周世傑  23歲珠海學院工商管理系 Yr.3青年新政社區主任及發言人Ronald坦言區議員只係佢從政第一步,入立法會先係佢嘅終極目標。 

Main Camp

政改冇希望  U仔轉戰區議會互挑

Ads by Google

雨傘運動過後,冇人敢再低估年青人對社運影響力, 79日的佔領更激起唔少學生關注政治,甚至立志從政。由上年 12月開始,多個青年政黨相繼成立,當中以「青年新政」最有隊型,過百名成員中,不少更係仍在學的大專生,齊以今年 11月尾的區議會選舉為目標,希望贏得議席。
另外仲有高登仔放低鍵盤,加入民主黨準備挑機,後生仔齊齊出動,年尾區議員選舉有好戲睇!

 


冼卓嵐  21歲理大電子計算學系 Yr.4民主黨堅尼地城社區主任Kelvin中三已經跟民主黨莊榮輝從事堅摩區社區工作,所以佢話自己都算係半個堅尼地城人。 

現讀珠海學院工商管理 Yr.3嘅周世傑( Donald),係「青年新政」社區主任兼發言人,對自己出選充滿信心:「我六歲已經住喺堅尼地城,我好清楚居民要啲咩,況且現任區議員係陳學鋒係保皇黨(民建聯),我呢啲冇政黨冇制肘,仲可以吸納政治中立嘅票源!」
Donald表示自己愛政治,成功做議員有穩定收入,可以令他更全心投入,最終會向立法會進發,「我哋一個月會洗 3次樓,估唔到 10戶有 7戶會開門聽我哋講政綱,其實市民都好想求變,佢哋都係想有人幫到手啫,新人仲有火啦!」

高登仔入民主黨

Donald覺得冇政黨撐更方便辦事,不過有人卻加入老牌政黨。喺理大讀緊電子計算學 Yr.4嘅冼卓嵐( Kelvin),係一名資深嘅高登仔:「我中三、四已上高登,最近高登發起嘅 2015區議會參選計劃,我係搞手之一,計劃參選南區。」不過 Kelvin中途被民主黨成員睇中邀他入黨, Kelvin冒住俾高登仔圍插背上叛徒之名,仍決定「變節」:「咁啱民主黨社區主任莊榮輝邀請我入黨,我覺得始終加入一個理念相同兼出名嘅政黨對自己參選有好大嘅幫助,起碼有辦事處專心處理日常雜務,所以咪退出高登計劃。」
照計兩位年輕人應該同一陣線,一齊狙擊鐵票民建聯陳學鋒,可惜佢哋竟然互插, Donald插對方:「其實 Kelvin突然『空降』落嚟呢一區,根本唔知堅城居民需要啲乜!況且佢臨時先加入民主黨,會俾人質疑佢嘅誠信。」
Kelvin卻反擊:「我喺『積極考慮參選』前已經為堅城社區服務咗 8年,做義工、寫吓區議會會議紀錄。而且我唔覺一個政治素人( Donald)可以撼贏陳學鋒,人哋喺西環邨總共 5幢樓,每層都有樓層長監控住啲居民有冇投自己票,咁都唔叫鐵票叫咩,我唔搵啲有經驗嘅政黨幫我,咪盞做炮灰!」


走堂 82日由 922開始, Ronald已經罷課靜坐到雨傘運動結束(共 82日),所以當同學仔甚至老師知道佢有意想參選議員,一啲都唔覺得出奇,仲好支持佢。 

Ronald話如果𠵱家表態會參選區議會,選舉事務處就會立即計佢經費(上屆上限為$53,800),所以個個只會表明係「積極考慮」當中,避免超出上限。 

玩過高登快閃Kelvin(粉紅衫)唔似一般嘅高登仔齋 talk做鍵盤戰士,除咗係區議會計劃搞手,仲會成日參與高登發起嘅活動好似旺角快閃黨咁,找數能力好高㗎。

其實 Kelvin喺學校絕對唔係毒男,係活躍分子一名,仲有上莊做外務副會長拎行政經驗添! 

高登區議會計劃係乜?

呢個計劃其實係高登仔於去年 11月發起,佢哋翻查紀錄發現有 76個區議會席位係由建制派自動當選,所以高登仔開 po召集有意者報名參加區議會選舉,挑戰建制派,就算被沒收保證金($3,000)都要參選,至今幾乎各區都有高登仔報名。

𡃁界出錢出力組政黨

除咗青年新政狙擊老牌政黨,其實多區都有青年軍出現,出錢出力,希望改變香港。

 

沙田新幹線
一班自細在沙田長大的 80、 90後,當中不乏大學生,希望以冇政黨、年青力量改變沙田,早前佢哋就着盛裝去紀念沙田新城市中心麥當勞結業。

 

拾.念
在金鐘佔領區組成的拾.念,亦計劃參加今年區議會,佢哋以守望相助、互相扶持為口號,落深水埗等較低收入地區派飯。


撰文:彭家駿
攝影:賴穎雋

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()