me.jpg


Niki Chow米白色羊皮長外套$10,800Le Pliage Heritage閃電藍色皮革手袋$8,950both Longchamp粉藍色刺繡吊帶上衣$5,450同款半截裙$8,655both Jonathan Simkhai from NET-A-PORTER彩色寶石鍍 14K黃金戒指all stylist's own 

cover face

周麗淇 大贏家

Ads by Google

與周麗淇( Niki)做訪問,似見朋友多啲,零架子,輕輕鬆鬆,笑到放工。沐浴於愛河中的 Niki何只靚,連笑聲也是甜的。
出道超過十年的周麗淇( Niki),一直順風順水,去年演出內地宮廷劇《衞子夫》意外爆紅,意外收穫是與徐正曦一劇定情,這鋪人財兩得的大豐收好和味。
被譽為圈中小富婆不無道理,密密做密密賺,原來早已做完業主再做老闆,仲講明自己唔會打冇把握的仗,究竟會唔會同男友有錢齊齊搵先?「講錢就傷感情,就算將來結婚都會財政獨立。」
自覺幸運的 Niki正值事業高峯期,暫且將結婚拋諸腦後,「呢兩年唔會結婚!」將來的事,自己話事。
有智慧,有自信,還有主見,眼前的 Niki更惹人喜愛,是事業愛情的大贏家。


Profile
 

Niki Chow
出生日期: 8月 30日(處女座)
出生地:香港身高: 5呎 7吋 
體重: 110磅
語言:廣東話、普通話、上海話及英語。
簡歷: 01年,由模特兒轉型為演員。 02年,憑電影《玉女添丁》獲香港電影金像獎最佳新人獎提名。 03年,開始接拍電視劇。 05年,簽約 BMA唱片公司,成為歌手,同年憑電視劇《秀才遇著兵》奪得無線「飛躍進步女藝員」獎。 12年,加盟林建岳旗下的大岳娛樂。
主要作品:電視劇《秀才遇著兵》( 05),《天幕下的戀人》( 06),《我的如意狼君》( 11),《女警愛作戰》、《好心作怪》( 13),《衞子夫》( 14)。電影《百分百感覺 2》、《大頭怪嬰》( 01),《豪情》( 03),《我要成名》、《喜愛夜蒲 2》( 12)。唱片《 Pure Niki》( 05),《 Child Woman》( 06),《願望》、《 F.L.Y.》(單曲)( 10)。
Instagram: nk830


因禍得福
 

別看周麗淇精精靈靈,其實係傻大姐一名,經常烏龍百出,今勻又一次自己惹的禍,意外夾爆腳趾骨,「其實係一宗家居意外……自己心急開門夾爆右腳腳趾骨,兩個月唔可以拍戲,檔期被迫要推遲,甚至唔可以接,賺少咗。」
Niki行路跛跛吓,只能著露趾鞋,連擺甫士都有困難,堅陰功豬!「我連好簡單嘅事都做唔到,仲要人照顧,搞到有啲情緒問題。」換轉角度看,這是禍也是福。
「今次終於有得唞吓,可以陪吓屋企人,最開心係我媽咪,兩姊妹難得一齊喺屋企,家姐大肚要安胎,我就要養傷,日日都有阿媽靚湯飲。我之前工作太搏殺,一拍戲連電話都冇,爹哋媽咪習慣冇咗我呢個女!」古巨基都有唱忙忙忙其實自私,唔怕愛得太遲咩?
「佢哋生日,過時過節唔可以一齊慶祝,都會感到內疚,尤其係佢哋病,我就會更自責冇關心佢哋。」 Niki明白親情無價,現與家人在 WeChat開了個群組外,每年還會舉家外遊。


細細個就精靈可人,學埋中國舞,內外兼備,真係三歲定八十! 

