韓氣逼人

39歲崔智友撒嬌趕上車

Ads by Google

仲有兩個月就正式踏入 40歲嘅崔智友,近幾年冇乜代表作,同期嘅女星又嫁得就嫁,佢都係時候要趕上車啦!嗱,最近崔姐姐埋到《花樣爺爺》堆,人氣反彈之外,仲𠱁掂 4位爺爺做紅娘,製造機會俾佢同筍盤李瑞鎮,曖昧指數爆燈呀。

 

 


13年前,崔智友同裴勇俊合作《冬季戀歌》,成功坐上一姐位。 

崔智友話太曬要買遮,咁又使咗成百蚊。靚係幾靚嘅,不過每日預算有限,要大家分擔啫。 

崔智友唔怕肥,帶咗一堆零食去旅行。仲主動餵申久爺爺食糖,好 sweet呀!

去到希臘尾站聖托里尼島,李瑞鎮忽然叫崔智友一齊影張浪漫相。其實佢哋年紀只係差 4年,睇落真係幾襯。 

3位爺爺坐埋一邊睇佢哋打情罵俏,好似睇戲咁,仲加把口話好襯。 

 


崔智友同李陣郁喺 07年合作《 Air City》撻着,拍咗 4年,最後都係分手收場。 

崔智友今次難得俾節目組睇中,搵佢加入韓國 tvN收費台人氣綜藝《花樣爺爺》,拍住「咕喱」李瑞鎮照顧李純才、申久、朴根亨同白日燮 4位爺爺,睇落好似幾幫得手嘅。之但係話晒曾經紅過,又搵落唔少錢,崔智友落機唔夠半日就現形,使錢好似倒水咁,搞到出名孤寒嘅李瑞鎮要日日查數(拍節目有 budget㗎嘛),仲俾幕後笑佢哋似夫妻出遊,為錢嗌交。
俾人咁講,一向口衰嘅李瑞鎮竟然唔反抗,就算崔智友亂使錢,或者愈幫愈忙,只要俾佢詐吓嬌,李瑞鎮笑一笑就算。幾位爺爺仲話佢哋好襯,想撮合佢哋㖭!
之但係李瑞鎮係圈中出名筍盤,出身金融世家,又喺美國紐約留學, 4年前仲俾資產管理公司 Ask Veritas睇中,請佢做國際內容第二本部本部長(常務),負責籌資業務,名副其實係貴公子。崔智友想食到糊嘅話,真係要加把勁呀!

 

 


食緊早餐嗰陣,李瑞鎮又要計數,問剩番幾多錢?但數錢還數錢,佢叫崔智友慢慢食埋先。 

 

 


崔智友物業唔多,但勝在每次全棟買起,單係手上位於首爾清潭洞(左)同驛三洞(右)嘅兩棟物業,依家市值 150億韓圜(約 1億 7百萬港幣),每月收租達 5千萬韓圜(約 36萬港幣),身家幾厚㗎! 

河智苑無知姐姐

「姐姐」節目有價有市,今年 37歲、拍過《奇皇后》做慣打女嘅河智苑(真名:田海林),都加入韓國 OnStyle收費台嘅綜藝節目《和姐姐 GO GO》,帶埋親家姐田有京拍真人騷。
但係咁,河智苑同家姐去法國南部體驗當地生活嗰幾日,將佢平日硬朗形象完全顛覆,唔只認錯車,煮餸又亂加調味料,俾佢家姐踩到一文不值,真係攞嚟瘀囉。


準備煮飯嗰陣,河智苑話要學車勝元咁,煮啲好味嘅菜式出嚟,結果當然冇佢諗得咁完美啦。 

雖然家姐係咁彈河智苑整嘅「法式泡菜餅」,但都有食晒,好包容呀! 

河智苑揸車剷埋路邊,車尾箱點開又唔識,最後要家姐出手,佢仲反問:「點解你會知嘅?」

撰文:張韋弘

    全站熱搜

    tvb4life 發表在 痞客邦 留言(0) 人氣()