Ray(右, 32歲)、阿仔( 28歲)/兩兄弟/越南餐廳老闆/一副潮相/其實修心養性/各撑起樓面廚房 

年輕有夢 

北正宗 地址:新蒲崗景福街 87號地下電話/2780 6080

冇腳雀仔落地了

Ads by Google

新蒲崗越南餐廳「北正宗」有對潮人兄弟,細佬阿仔早練出認真工作態度,惟阿哥 Ray是冇腳雀仔,昔日貪玩懶散,終於開店落腳。
北正宗未必正宗,卻一定走在正軌……

 

剛過去的復活節長假期,許多人外遊,餐廳生意淡靜了一兩天, Ray立時慌起來。「唔係額頭滴汗,係個心滲汗,即刻要睇吓邊度出問題。」阿仔則淡淡定:「我幫佢抹汗囉,我比較冷靜,因為你諗差只會愈差。」阿仔說話與身形一樣穩重踏實, Ray則一身黑衣,頭髮蠟得幾吋高,手指滿是銀戒,一臉輕浮,真分不清誰是兄誰是弟。

 


電話保留舊照,那時花兩小時 set頭化妝,只為落街食碗麵,今天時間有不一樣的意義。 

兩兄弟自小性格迥異,但同樣讀書不多,中五未畢業輟學投身飲食業。
阿仔肯捱,目標明確,從廚房學徒做起,「細個已經識煮早晨全餐畀阿媽食,知自己鍾意下廚。」 Ray則無可無不可,「讀完書又冇工作經驗,冇方向,有人介紹去做侍應咪試吓。」但他有小聰明,手腳快,對客人有禮,故得上司器重,惟陋習一大堆。「好鍾意蒲 disco,夜晚玩過龍,第二日就射波(扮病不上班)。結果畀人炒咗。」
他做過西餐廳、扒房、越南餐廳、日本酒吧、拉麵店,都因衝動累事。

 


小時候舊照,看得出兩兄弟感情一直很好。 

「我明明企水吧,個經理一見有自己嘅 friend來食飯,就推開我自己沖飲品。好唔尊重我,嬲起上嚟唔理咁多,有客望住都掟鎖匙就走。」又試過因放假不遂而發脾氣。「經理唔批我假,我照唔返工,佢向老闆篤我,咪劈炮囉。」阿仔一錘定音:「佢係對人唔對事。鍾意唔鍾意都好容易表露,唔會分析吓先。」

 


裝修花過心思,簡單乾淨。 

Ray其實一直覺得人生欠缺目標。「由細到大都覺得自己冇咩成就,
遇到小挫折就好易唔開心。」他最大嗜好是夾 band,曾寫下這樣的歌詞:「一早該死去/心早該粉碎/放棄永伴隨/與發洩同居」負能量爆燈。
前年他決定轉換環境,到阿仔任廚的意大利餐廳做廚師。
那時阿仔已是廚房大佬,但阿哥求教,有問必答。「佢教我點揸刀,切親幾次手,但起碼 feel到自己有進步,有番啲衝勁。」豈料還是死性不改!

 

阿仔說:「有次佢扭親手,嗰日廚房唔夠人,我只係想佢幫手打荷,佢唔肯,話要返屋企唞,點知俾我發現佢拎住罐啤酒飲!」兩兄弟在廚房打交,明明理虧的 Ray又火遮眼,再也沒回餐廳,還搬離家中與女友同居。
兩兄弟沒隔夜仇,轉眼和好。惟三十歲人才第一次離家自住,成為 Ray的轉捩點。「經濟有壓力,多咗好多嘢處理,有事發生要諗辦法,唔係發脾氣就解決到。」

 


河內鮮牛肉湯河$52湯底清澈,牛肉滑身,典型北越口味。 

加上去年與女友奉子成婚,終於醒過來。「唔可以到老婆生完仔,我都係咁做人,番工唔係遲到就射波。我想個心可以定落嚟,如果自己創業,做最有信心嘅餐廳,當自己綁住自己,自願留喺度。」他今次認真起來,花半年時間到處找鋪位。
阿仔看見阿哥比往日有責任感,也答應辭工來幫忙。兩人決定開越南菜館,因往日煮過越南菜,又見區內少同類型選擇,希望能殺出血路。

 


傳統米紙包$88包着香茅豬肉棒,清新香辣,味道豐富。 

廚房交給阿仔, Ray打理樓面。再次與細佬共事,也默默被他影響,「佢態度好認真,鍾意煮嘢嘅熱誠好值得學習。我覺得自己可以再做好啲。」這樣催逼自己,難怪一兩天生意淡靜就嚇得神不守舍。「嗰日生意少咗一半,係咁諗原因,收咗鋪都諗,諗諗吓醒起好似未關廚房門,如果有人擒入嚟會偷到嘢,於是凌晨都即刻飛的返去。」自己鋪頭有事,原來如此着緊。「以前係等人哋話我聽要做咩,而家係自己去睇鋪頭有咩問題。」往日上班,遲起床便作個藉口扮發燒,今日有了動力,感冒都落鋪,「仲夠膽射波咩?」囝囝上月出世,榮升爸爸。
「而家冇乜負面情緒,寫唔到歌喇!我只係不斷提醒自己快啲印好傳單拎去派。」有了目標,他發覺愈來愈喜歡自己的工作了。

 

北正宗
地址:新蒲崗景福街 87號地下電話/2780 6080
營業時間:星期日至四 11am-4:30pm, 6pm-10pm、星期五及六 11am-4:30pm, 6pm-10:30pm


撰文:廖健邦
攝影: Rex Chapman

tvb4life 發表在 痞客邦 留言(0) 人氣()