爆 Like王

港視覆核成功又點? 約滿陸駿光:後悔唔拍三級片!

Ads by Google

上週五( 24日) hktv司法覆核成功, hktv好似再有一絲曙光,不過政府未諗計點再搬龍門之際,一眾 hktv嘅藝員已經所剩冇幾。
13年港視不獲發牌,超過 10萬人喺政總集會,其間扮港版半澤嘅陸駿光,由冇人識嘅二打六一夜成名! 4月完約,大台又冇得返,陸駿光再度傍惶,更灰到諗住做地盤佬,好彩未婚妻安慰。他說:「老婆叫我繼續堅持,話錢唔使擔心。」紅唔紅唔緊要,有個無限量支持你嘅老婆先最難得。


13年港視員工喺政總集會,陸駿光上台飾演港版半澤直樹,一夜成名。他說:「我覺得自己係好好彩,可以有一個機會俾大家認識,咁當然希望 keep住落去啦!」

F:《 FACE》 陸:陸駿光

F:點形容喺 hktv嘅 3年日子?
陸:呢 3年我覺得係好精彩囉,覺得自己係比較幸運的一個,到上年唔發牌的時候、好多人喺度講,呢兩三年最大得益就係我。由以前冇人認識陸駿光,到半澤直樹被人認識。雖然之後經歷好多嘢,有機會做啲咁重戲嘅角色,但無牌機會又冇咗,係好唔開心嘅。但相對咁多個過咗嚟 HKTV嘅,唔好彩嘅算係比較好彩嘅人囉,我冇後悔喎,當然有段時間會好迷惘。因為過咗 hktv都係想搵個機會啫。

今年 7月會同拍拖多年嘅圈外女友結婚,陸駿光食住 hktv個勢去韓國影婚紗相都有贊助,嚟緊亦傾緊幾部電影及港台劇,他說:「希望長做長有啦!」

F:咁𠵱家同 hktv完約,你諗住點?
陸:一個月前啦,我個中學同學朋友,佢做緊地盤工人,佢都有成千幾蚊一日嘅,我 WhatsApp同佢講如果我考到牌可唔可以跟你搵食呀?佢話你可唔可以盡量唔好諗呢樣嘢呀?佢叫我唔好放棄住先。佢講完呢番說話之後,咁啱又好似幾好彩,有啲電影開下,港台又開下,諗住暫時做住先囉。
我有同老婆講,完咗約我要轉行喎,我唔可以懶清高係度等 job,佢話唔使啦,比心機試下先啦,俾啲時間試下先,佢知我轉咗行一定唔開心。我哋又冇咩物質嘅嘢,好好彩佢咁同我講囉。
F:回歸平淡接受到嗎?
陸:會,會有諗過會唔會去番以前,你哋啲記者圍住我採訪,咁多燈光影住嘅時候,一定會有虛榮感,我係人嚟㗎嘛,但當呢啲少咗嘅時候,你會有少少驚喇。好多時有好多紅咗嗰啲朋友啦,覺得啲記者好煩成日影佢,報導咁多嘅,佢哋覺得唔開心嘅,我經歷過呢一刻,其實係好好一件事啫,你冇人影係你冇價值喇。人哋唔影你,你就可以慢慢 fade out喇。

《末日+5》同《大眾情性》為陸駿光喺港視嘅最後作品,他說:「未知停牌前公司原本諗住開幾套劇都搵我做主角,但𠵱家冇晒囉。」

F:後悔離開大台呢?
陸:有好多人同我講,如果你唔離開呢啲角色就係你啦,即係譬如張達倫同我哋訓練班出嚟㗎嘛,低我一屆嘅,咁我哋離開咗 hktv後佢得到機會喇,《愛.回家》做律師都幾好呀,都係主角嗰班啦,啲同事話可能唔離開都有機會做呢啲喎。但我覺得又冇得咁講嘅,唔一定有架嘛,我自己覺得係正確嘅,我覺得新公司對我係適合啲囉。

F:會唔會考慮拍三級片呢?
陸:上年有人搵過我呀,真係呀,我諗類似係一路向西嗰啲啦,我唔使脫嘅,係其他人啫,佢搵我嘅時候呢,咁啱王維基買咗中移動嗰個牌,原本有幾套劇都做主角嘅,我就同公司藝員部傾喇,佢哋就話咁你要諗清楚喎,咁樣可能影響我哋公司用你係咩位。有少少後侮過架,個牌又唔發,本來有幾套做主角都冇咗,心諗點解嗰陣時唔接呢?

攝影:林迅景
場地:路邊吧!尖沙咀
Makeup& Hair: Chris@Summer Shell
Styling: Cedrit Lau

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()