壹號幹線

電動車大時代  Volkswagen e-Golf、 Renault Zoe

Ads by Google

當政府取消環保汽車優惠稅,只有電動車能夠繼續受到優待(豁免首次登記稅)之時,反而造就電動車市場突然蓬勃,全新電動車,一部接一部。
誠然,過往電動車,「代步車」形象居多,行得走得已經夠,用家最關心,不外乎是「充滿電行到幾遠?」,駕駛樂趣?無人會問。
今次,一部來自德國福士的 e-Golf,激辣有玩味;一部來自法國 Renault的 Zoe,鬼馬又長氣,講到尾,電動車終於有自己風格。
來到電動車大時代,好難揀?但點都好過無得揀!

一身藍血

以廠方大賣車款 Golf「電動化」而成,不難理解,皆因 Golf形象「入到屋」,之不過轉投「電力市場」,為了以正視聽,全 LED頭燈及鬼面罩加上藍色裝飾,而大型「 C」字日行燈,暫時只是 e-Golf專用。

長氣黑馬

Renault的電動車, Zoe並非第一部,之不過講外形,渾圓外形加微絲細眼藍色頭燈,一副「嬲爆爆」可愛 look,又鬼馬又科幻,續航距離高達 240km,加上抵玩車價,肯定是電動車中的黑馬。

Renault Zoe突破二百


採用 Clio底盤的 Zoe, 88匹馬力電動馬達, 22.4kgm扭力,睇落車身高,但查實重心低,入彎表現穩定,加上可以一口氣行足 240km,同級電動車,鬥長氣的話,無得輸。 

售價:$329,800
馬達:繞線同步馬達
電池: 400V 192組鋰電
波箱: 1前速
馬力: 88匹
扭力: 22.4kgm-25.5kgm
長/闊/高: 4084/ 1730/ 1562mm
重量: 1468kg
續航距離: 240km
0-100km/h: 13.5秒
查詢: Wearnes Motors
網址: http://www.renault.com.hk 
讚一讚:續航能力同級車之冠,抵玩車價亦有吸引力。
彈一彈:用料一般,馬力亦稍欠勁度,只能滿足代步需要。

Volkswagen e-Golf頭炮電車


115匹馬力, 10.4秒先由完全靜止上到 100km/h,之不過,馬達特性扭力大, 0-40km/h頭段起圍,爆發力極有驚喜,推背感強烈,足以媲美 Golf GTI,當然,後段就絕不能與 GTI相提並論。 

售價:$369,880
馬達:永久同步馬達
電池: 323V 264組鋰電
波箱: 1前速
馬力: 115匹
扭力: 27.5kgm
長/闊/高: 4364/1799/1457mm
重量: 1585kg
續航距離: 130-190km
0-100km/h: 10.4秒
查詢: Volkswagen HK
網址: http://www.vw.com.hk 
讚一讚:設備齊全兼豪華,爆發力更加有辣跑感覺。
彈一彈:鍾意科幻電動車外形的用家,或會驚喜欠奉。

話你知

現時電動車所採用的充電制式(快充),分為日制「 CHAdeMO」及歐制「 CCS」,而香港目前以日制快充站較多,有十二個,而歐制快充站,暫時只得啟德德朗邨設有唯一一個歐制快充站。

Renault Zoe

波棍 size夠大,手感好,但波檔刻度鬼祟,難睇。 ECO模式按鈕(紅圈)可將續航力加長 10%,可視作救命掣。

 

若嫌儀錶板資料睇得未夠清楚,仲有個七吋屏幕幫到手,尤其電池用量採用圖表式顯示,好易明。

 

法國車傳統:膠味濃,但其實睇真, Zoe設備算齊全,平底真皮軚盤、 USB插頭等,定速巡航時,更可用軚控按鈕控制
加減速,好有打機感受,再加上雙色調內籠極有層次感,觀感不錯,總結:贏設計、輸用料。

 

前座椅造型其實相當搶眼,但可供調校位置確實少得可憐,作為代步車,可以收貨。

 

可能法國人鍾意挺直腰背,所以後座椅背同樣「直筆甩」,好彩車身高度比 Clio稍高,高頭大馬乘客,毋須低頭做人。

 

一大幅儀錶板,夠破格,正常模式用綠色主題,藍色主題則是慳電模式,清楚易明,加上有大大塊遮光板,反光機會近乎零。

 

