梳乎厘係就係即製,但用光波爐去焗,好無誠意。 

試食王  

Sabatini 地址:尖沙咀東部麼地道 69號帝苑酒店 3樓 電話: 2733 2000

去 Ritz Carlton享受光波爐?

Ads by Google

對 Ritz Carlton酒店內的餐廳位置一向反感,要先去圓方商場經過幾條扶手電梯,再要轉升降機去到 103樓,然後唔知究竟應該向左走定向右走再搭多次扶手電梯先到達。指示不清晰,例牌在 103樓左右徘徊幾次先找到正確路徑,例牌木無表情的員工不會主動協助。像今次走勻幾個路口,至終於去到 102樓的 The Lounge& Bar。

 

The Lounge& Bar裝潢極級奢華有氣派,居高臨下坐擁維港無敵夜景,仲有現場樂隊演奏,平時食件甜品都要百五蚊。 5月 1日推出的 Sweet Soiree法國甜品自助餐,每位只係$280,唔計個景,食兩件甜品已經回晒本,認真抵到爛!
甜品大概有二十款,剛好圍住四分三個開放式吧枱,全部都是法式甜品,與主題十分切合。 Paris Brest、法式千層酥、法式蘋果批、榛子朱古力金磚蛋糕、開心果方塊都十分出色,每件都有脆口、鬆化和軟綿綿的豐富口感,而且果仁香和鮮果香都天然新鮮,沒有化學香精味,有巴黎高級甜品店的水準, encore之試。至於 Macaron、 Opera、法式檸檬撻和法式焦糖燉蛋相比下有點失色,但也值得一試。最意想不到,即製的梳乎厘竟然是用光波爐去焗,好土炮,不像五星酒店作風。焗出來的效果一點也不鬆化,朱古力味帶點苦,十足將現成朱古力粉成羮放入口一樣。


梳乎厘口感和味道都是全場最低分。 

經典法式糕點做得正宗。 

法式千層酥的酥皮做得鬆脆,吉士忌廉香而不膩。

開心果方塊加入了榛子口味,一定好食。 

Macaron相對失色,但要一讚所有甜品都沒有過甜。 

榛子朱古力金磚有拖肥,唔怕肥的一定會再 encore。

 

每人$280,其實主攻有水準的幾款甜品已經夠賺有凸。而且法式甜品感覺高貴,又沒有雪糕、棉花糖或者朱古力噴泉提供,好少扶老攜幼的家庭客,也沒有搶食鮑魚燕窩的土豪自由行,氣氛都幾浪漫。不過,自助餐不包飲品,餐牌內最平的液體也要$85。食甜品如果無茶水落肚,喉嚨好難受啫。食到第二輪,唯有主動問零笑容侍應要熱水,好彩唔收錢。估唔到喎!侍應之後都好主動 refill熱水,算係咁啦。雖然服務扣了唔少分,都係要再講多句好抵食。溝女的話,訂個落地大玻璃窗前的二人梳化位,八成掂!


千層酥即叫即製,酥皮不會因接觸忌廉太長時間而變腍。 

有靚景,仲有 live band,值回票價。 

評分

食物:★★★★
服務:★★ 1/2
環境:★★★★★
抵食:★★★★

 

Sweet Soiree法國甜品自助餐
價錢:每位$280,另有每位$498包甜品自助餐連自選晚餐主菜一款(只限星期一至四)
供應時間: 8pm-10:30pm
地址:九龍柯士甸道西 1號環球貿易廣場香港麗思卡爾頓酒店 102樓 The Lounge& Bar
電話: 2263 2270

試食王

喜歡外出用膳,也喜歡誠實,不相信飲食網站的所謂評分,也怕了所謂食家獲得優待後的意見,情願隱姓埋名,真金白銀,測試飲食雜誌飲食網頁捕捉不到的真實一面。

全港限量 200瓶單一原桶威士忌

近二百年歷史的蘇格蘭威士忌品牌 Glenlivet,每年都會出產一款單一原桶(single cask)純麥威士忌, 2015年全新限量版 Carn Mor即日起已在香港發售。 Carn Mor結合了細膩的花香、綿密濃厚的蜂蜜甜美、牛奶朱古力的氣息、烤杏仁的果仁香氣,又有柑橘甘香,複雜富層次。全港限量 200瓶,愛好蘇格蘭威士忌的,不要考慮太多,搶吧!
價錢:$2,988
售賣點:屈臣氏酒窖

季節限定 德國黑森林白蘆筍

春去夏來,又是白蘆筍當造季節。識食,一定食最清甜肥美的德國黑森林出產。帝苑酒店意大利餐廳 Sabatini今年再次從黑森林運來頂級白蘆筍,條條粗壯多汁,像保存了森林中的雨水春露。大廚 Andrea以最原汁原味方法烹調出德國白蘆筍配荷蘭汁和溫泉蛋配煙肉白蘆筍香草牛油芝士汁外,還配合海鮮做出法國藍龍蝦雲吞配白蘆筍海膽車厘茄等菜式。錯過了今年,便要等下年,想食便要快訂位。

Sabatini
地址:尖沙咀東部麼地道 69號帝苑酒店 3樓
電話: 2733 2000


撰文、攝影:試食王
mailto:hotpot@nextmedia.com

tvb4life 發表在 痞客邦 留言(0) 人氣()