75分 

私口味

寄生獸:完結篇

Ads by Google

《寄生獸》本來是套日漫,講外星生物偶然性地墮入地球,入侵人類,然後吃人類。至於點解唔食牛扒唔食魚生?咁你又唔食齋?

 

如無意外,地球上的人類應該會被滅亡。有意外。意外一是眾多寄生獸當中,有一個被稱為智慧最高的,希望帶領同類學懂跟人類並存,取代一味屠殺。意外二是有隻寄生獸入侵人體失敗,搞到男主角得隻右手被佔領,其餘的左手、左腳、右腳、性器官,通通由自己的大腦控制,成為半人半獸獨一無二新品種。這是電影版第一回的重點。
來到完結篇。你會見到外族始終是外族,而且係力量強大的外族,咁點解要委曲自己咁辛苦來跟原居民並存呢?點解唔開開心心按自己喜好生活呢?最多,做自己做得鬼鬼祟祟啲囉。原居民,即係人類,見到自身利益受損,一向信奉的核心價值被漠視,即使對手好似好神秘,都反擊啦。 Oh, shit,一反擊,就激嬲大佬,大佬一出手,乜道理都唔使講,乜規則都唔使守,總之見人就殺,因為佢非常好打,於是,即使佢哋仲要話人類先係強者,自己只係被迫還拖,似足丁蟹,你都吹佢唔脹,只能等死。
如果,這是齣《復仇者聯盟》之類的美式超現實樂觀積極正能量巨獻,人類就會聯手抗敵,唔知點解會突然可以以弱勝強。
可惜,這是一齣改編日漫的現實主義作品,從寄生獸手中拯救人類的,從來不是人類,只有靠男主角那隻右手,那隻跟人類關係密切的無間右手,潛伏到寄生獸大佬中,由內到外的搞破壞,才能治標又治本,一勞永逸。兩頭蛇向來有莫大功用。根本一直都係不是你死便是我亡。要兩種取態截然不同的生物勉強地共處同一空間,無論怎樣掩飾怎樣掙扎怎樣包容,到最後,也只能二揀一。你看深津繪里飾演的寄生獸智者,連人類的母性都模仿了,但身邊同伴個個想咬人,你還希望在人類世界得到認同?高永文發脾氣究竟是真性情,還是天真得交關?
是不是說得太遠了?是。而且說得太多,又太硬。像兩集《寄生獸》,前前後後有成幾場戲完全係為說教而說教,仲要係你一句對白我一句對白,似辯論比賽般呆滯而突兀。現在是鬥大聲的時代呀!還有人有心機跟你慢慢傾?不信?請參考各高官落區被市民玩殘的片段。


撰文:方俊傑
mailto:hotpot@nextmedia.com

全站熱搜

tvb4life 發表在 痞客邦 留言(0) 人氣()