,專門針對幼兒,分自然科學、配對思考、記憶協調、體能發展、建築交通及視覺發展等 7大範疇。並強調全人手製作、通過拉力、浸泡、吞嚥等多項安全測試,防霉無毒無害。木玩具亦環保耐用,唔似膠玩具易爛,或電子玩具會被淘汰,可代代相傳成為家族歷史回憶,感覺木製玩具真係好 warm。



Balance games60塊小積木有 3種不同玩法,可配合板上圖案直放或橫放,亦可獨立逐粒疊高。能訓練小朋友手眼協調、配對思考,以及訓練小肌肉、專注力和定力。可 1人或多人同玩。適合: 3+售價:$360 

Calendar Clock( big size)來港前是品牌大熱,全球每年賣出數萬個。梗係啦, 3百幾蚊一個鐘,有齊月、日、星期、時、分、秒、國際時間、季節和天氣,滿足晒所有學習需要,抵啊!適合: 3+售價:$390

Marco Puzzle內有 28塊砌圖,只要找出適當的做配對。針對較大的小朋友,更可以邊砌邊創作不同的故事,鍛煉想像力和創意。可 1人或多人玩。無限定方向,前後左右砌都得。適合: 1+售價:$300 

Multi Construction Set有不同組件,可跟說明書砌或自由創作,砌車砌槍砌櫈任意發揮,考考自己的創意和想像力。工具跟大人用的相似,只是變成迷你版,更適合小朋友手仔。適合: 3+售價:$500 

 

爸爸 Aries經朋友介紹,買了副 Multi Construction Set給 6歲仔仔 Adrian。他說:「經常話膠玩具有問題,咪試下木製玩具,經過安全測試感覺安心。仔仔成日攞住啲工具扮大人,問我想要乜話砌俾我。有次佢無睇說明書,自己砌咗把槍出來,真係估佢唔到。」

 

Goula
營業時間:周一至周五, 9am-5:30pm( 12:30pm-1:30pm lunch)
地址:鰂魚涌華蘭路 20號華蘭中心 1806室 Think& Act Strategic
查詢: 2301 3280


撰文:馮淑玲
攝影:劉玉梅
錄像:蔡政峰

    全站熱搜

    tvb4life 發表在 痞客邦 留言(0) 人氣()