靚抽王

金像獎之影帝崛起

Ads by Google

呢個世上有所謂實至名歸(即係抵你攞獎),又有所謂嘅實至名龜嘅(即係話你根本就係一隻龜)。
今年剛出爐嘅金像獎正好證明晒兩樣嘢,好戲嘅人得到應有嘅獎,至於愚蠢嘅龜,當然亦會得到觀眾嘅注視,同埋網民源源不絕嘅……恥笑。

實至名龜 陳小春
藍絲食螺絲:惠州政協陳小春當晚忽然口吃,每個字都有懶音,竟將螺絲當飯食,啲廣東話比同場嘅國語人湯唯差。唔知係唔係佢作為政協,特登要俾面啲國語系同胞呢。


甩稿甩對白:陳政協成晚都唔記得稿要林家棟同楊千嬅提水。(查實家棟都唔記得《點對點》嘅候選最佳新演員叫張雪芹,叫人做「張咩咩」!仲無啦啦寸套戲無乜戲院上。)不過我哋點會怪佢?家陣係問責制,喂!係邊個話要請佢做司儀㗎?佢依家同香港電影都冇晒關係啦?你估呢度係惠州?


爆粗古惑仔:作為知名古惑仔演員兼身懷非禮案底,小春旨在將草根嘅古惑 style帶入金像獎頒獎禮。當晚亮點係佢表演講粗口,大講「 liu鳩腹肌」都唔夠,有網民翻睇片段,聽到佢竟然同林家棟講:「你都 OnX嘅!」雖然佢講唔出乜嘢大道理,但果真非常有親切感。
娛樂生抽王 黃秋生
繼往年黃秋生頒發最佳女主角獎,大玩棟篤笑論盡香港後,今年佢又返嚟繼續做生抽王頒發最佳導演獎,寸爆早前話要 unfriend佢嘅王晶,搞到王晶個笑容硬過龜殼。最後黃秋生仲玩嘢到大叫:「我要真……(當所有人以為佢話要真普選時)係做司儀。」生抽王又一次玩嘢成功,比得獎者更為搶鏡,去紅館開棟篤笑指日可待。

實至名歸 劉青雲


劉青雲好戲係人都知,民望極高嘅佢發表得獎感言,多謝老婆郭藹明:「每次當我揸住太空船,飛到宇宙唔知邊度,你總有辦法令我安全返回地球。」除咗演技贏得掌聲,形象都同個股市一齊升!升!升!
熱烈地彈琴熱烈地唱
同你數盡今個星期最喜氣洋洋嘅娛樂圈喜事!喜氣洋洋~~

撰文:娛文樂

    全站熱搜

    tvb4life 發表在 痞客邦 留言(0) 人氣()