EmQuartier六樓至九樓為飲食樓層,中央一盞百米長的植物吊燈,相當搶眼。 

登機證

旅行 旅遊 曼谷 商城記

Ads by Google

曼谷商場行極都唔完, Central Embassy開業一年後,又有新對手上場。 EmQuartier為「貴婦百貨」 Emporium二期,集團更自稱這區為 Em District,致力打造成另一個 Siam。商場有全東南亞最大的人工瀑布、三萬呎空中花園,有國際品牌旗艦店未必有新意,但引入多間首度駐泰的品牌。開業日,人龍成功造勢。最吸引係兩個商場合共二百間餐廳,單是 EmQuartier內的食肆都有 144間,各式餐廳、美食廣場及外賣店任君選擇,要揀啱心水都唔容易,去採訪食足兩日,都仲未覺得厭!

 

 

三萬呎綠化園林打卡


五至六樓的空中花園分成多個不同景觀,有池塘、河流及庭園等等,全部都是真植物。 

EmQuartier位於 Phrom Phong站,正正位於 Emporium對面, BTS一出直達,相當方便。商場外形似足 Central Embassy,同樣以白色不規則形狀作設計,擺明挑機。以兩幢建築物組成,分成 Glass、 Helix及 Waterfall三區,每層唔算大,有天橋連接三區,都幾易行。
商場有三成面積為綠化空間,室外中央位置有號稱全東南亞最大的人工瀑布,高六層約四十米,仿照熱帶雨林,不過流水只流落一層,而唔係直接由六樓至地面,唔夠震撼。另外在五樓的空中花園,足有三萬呎,在室外空間栽種了大量綠色植物,加埋小橋流水,如沙漠中的綠洲,當然,日頭走出去都好熱。仍未開放的 45樓瞭望台,更有玻璃地板,不過開幕日未定。
現已有九成商鋪營業中,貨色比 Emporium後生,有齊時裝、電子用品及美容化妝品,不少品牌更是首次登陸泰國,包括全球最大間的 Paul Smith、日本生活品牌 Beams及街頭時裝 A Bathing Ape、韓國著名時裝及化妝品店 Stylenanda等,亦有平價時裝旗艦店如 Zara及 H&M。比較有特色的,是主力賣五十多個泰國設計師品牌的 Qurator,及似 LOG-ON的精品店 Another Story,賣泰國及外地設計精品。另亦有大人細路都歡迎的 Le Sens spa、超豪戲院及健身中心,始終熟口熟面,如果你喺香港成日行商場,行完曼谷呢個新商場,應該會冇咩收穫。

 

 


商場內以白色作主調,店鋪夠大而且好有空間感,行得舒服。 

四樓 Another Story網羅了不少本地及外國精品,有文具、生活用品、傢具、時裝,連裝飾用的假花店都有! 