行李箱空間有 338公升,已經比 Clio的 300公升多,始終,偷位並非 Renault強項,幸好後座椅背可以放低,增加實用性。



雖然大家同是電動車一分子,但取向各異, e-Golf(左)外形易受落、設備豪華兼實用, Zoe(右)外形搶眼、同級最抵玩兼續航力強,證明香港電動車市場,已經進入大時代。 

Volkswagen e-Golf

 


若非特別講明,仲以為是七代 Golf,點估到,電動車設備可以「豪華到咁」,軚控、大型觸控屏幕、後波鏡頭、雙區冷氣,甚至自動泊車等,電動車一樣好好享受。 

但凡電動車,幾乎全部都用「 1前速」波箱,但 e-Golf繼續有得玩「+/-」波,作用是調校動能回收力度,回收力度愈高,電池儲電愈多,令續航距離更長,但馬達輸出力會稍稍調低。若然三級回收力度都未夠,大可轉成「最慳電」的 B波行駛。好難明?「換算」為汽油車,玩法就有如「 sport mode」同「 eco mode」。 

操作爽快流暢,屏幕下方裝有紅外線感應,「左手伸一伸」,屏幕上按鈕會自動放大,方便操作,德國人,就是勝在有這份細心。

電池全裝在地台下方,行李箱空間未有太大影響, 380公升,已經足夠你買餸放狗擺行李放 BB車。 

儀錶板未有如其他電動車般刻意「科幻化」,只是左側轉數錶加入「 charge」字眼,顯示回收力度,實用型為上。 

後座依舊延續 Golf傳統,好闊落,特別一提,車廂燈改用藍色 LED,凸顯「 blue blood」身份。 

以不足三十七萬車價的電動車,已經有全真皮座椅,雖然手動操作,但厚身又軟熟兼有暖椅功能,兩側亦包得舒服,更可以熄埋車歎冷氣,此「 Golf」獨有。 

壹車在手

想睇最有動感試車片段,想掌握全城最強汽車資訊,就要 bookmark「 http://www.nextcar.next.hk 」到你部 smartphone!

Tesla出招玩四驅

各大品牌電動車近期齊齊「相約在香港」,作為專門生產電動車車廠的 Tesla,自然要有搞作,品牌最近在淺水灣開設 Pop-up Store,加裝快速充電站之餘,更展示最新四驅底盤。

 

數目爆升
自從上年夏季開始在港交車, Tesla在馬路上的出場次數,愈來愈密,究竟香港賣出幾多部 Tesla?好多人都想知,不過 Tesla香港區總經理范菁怡無直接回答,只話香港電動車數目由 2013年約六百部,到 2015年第一季爆升至約二千部,當中有幾多部 Tesla?心中有數!

 


快速充電站現時免費供 Tesla車主使用 

加建充電站
新店落腳淺水灣 The Pulse商場,除方便準車主睇車,就連 Tesla車主,同樣受惠,因 Tesla在商場停車場,同時加建四個 supercharger快速充電站,一個鐘就可以「餵飽」部 Tesla。目前, Tesla共有四個快速充電站,分別位於大埔科學園、啟德郵輪碼頭、薄扶林數碼港及灣仔合和中心。

 

四驅摩打
之前在港出售的 Tesla,採用後置馬達、後輪驅動形式,新店焦點,是全新四驅底盤,前後各裝有馬達,每個馬達分別直接推動前、後輪,將 Tesla變身成四輪驅動。據工作人員表示,雖然馬達數目增加,但亦無影響電池續航距離,預計四驅模式會用於 Model S 70D、 85D及 P85D型號上。


首次展出四驅底盤,由於前後方都裝有馬達,令全車重量近乎 50/50,有利提升操控感。 

 


全新 Pop-up Store不但可以買車,更有不少 Tesla精品發售。 

七折回購
之不過,用家最開心,是 Tesla宣布在港出售的 Model S,新車落地後三年,車廠會以約七折車價回購,但計劃只限於三年車(即是話,你想揸多/少幾年先賣俾廠,都無計),保證 Tesla二手車價,點都好過擺上二手車網站。


撰文:劉耀祥
攝影:方保山
mailto:features@nextmedia.com

文章標籤

全站熱搜

tvb4life 發表在 痞客邦 留言(0) 人氣()