Black& White這個男士服裝品牌,屬中價貨,切合誠哥慳儉作風。 

中環人語

追隨誠哥著狗仔衫

Ads by Google

誠哥與已故富婆小甜甜共通之處,係有錢又慳「自己」;誠哥鍾意打 golf,早排佢搵秘書訂運動服,品牌係由小甜甜以安寧控股收歸返來的 SWANK做代理嘅,名為 Black& White,唔係做開奶茶嗰隻黑白淡奶品牌喎,係來自日本嘅男士運動服品牌;鋪頭入面啲口痕友就話:「以誠哥嘅財富,都係『粗粗哋』揀呢個中價品牌喎。」這則消息,在球會內嘅波友之間流傳,間接令呢個狗仔做商標嘅服裝品牌,倍添名氣。

葉維義插爆法官


連葉維義都出面力撐,施老伯雖然輸了官司,但卻贏了人心。(《蘋果日報》圖片) 

週二臨截稿前,惠理基金創辦人葉維義突然打俾小宗,話有嘢要爆,不過唔係爆料,係火爆。原來佢睇到七十三歲老人家施教仁,因唔想拎綜援,用報細十一年嘅假身份證做保安單案,早前被判入獄四個月,之後申請覆核刑期,點知都係維持原判。葉維義火滾道:「我做過律師、讀過法律,但法律不外乎人情。我聽原訟法官講,唔咁判,怕所有九十歲嘅人都出嚟做嘢。我知法律係要有警嚇作用,但係咪咁多九十歲嘅人出嚟做嘢先?我覺得呢個阿伯係個好榜樣喎,佢用假身份證係唔啱,但佢盡忠職守,拎埋警方嘉許信。點知法官又話嘉許信唔可以用嚟求情,因為警方唔知阿伯用假身份證,根本唔合邏輯,阿伯係因為佢嘅行為而獲讚賞,唔係因為佢用咩身份而獲讚賞㗎嘛。我真係頂呢個法官唔順,好唔公平!」爆完一輪,葉維義仲話會帶頭捐錢俾施教仁太太,希望改善到佢哋嘅家庭環境。做善事,小宗一定撐。

應驗《大時代》劇情


上週《大時代》劇情,講到劉青雲幫個 trader買奶茶,誰不知市況波動, trader心臟病發,戰死交易所。 

上週重播的《大時代》,劇情講到股市大起大落,有個 trader頂唔住,心臟病發猝死交易所內。估唔到,呢段劇情應驗喺 2015港股大時代之下。九十年代叱咤金融市場,專做財務按揭和放款生意嘅佐治陳,可能因近排市況激盪,加上佢係多隻細價股嘅玩家,只有五十多歲的他前週突然因心臟病發猝死,身邊朋友莫不萬般唏噓。以往金匡企業嘅羅兆輝、新中港嘅徐展堂都同佢交過手,呢幾位前世債仔,可能也無想過咁早喺天堂同佐治陳相聚!

高盛一 buy再 buy


一連兩份研究報告,高盛係咪咁有眼光先? 

今年初,壞消息多到接唔住嘅滙豐,股價跌到六十幾蚊,冇乜行會睇好,然而美資大行高盛,繼三月頭出完一份「 Buy」報告後,四月頭再彈一份又係「 Buy」嘅;內容冇乜亮點,不過提到墨西哥、巴西業務有待重組,齋睇 report難有動力 Buy,不過貴為花旗大行,點會唔掌握到佢知你唔知嘅料?本週揭盅。原來高盛獲滙豐聘請,幫手出售巴西業務;有生意做,又點會唔睇好呢?

中環寸嘴


楊國佳 

工廈大王楊耀松長子,是各大有名食肆之 VIP,喜歡研究已故及城中有錢佬對食之喜好,強調「貴」唔等如識食,自詡分享食經乃是提升讀者之水平。

踢陸羽山頭


出嚟搵食,千祈咪同小人硬碰,容乜易幫我「加料」,到時係「人肉燕窩粥」。 

上個禮拜朝早走去陸羽,諗住走上二樓搵格房仔同個老友過吓料,吖,激到我扯晒火,嗰三間房仔明明冇人坐,個侍仔竟然話俾人訂晒位,望吓個鐘,朝早十點半,哈,冇房喎!我頂籠咪坐到十二點就起錨,你慌我霸住張枱阻你做生意咩,條友真係×弟!呢啲就係陸羽嘅「山頭主義」啦。嗱,好多普通嘅有錢佬死守一層,我唔係普通嘅有錢佬,所以層層都去吓,自我阿爺嗰代已經喺陸羽打躉,二樓有個侍仔阿榮,三樓又有個阿潤招呼過我老豆,所謂人無三代富,今鋪我都算保持唔到,咁冇飛士,我死鬼老豆都俾陸羽以前報紙檔佬寸過,佢見對面間便利店又送紙巾又送膠袋,梗係變陣幫襯便利店,點知有日賣晒,死死哋去報紙檔買,條友回敬一句:「冇啦,啲報紙俾有錢佬買晒!」
不過,好漢不吃眼前虧,唔坐二樓,我咪撤退去有利陣地,落地下飲,貪嗰度樓底高呀,坐埋喺雪茄林被隊冧前面嗰格。
出嚟搵嘢食嘅,明槍易擋,暗箭難防,容乜易喺我嗰鍋鷓鴣燕窩粥加料,整啲人肉燕窩我歎,到時我就白鱔上沙灘,唔死一身潺,再整碗白肺菜乾湯,潤番條喉嚨就算鬼數!

金牙大狀講嘢


遊客數字反覆,時上時落,咭片•蘇使唔使無限上綱入晒反水貨客數呢? 

撕裂香港
「五•一黃金周」首日訪港內地旅客增加兩成四。咭片•蘇錦樑話單日數字唔作得準,千祈唔好袋住先。
不過,復活及清明假期內地旅客下降一成四,佢同入境處處長陳國基就唔係咁講啦。當時佢哋即刻唱雙簧,話反水貨客示威滋擾旅客,嚇走晒佢哋。
啲人嚟唔嚟香港,原因多籮籮;可能同反水貨示威有關,但亦可能係受紙水影響,冇人百分百知道「真正原因」究竟係乜。乜都無限上綱,社會有乜辦法唔撕裂?如果遲吓數字繼續上升,咭片•蘇係咪要撲出嚟領功,話係政府宣傳推廣使得,先?

中環人語迷你版

“最後一分鐘或峰迴路轉”
估中邊個中環人講呢句說話,送你 plantronics Voyager Legend Signature Black藍牙耳機一個
有意參加者,請於五月六日(星期三)下午一時後,將答案、姓名及聯絡電話電郵至 mailto:centralman@nextmedia.com
小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉

“香港冇以前咁受歡迎,一鋪清袋”
答案:林建岳
得獎者: Winnie Kwan
中獎時間: 1:00pm 29/4/15

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()