店內有售由清邁年輕設計師設計的木製 iPhone殼($114)及竹製環保揚聲器($128),實用。

Glass及 Helix區感覺較高檔,而 Waterfall區比較多年輕潮牌,樓高四層的熒幕柱體貫穿大樓。 

人工瀑布由六樓伸延至地下,分成多條流水,唔算氣勢磅礡,勝在有大量綠色植物,感覺悠閒放鬆。 

白色不規則外形似曾相識,每層都有露天走廊通往 Helix區,唔算難行,不過都有機會日曬雨淋。

空中花園入夜後感覺完全不同,商場有表演及活動在此舉行,似派對咁熱鬧。 

二樓的 Qurator是由商場自己開設的百貨店,主打泰國設計師女裝,地下及一樓則是 Adidas、 Levi's及 Guess等國際品牌。 

Qurator內有成熟女性時裝,亦有啱年輕人的潮牌,獲選 2014年最佳女裝品牌 Vick's Weekend牛仔短褲賣$664。

旋轉迴廊過百餐廳

冇嘢好買,不如去食餐飽,因為餐廳食肆仲吸引。 B層分成兩區, Food Court有十八檔,主要賣泰式風味的麵食及街頭小吃,如冬蔭公湯粉、鴨湯粉、泰式炒金邊粉等。 Food Hall另有 25間獨立快餐、甜品店及 café,最多當地人幫襯竟然係台灣的豪大大雞排,我則推介可自選唔同牛肉作配料的粉麵店 Happy Beef by M及泰式快餐 Eat by Supanniga,至少特別啲。
地下至三樓都有唔少選擇,超市 Gourmet Market大過 Emporium店,有十多間西式甜品外賣 counter。必要到 Harrods Café,因為這裡有倫敦以外首個雪糕專櫃,售賣二十多款雪糕口味。其他品牌包括人氣咖啡店 Roast及 Greyhound Café、法國馬卡龍名牌 Pierre Herme、即將開業的 Jones the Grocer。六樓至九樓為飲食樓層 The Helix,共有 43間餐廳,各國菜式齊全。三層螺旋形迴廊,唔使落樓梯,一口氣行落去,可以邊行邊慢慢揀。大部分都係日本菜及西菜,想食泰菜可以揀名店 Nara Thai,海鮮店 Crab& Claw供應新鮮龍蝦及肉蟹,以西式煮法烹調,唔使次次都係咖喱炒蟹。餐廳多元化,淨係嚟食嘢都值得。


被雜誌選為死前必到餐廳之一的 Wine I love you,最新分店位於六樓,裝潢如小酒館,吃西式及泰式 fusion菜。 

Helix區間間餐廳都裝修得好靚,充滿法國情調的 Audrey,食西菜及泰菜。 

海外首間 Harrod's雪糕店有堂食及外賣,有棉花糖、黑啤味等二十幾款,每球$21,抵食!

超市有多檔外賣小吃,最多泰國人捧場的是來自日本的鯛魚燒,時時刻刻打晒蛇餅。 

Crab& Claw設街市般的海鮮檔,有魚、大蝦、蜆等,可以揀啱先點菜。 

New England Crab Boil$182有美國蜆、肉蟹,加薯仔及粟米一起蒸,原汁原味,或者可蘸點另上的牛油汁,跟濃郁的泰式煮法不同。 

全球只有這間 Greyhound Cafe設有零售店,賣自家醬汁、麵包等食材及 T恤精品。 

 

 


泰式鴨湯河$33有原隻鴨髀,鴨肉煮至軟腍入味,湯底香甜濃郁,有街邊風味。 

生蝦$56/8隻餐廳供應多款正宗泰國菜,價錢稍貴,但味道賣相俱佳,生蝦厚肉鮮甜,又處理得乾淨。 

Food court有十八檔泰式粉麵,每檔只賣幾款招牌菜,二三十蚊有得食,好吸引。 

Nara Thai連續多年被評為最佳餐廳,有室內及商場走廊位,算是全個商場最吸引的泰菜。 

 

EmQuartier
地址: 637 Sukhumvit Rd, Khlong Tan Nuea, Watthana
電話:+66-2-269-1000
營業時間: 10am-10pm
前往方法: BTS Phrom Phong站 1號出口

競爭對手

另一個河畔商場 Yodpiman River Walk,位於花市旁邊,樓高兩層,特色商店唔多。頂層主要是露天食肆,包括 Mango Tree、日式甜品店等,可以飽覽湄南河及黎明寺。設有私人碼頭,可以經水路前往商場。

 

Yodpiman Riverwalk
地址: Soi Tha Klang, Wang Burapha Phirom
電話:+66-2-623-6851-55
營業時間: 10am-1am
前往方法:可坐船至 Pak Klong Talard碼頭或的士前往

夜市推介一:古董車配五百檔


夜市門口最大的酒吧,只放着簡單木枱椅,有 live band即席表演,氣氛愈夜愈熱鬧。 

行厭翟道翟,一於去曼谷兩個新開夜市。火車夜市冇火車,但位於地鐵站旁邊,行五分鐘就到,好就腳。一入到夜市,就有大型戶外酒吧,全晚都有 live band演出,氣氛極好。夜市共五百多個攤檔,如年宵市場般一行行,逐條街行就唔會迷失。入口頭兩行主要為小食檔,賣大路街頭小食、粉麵及燒烤。中間攤檔有賣衫褲鞋襪同電話用品,女人街貨色唔算好吸引。反而最左右兩側有數間倉庫般的磚屋,賣自家設計皮具、牛仔褲及韓風時裝,甚至美式理髮店都有!當然冇地攤咁平,但質素好啲,叫做買得落手。另一側的鐵皮屋有大大件古董傢具及擺設,相當有型,買唔到返香港,影張相都好。而後方地攤停泊了不少古董車,賣的精品比中間攤檔靚,唔好 miss咗。

