猜心羅生門

君子好逑

Ads by Google

上次提及 Arke表弟失業,已經很快找到新工作,人生滿希望,得一想二,年近三十的他身家清白,樣樣條件中規中矩,卻一直未有女朋友。這次,他向另一位表姐── Iris請教。
追女仔說難不難,各自按自身「財貌」配對有供有求,難在第一步容易行錯,滿盤皆落索,有些 careless mistakes令你意想不到。

 

表弟(嘆氣):港女真麻煩!成日話冇男人追,到我肯主動出擊──早幾日在迴轉壽司坐吧枱,隔籬有個單身女子,搭訕之下談得幾投契,我提出交換電話號碼啦,點知佢即刻耍手擰頭,仲急急埋單走人──妳話,咁係咩心態?
Iris:表弟,你想同人玩一夜情麼?

 

表弟:梗唔係!我真誠地交女朋友啊!
Iris:所以,你都期望對方是正經女仔吧,窈窕淑女,你自然要用君子行為去追求她。你有無想過對方可能會覺得自己的要求太過分?

 

表弟:不就只是「抄牌」嗎?「抄牌」是結交的第一步啊。
Iris:但係一個正經的女仔,對你的認識咁少,貿然將電話號碼俾你,可能帶來好多麻煩──比如你不停打俾佢,又或者你利用她的電話賺錢?電話是私隱的重要部分,你想同佢保持聯絡,「抄牌」可以是交換 email、 facebook等,對方會覺得安心些。下次遇上新目標,記得別重蹈覆轍呀。

 

表弟:我一定會繼續尋找新目標,但真要咁轉折嗎?
Iris:當然啦。你呢種隨意結交的模式,不是人人都接受。她對你一無所知,又沒有共同的朋友,不是同行/同事/因工作認識,不可能對你無防範。時下女仔的心態是,你直接講乜佢都未必信,你讓她自行發現你的種種狀態,她反而會信──話時話,表弟在 fb之類裡的 status和動態新聞沒什麼會嚇親女仔吧?

 

表弟:都係寫吓去行山影相、飲飲食食咁囉。
Iris:那就夠了,不用作大,作大易穿崩。如果她是有心人,她自然識欣賞你的生活方式和長處;若然她樂意與你交換 fb之類,你也可以藉此了解她多些。簡單如她是否已婚、有無男朋友,總有蛛絲馬跡可尋。

 

表弟:咁我同佢講咩好呢?
Iris(沉思):嗯,早些清楚表明你想和她做朋友──因為你開始於搭訕,難免予人花弗之感,所以應該同時顯示你是誠實君子。之後不用猴急,經過一段時間慢火交流,至少讓她知道你不是為傳銷、傳教而來的 sales。

 

表弟:搞咁多,怎樣才可以約到她?
Iris:耐心一點,女仔對你有興趣,會主動提出見面的。讓她覺得情況在她掌握之中,根據她的節奏走,會好辦許多。

 

表弟(心急):豈不是好被動?
Iris(笑):表弟,打開天窗說亮話吧,以你屢敗屢戰式漁翁撒網,可能同時有幾個目標叫緊胡,又怎算枯等呢?再講,時機成熟的話,你也可以主動出擊。

 

表弟:係?幾時?點樣?
Iris:咁要睇吓你哋係咪真係有話題,有火花。每日都有交流,內容輕鬆愉快,那麼一兩星期,你便可以提出;若一星期只得數次、數句,那麼一個月也未必得。相信自己的感覺,如果她單身無伴,又常常一個人,便甚少會拒絕你──成功約到,你打算點?

 

表弟(躊躇滿志):我一定要給女神最好的,我有車,就來個香車美人吧。
Iris:初次約會就遊車河?咁同旺角 van仔佬周街兜搭妹妹仔有乜分別?

 

表弟:係喎,我可不是情場浪子啊!
Iris:女仔最怕並非浪子,最怕劫匪或變態狂車埋山邊,怎會輕易上陌生人的車?你還是循序漸進先和她吃餐飯好了,而且不要提議太廉宜或太昂貴的地方。

 

表弟: Cheap的壞處我自然明白,欠缺誠意嘛;為什麼連太貴都唔好?
Iris:做戲都有啦──約會食飯,男方見無咩機會發展,豪飲豪食之後借尿遁,留下一張巨額單要女仔找數。

 

表弟(恍然大悟):對,世風日下,我亦不能怪責港女咁多顧忌了。
Iris:仲有呀,約會完別堅持要送人家直到屋企,女仔會驚你談情不成變為跟蹤狂。總之順從她意向便好。

 

表弟(頻頻點頭):咁之後如何發展?
Iris:唉,表姐包埋你生仔咩?有咗個好開始,之後看彼此是否情投意合了,做番自己就得,永遠要機關算盡,拍拖好辛苦啫。你是好男仔,只要不犯上這些初級錯誤,一定搵到女朋友的。

作者介紹

Iris和 Arke是希臘神話裡一對孿生姊妹,托生今世成為本欄主持人,為大家解決情場和職場種種難辨錯對的羅生門事件。
Iris:善良正直的 OL,擅長心理測驗和分析。
Arke:敢愛敢恨的辣妹,擅長星座占卦。


本期撰文: Iris
插圖:朱桂葉
mailto:hotpot@nextmedia.com

全站熱搜

tvb4life 發表在 痞客邦 留言(0) 人氣()