周麗淇與徐正曦因拍攝內地劇《衞子夫》撻着,公開戀情後終可高調談情, sweet到爆。《蘋果日報》圖片 

同林峯合作內地劇,各自霸山頭背劇本,更因此成為好友。《蘋果日報》圖片 

即將做阿姨的 Niki與家姐周汶錡姊妹情深,早已買定厚禮迎接 BB出世。《蘋果日報》圖片 


名利雙收
 


Niki Chow螢光綠色絲質中袖外套$4,050同款半截裙$2,050白色棉質珠地 tee$2,050Le Pliage Heritage Neon裸色緄螢光橙邊手袋$10,600 all Longchamp寶石鍍 14K黃金戒指、純銀戒指both stylist's own 

去年 Niki主演的內地電視劇《衞子夫》正式播放,逾十二億觀眾收看,成為全國收視冠軍,一劇爆紅,更與楊冪及劉詩詩等內地花旦齊名,成功開拓中國市場,殺出一條財路。我相信,名成利就的背後必須下苦功。
「古裝劇對白好難背,好考記憶力,我同林峯每日都好似去試場考試,每人孭住部耳機,各有各山頭背書,遇到有些古語及典據唔明,更要查字典。」爆紅是要付出代價, Niki對拍攝慘況仍歷歷在目,大呼辛苦難受。
「片廠成五十幾度,熱到我全身標汗,要不斷抹汗補妝同飲水。我中過兩次暑,當時成個人迷迷糊糊,好似面臨死亡。」仿如劫後重生的 Niki,早就搵埋唔少錢,犀利到五年前已秘密開髮型屋做老闆娘,既然是圈中小富婆,何需搏命拍戲,「我唔係小富婆,只係夠勤力拍戲賺錢,亦唔係部署做生意人,只係對呢盤生意有信心咪做囉!」似乎投資有道喎!
「我係穩陣派,當然會買股票和買樓投資,我唔係要數身家,只係好彩。」老老實實,有冇預埋男友一份先?「講錢就傷感情,萬一有意見分歧起衝突,就好無謂,有佢精神上嘅支持就夠!」


一劇定情
 


Niki Chow白色棉質珠地 V領連身裙$4,050粉紅色豹紋馬毛外套$27,250Le Pliage Heritage Luxe白色皮革粉紅啡色斑馬紋手袋$14,050黃色皮革夾趾涼鞋$3,150all Longchamp銀色粗圈頸鏈$18,000 Dior戒指 both stylist's own 

周麗淇接拍內地劇的最大得着,相信是與內地小生徐正曦因戲結緣,更發展成情侶,原以為有戀愛趣事聽吓,誰知她一句:「公司唔想我講太多。」聽到都失望!
戀事唔講得,咁有冇諗過息影做少奶奶?「結婚生仔都可以做嘢,冇關係,除非冇人想睇我拍戲,冇人聽我唱歌,我咪唔做囉!冇理由仲喺度死𦧲……我再冇價值咪告老還鄉。」識得遊花園,你精我都唔笨,索性直接問結婚。
「組織家庭唔會係呢兩年嘅事!父母冇催婚,早已習慣我呢個女是報喜不報憂,佢哋好識做,唔會俾壓力我,一向給我好大自由度,從來唔會干涉我嘅生活。」
雖然 Niki對戀事不願多談,但全程笑不攏嘴,戀愛中的甜蜜幸福,從她的笑容表露無遺。


後記
 


Niki Chow黑色不規則膊併網布連身裙$12,070 Mugler from NET-A-PORTER銀色粗圈頸鏈( worn as bracelet)$18,000銀色粗圈手鏈$12,500both Dior 

周麗淇身為圈中小富婆,要乜有乜,莫說是男友,朋友送禮物給她都有難度,「我想要多啦 A夢的隨意門,唔使搭飛機去邊都得,慳好多時間。」真是想像力豐富。
「今日唔知聽日事嘛!我只希望在生命終結前,每天過得充實,而下一代睇到我嘅人生係過得多姿多采。」說得有道理,聽落有意思。


Shop List
 

Dior中環置地廣場 G40-45號鋪 800 969 886
Longchamp尖沙咀廣東道 30號 G01號鋪 2736 7328
NET-A-PORTER http://www.net-a-porter.com 


撰文:劉慰思
形象:黃健華
攝影: Parry Fung 
化妝: Navi Lam
髮型: Debby Kwan@Hair Salon
鳴謝: Longchamp

    全站熱搜

    tvb4life 發表在 痞客邦 留言(0) 人氣()