Super Junior成員崔始源又嚟香港,今次為電影《赤道》宣傳,雖然見完又見,不過 fans一樣咁瘋狂。 

日韓到會

香港仔 崔始源

Ads by Google

立法會議員話香港電影唔入流,本土歌手又寧願返大陸唱國語歌。自己友都唔撐,反而韓國人識貨。
Super Junior成員崔始源早喺韓流襲港之前,已經嚟香港拍《墨攻》,今年仲一連拍兩套港產片《赤道》及《破風》,留喺香港嘅時間,隨時多過北上發展嘅香港藝人,連港產潮語「 Chok」、「黐線」等等都識得講,夠晒地道!隨住電影上映,差唔多個個月都會嚟香港, fans有排忙!

做南韓特工打到飛起

崔始源係韓國天團 Super Junior嘅主力成員,不過多年來都將工作重心放喺演戲上,而且唔只拍韓國電影同韓劇,仲有台劇、大陸劇、華語片等等,係成功打入國際市場嘅韓星之一。今次參演陸劍青及梁樂民執導嘅新戲《赤道》,飾演一名南韓特工,其他演出者,個個都係大明星,好似張學友、張家輝、張震等等,而佢就同前輩池珍熙有最多對手戲,當中仲有好多動作場面。始源其實嚟過香港好多次,不過都係第一次喺街頭拍戲,仲要係首次挑戰槍戰。雖然有少少緊張,不過香港嘅動作指導一向有水準,拍攝好順利,完全難唔倒有跆拳道底子嘅始源,仲大呼好好玩!


始源第一次同池珍熙合作,除咗可以喺前輩身上偷師,多個同鄉同聲同氣嘅齊齊開工都無咁悶吖嘛。 

另一套始源有份嘅電影《破風》會喺八月上映,佢飾演一位天才單車手,一樣係透支體力嘅角色。 

苦練中文 溝通無難度

《赤道》入面,始源係南韓政府派嚟嘅特工,講韓文理所當然,難為咗要講多國語言嘅張震學韓文。戲中你有你講,佢有佢講,然後做反應。鏡頭後嘅互動反而仲多,因為始源喺出道之前已經學中文,經過多年嘅練習,簡單日常對話難佢唔倒,同其他演員溝通,可以用中文英文加身體語言,一班香港演員都大讚佢好努力。香港韓國兩邊走,難免有少少辛苦,不過始源話香港拍戲比韓國輕鬆,因為韓劇係即拍即播,好多時都要開通宵,喺香港開工反而有足夠時間休息。拍完晒戲,嚟緊又要開始宣傳,《赤道》之後緊接仲有暑假上映嘅《破風》,又要繼續過空中飛人嘅生活喇!


《赤道》主角張學友話崔始源應該係戲中打得最多最勁嘅一個,事實上,始源為咗套戲狂操 fit,咁先似有型特工嘛。 

劇中有一幕戲要始源同池珍熙入錫克教廟搵線人,包頭一樣咁靚仔。 

《赤道》雲集多個影帝級人馬,始源仲有幸同歌神張學友合唱主題曲,好多香港歌手都恨唔到呀。

出身名門 鑽石單身族

貴為 Super Junior嘅主將,崔始源高大有型靚仔,外表無得輸,梗係 fans心目中嘅理想對象,仲要係名副其實嘅富二代,最近有韓國綜藝節目公開佢嘅家庭背景,原來佢爸爸係韓國某著名嬰幼兒品牌企業嘅前社長,目前兼任大學教授,喺首爾黃金地段狎鷗亭坐擁數幢豪宅,家底豐厚, SJ嘅成員仲曾經講過,佢屋企嘅財力,足以買起唱片公司同電視台。始源自己有多架林寶堅尼、法拉利,甚至有傳擁有專用直升機,認真犀利。不過佢就表示唔會靠父蔭,多年來工作無間斷,最近參與內地真人騷《我們相愛吧》,同名模劉雯扮情侶,雖然話係假拍拖,不過始源第一次見面已經送價值約 4萬嘅手鏈做見面禮,出手闊綽到極!至於現實生活中,有邊個咁好彩可以得到男神垂青?有指始源 07年同一位練習生 Stella Kim拍拖,後來因女方出國留學而分手,而家已經係雜誌專欄作家嘅 Stella近兩年傳出同始源復合,令 fans心碎!


崔始源爸爸有財有勢,而家已經退咗休,仲不時跟吓個仔出騷,好多 fans都認得佢。 

崔始源成為香港杜莎夫人蠟像館第 6個韓星蠟像,可惜 8月先有得睇。 

始源多年前同 Stella拍拖影貼紙相,流出之後 fans欲哭無淚。

雖然含住金鎖匙出世,不過佢同 Super Junior其他隊友一樣,出道前經歷艱苦訓練,難怪情如兄弟。 

內地買咗《我們結婚了》嘅版權,開拍《我們相愛吧》, fans對崔始源同劉雯做一對都唔反感,可能係因為外形合襯。 

撰文:關錦雯
攝影:攝影組
mailto:nextb@nextmedia.com

tvb4life 發表在 痞客邦 留言(0) 人氣()