 

 


甚似日本設計的熊仔小布袋及 tote bag,每個只售$58。(古董車地攤 27號檔) 

夜市最常見的舊巴士,有不同型號,車迷一定興奮。 

不少檔主索性用古董 VW巴士作餐車,有型又吸睛。

入鋪的 KATANGTHONG,有自家製皮袋及布袋,價錢比地攤貨貴,但設計精緻得多。 

不少地攤都賣平價眼鏡,唯獨這一檔的賣大熱懷舊金屬架,每副約$82。(中央排檔 40號檔) 

 

Talad Rod Fai Ratchada Market
地址: Ratchadaphisek Road, Dindaeng
營業時間:星期四至日 5pm-1am
前往方法: MRT Thailand Cultural Centre站 3號出口,面向馬路左轉步行至 Esplanade商場,再左轉入商場前小路即達

夜市推介二:天橋底買古董


地攤對面的橋底小木屋,有不少都是酒吧及 café,放滿懷舊飾物,相當有 feel。 

另一個夜市則是如假包換的火車夜市,真正位於火車路軌旁,行行吓會見到火車經過。這一個夜市原本屬於 JJ Green,現在搬到較偏僻的位置,要乘坐地鐵至尾站再轉的士。日間本來是街市,入夜後才陸續開鋪。沿着天橋底一直行 1.5公里左右,有大量二手及古董物件地攤,賣二手衫、舊玩具及擺設、飾物等,直情似夜冷鋪,雖然污糟殘舊,但頗有原始味道,總好過睇中國製老翻產品啦。部分店鋪更在天橋底築成兩層小木屋,放滿舊招牌及電器,充滿美式西部風情。如果睇唔啱,沿途有多間酒吧及特色 café,加埋清新音樂人現場表演,很有 indie氣氛。來逛的只有本地人,不過成日有電單車在路上行走,要小心行。

 

 


木製小朋友三輪車,手工超靚,檔主冇標價,可惜好難帶返香港。 

夜市停泊了不少古董 VW巴士、甲蟲車等,淨係影相都影唔停! 

這檔賣舊式廣告及標語的鐵板,每塊售$35至$58不等。

 

Siam Gypsy Junction
地址: 95/20 Bangkok-Nontaburi Road, Wong Sawang
營業時間:星期三至日 6pm-1am
前往方法: MRT Bangsue站 2號出口再轉乘的士,車程約十分鐘。

向歷史致敬的方便酒店

嫌曼谷的高檔酒店太死板冇特色,新開的設計精品酒店 Indigo Hotel,跟洲際酒店屬同一 IHG集團,不過走型格路線,更適合年輕旅客入住。 Indigo品牌融入大量社區元素,以新舊交錯作設計主題,公關稱:「酒店身處的 Wireless Road,是全泰國首個無線電誕生的地方,所以酒店大堂的一幅古董收音機牆,就是向歷史致敬。」周圍都放滿古舊的打字機、電腦、玩具等,好多細微位都充滿玩味。連走廊都有特色,一出電梯,就會見到以附近 Lumphini Park為主題的塗鴉,走廊以半開放式設計,每四層就有一個大型裝置,如 tuk tuk、人力車及織布機等,宣揚地道文化。房間唔算大,但設計有型又舒服,露台對出見到美國領事官邸,一片綠油油相當開揚。
雖然只屬小型酒店,但設施齊全,頂樓有 infinity pool及 gym房,一樓有餐廳及酒吧。餐廳有八成都是泰國菜,部分更是泰北及南部的地道菜式,亦有名廚設計的 fusion泰菜,選擇豐富。早餐為半自助形式,主菜在開放式廚房即叫即煮,夠新鮮。酒吧有如圖書館般,招牌雞尾酒以地址命名,只售$19。位於曼谷市中心,行五分鐘可到達 Phloen Chit站,位置冇得輸。


22 Steps酒吧設計如圖書館,書櫃內都是真書,入面還有雪茄室及更私密的座位。 

中空設計的走廊,有陣陣自然風吹入, tuk tuk可以任你坐上去影相。 

頂樓的泳池有 180度曼谷鬧市高樓景色,泳池唔算大,叫做可以游兩步。

房間擺設同樣懷舊,有傳統泰式圖案地氈、懷舊吊燈,露台對出一片綠油油,冇樓對樓的壓迫感。 

Metro餐廳有室內及戶外座位,難得價錢一點都唔貴,主菜大約五十幾蚊,食得過。 

炸蝦餅$22供應多款地道泰國菜,這款傳統的蝦餅有濃郁蝦味,質感較軟身,以傳統泰式藤籃上枱。

走廊的塗鴉每兩層唔同,天花的彩色木條其實象徵泰國最著名的絲綢,好細緻。 

大堂𨋢口位有一幅用幾十部舊式收音機、唱機及結他等砌成的牆身,客人可以自由把玩。 

大堂傢具都是特別訂造,放了大量古董裝飾,最愛玩古董打字機及電腦。

 

Hotel Indigo Bangkok Wireless Road
地址: 81 Wireless Road, Lumpini Pathumwan
電話:+66- 2-207-4999
房價:兩人房每晚$1,038起

五星級河邊豪宅


一房客廳有大梳化及開放式廚房,配上鮮色牆身,感覺年輕。 

湄南河邊多是半島、文華、喜來登級數的酒店及住宅,新開的服務式住宅 Klapsons來自新加坡,首度進駐泰國。跟高級私人住宅 The River同一幢大樓,保安特別嚴密,客房只佔 23樓至 31樓,分成 studio、一房、兩房及三房,最細都有四百呎。所有房間都有廚房,迷你吧有免費汽水及小食,方便短期留宿。低層及高層有不同設計, 27樓及以下房間,由設計師 Sawaya命名,用色年輕大膽,高層的 Residences房種則較柔和溫暖,營造家的感覺。雖然冇餐廳,都有 room service早餐,大堂亦有免費下午茶及咖啡供應。五樓有三個泳池,附近有 24小時超市及咖啡店,設施尚算齊全。這裡有免費接駁船前往 Saphan Taksin BTS站,船程只是三分鐘左右,每半小時一班,都算方便。

 

 


三房套房位於角位,落地玻璃對正湄南河,景觀一流。 

過千呎三房套房有齊客廳、飯廳及廚房,間隔分明,加上大露台,有豪宅般的享受。 

五樓有三個大泳池,另 23樓亦有一個較細的空中泳池,比起一般酒店的 infinity pool大得多。 

酒店的私家碼頭,距離大堂約兩三分鐘路程,可以坐免費遊艇過河前往 BTS站。 

 

Klapsons the River Residences
地址: 110/725 Soi Charoennakorn, 13 Charoenakorn Road, Klongtonsai, Klong Sarn
電話:+66-2-803-8100
房價: Deluxe一房每晚$2,543起

有用資料

簽證:持特區護照及 BN( O)均毋須簽證
天氣:五月至六月為曼谷最熱的時候,日間平均氣溫為 32度,不時會有雷暴。
機票:肯亞航空每星期三班機直航前往曼谷,逢星期二四六來回,出發時間為晚上 2150起飛, 2330抵達。回程時間為 1440, 1835抵達,來回票價連稅及燃油附加費$1,665起。商務客艙舒適又少人坐,來回都只售$4,005起。
交通:來回市中心建議乘坐 BTS,前往夜市則要搭 MRT,在 BTS的 Asok、 Sala Daeng及 Mo Chit均可轉車。
貨幣:$1港元約兌$4.2泰銖
鳴謝:泰國政府旅遊局、肯亞航空、 Hotel Indigo Bangkok、 Klapsons the River Residences


撰文:張頌婷
攝影:胡春輝
模特兒: Blaire Lam@FreeStyle

tvb4life 發表在 痞客邦 留言(0) 人氣()